ރާއްޖޭގެ ސުޕްރީމް ކޯޓު ވަނީ "ޚަރާބުވެފައި" ކަމަށް ކުރީގެ ރައީސް މުޙަންމަދު ނަޝީދު ވިދާޅުވެއްޖެއެވެ.
ނަޝީދު ކުރެއްވި ޓްވީޓެއްގައި ވިދާޅުވީ ރާއްޖޭގެ ސުޕްރީމް ކޯޓު ޚަރާބުވެފައިވާ މިންވަރު ރައްޔިތުންގެ މަޖިލީހުގެ މެމްބަރުންނަށް ރިޝްވަތު ދެއްވުމުގެ ތުހުމަތުގައި ޖަލަށް ލާފައިވާ ދިއްގަރު ދާއިރާގެ މެމްބަރު އަދި ކުރީގެ ރައީސްގެ ދަރިކަލުން ފާރިޝް މައުމޫން ހާމަކޮށްދެއްވައިފި ކަމަށެވެ. ނަޝީދު ވިދާޅުވީ ނާއިންސާފުގެ އަގު ސުޕްރީމް ކޯޓުގެ އުއްތަމަ ފަނޑިޔާރު ދައްކަވަން ޖެހޭނެ ކަމަށެވެ.
މަޖިލީހުގެ މެމްބަރުންނަށް ރިޝްވަތު ދެއްވި ކަމުގެ ތުހުމަތުގައި ހައްޔަރު ކޮށްފައިވާ ފާރިޝްގެ މައްޗަށް ކޮށްފައި ވަނީ ބޭއިންސާފު ދައުވާއެއް ކަމަށާއި ފާރިޝް މިނިވަން ކުރަންޖެހޭނެ ކަމަށް މީގެކުރިންވެސް ތަކުރާރުކޮށް ނަޝީދު ވަނީ ވިދާޅުވެފައެވެ.
ފާރިޝްވެސް ގެންދަވަނީ އޭނާގެ މައްޗަށް ކޮށްފައިވާ ތުހުމަތު ތަކަކަށް އިންކާރު ކުރައްވާފައެވެ. ފާރިޝްގެ ދިފާއުގައި އެންމެ ބޮޑަށް ވާހަކަފުޅު ދައްކަވަމުން ގެންދަވަނީ ބައްޕާފުޅު އަދި ކުރީގެ ރައީސް މައުމޫން އަބްދުލްގަތްޔޫމެވެ. ރައީސް މައުމޫންވެސް ވަނީ ފާރިޝްއަކީ ކުށެއްނެތް ބޭފުޅެއް ކަމަށާއި ފާރިޝް މިނިވަން ކުރަންޖެހޭ ކަމަށް ތަކުރާރުކޮށް ވިދާޅުވެފައެވެ.
