އެމެރިކާގެ ގާނޫނު ހަދާ މަޖިލީހުގެ ތިރީ ގެ، ހައުސް އޮފް ރެޕްރެޒެންޓެޓިވްސްގެ ބޮޑު އަޣުލަބިއްޔަތަކުން ނޭޝަނަލް ޑިފެންސް އޯތަރައިރޭޝަން އެކްޓް ފާސްކޮށްފިއެވެ.
335-78 ގެ އަޣުލަބިއްޔަތުން މި ބިލް ފާސްކުރީ ބިލް ވީޓޯކުރައްވާނެ ކަމުގެ އިންޒާރު ރައީސު ޑޮނާލްޑް ޓްރަމްޕް ދެއްވާފައި ވަނިކޮށެވެ. 'ވީޓޯ-ޕްރޫފް' ބިލެއް ފާސްކުރުމަށް ތިންބައިކުޅަ ދެބައިގެ އަޣުލަބިއްޔަތެއް ބޭނުންވާއިރު، އިއްޔެ މި ބިލް ފާސްކޮށްފައި ވަނީ އެއަށްވުރެ މާ ބޮޑު އަޣުލަބިއްޔަތަކުންނެވެ. އެއީ ރައީސު ޓްރަމްޕްގެ ޕާޓީ، ރިޕަބްލިކަން ޕާޓީގެ ގިނަ މެންބަރުންގެ ވެސް ތާއީދާއެކުގައެވެ. ރިޕަބްލިކަން ޕާޓީގެ 108 މެންބަރަކު ވަނީ ރައީސު ޓްރަމްޕާއި ދެކޮޅަށް، ބިލް ފާސްކުރުމަށް ވޯޓުދެއްވާފައެވެ.
ރައީސު ޓްރަމްޕް ޑިފެންސް ބިލް ފާސްކުރެއްވުމާ ދެކޮޅު ހައްދަވަމުން ގެންދަވަނީ ދެ މައްސަލައެއްގައެވެ. ފޭސްބުކާއި، ޓުވިޓާ ފަދަ މީސްމީޑިޔާ ޕްލެޓްފޯމްތަކަށް ގާނޫނުންދީފައިވާ ރައްކާތެރިކަން ދަމަހައްޓާފައިވާތީއާއި، ކޮންފެޑެރަސީގެ އިސް ލީޑަރުންގެ ނަން ދީފައިވާ ދިހަ އަސްކަރީ މަރުކަޒެއްގެ ނަން ބަދަލުކުރަން ބިލްގައި ހިމަނާފައި ވުމެވެ. ކޮންފެޑެރަސިއަކީ އަށް އެމެރިކާއިން ވަކިވެގަތް ހަތް ސްޓޭޓަކުން 1861 އިން 1865 އަށް ހިންގި ވަކި ސަރުކާރެކެވެ. މިއީ އެމެރިގެ ދާޚިލީ ހަނގުރާމައިގެ ދުވަސްވަރެވެ. މި ހަތް ސްޓޭޓުން ތާއީދުކުރީ އެފްރިކާއިން ގެންނަ މަސައްކަތު މީހުން އަޅުންގެ ގޮތުގައި ގެންގުޅުމަށެވެ.
ކޮންފެޑެރަސީގެ ލީޑަރުންގެ ނަންތައް ދީފައިވާ މަރުކަޒުތަކުގެ ނަން ބަދަލުކުރުމަށް ރައީސު ޓްރަމްޕް ގެންދަވަނީ ދެކޮޅުހައްދަވަމުންނެވެ. ޓްވިޓާއާއި ފޭސްބުކްގެ މައްސަލައިގައި ޓްރަމްޕް ވިދާޅުވަނީ އެއީ ސިޔާސީވެ ވަކިފަރާތަކަށް ޖެހިފައިވާ ޕްލެޓްފޯމްތައް ކަމުގައެވެ. އެހެންކަމުން ގާނޫނީ ރައްކާތެރިކަން ލިބިގެން ނުވާނެ ކަމުގައެވެ.
މީގެ އިތުރަށް އިއްޔެ ފާސްކުރި 740 ބިލިއަން ޑޮލަރުގެ ޑިފެންސް ބިލްގައި ހިމެނިފައިވާ ކަންކަމުގެ ތެރޭގައި ސިފައިންގެ މުސާރަ ބޮޑުކުރުމާއި، ހަތިޔާރު ޒަމާނީކުރުމާއި، ރައީސު ޓްރަމްޕް އަންގަވާފައިވާ ގޮތަށް އަފްޣާނިސްތާނާއި ޖަރުމަނުން އެމެރިކާ ސިފައިން ބޭލުމުގެ ކުރިން އިތުރަށް ބަލަންޖެހޭ ކަންކަން ބެލުން ހިމެނެއެވެ.
ހައުސް އޮފް ރެޕްރެޒެންޓެޓިވް އިން މި ބިލް ފާސްވިޔަސް އަދި ސެނެޓުގެ ތިންބައިކުޅެ ދެބައިގެ އަޣުލަބިއްޔަތުން މި ބިލް ފާސްވާން ޖެހެއެވެ. މިހާރު ގިނަ ބަޔަކު ދެކެނީ އެކަން އެގޮތަށް ވާނެކަމަށެވެ.
މިއީ ރައީސު ޓްރަމްޕް ބޭނުންފުޅުވި ގޮތާ ދިމާ އިދިކޮޅެވެ.
"އަހަރެން އުއްމީދުކުރަނީ ހައުސް އޮފް ރެޕްރެޒެންޓެޓިވްސްގައި ތިއްބެވި ޖުމްހޫރީ ޕާޓީގެ ބޭފުޅުން ޑިފެންސް ބިލާ ދެކޮޅަށް ވޯޓުދެއްވާނެކަމަށް. އެބިލާ އަހަރެން ކުރިމަތިލާނީ ވީޓޯއާއެކު." އިއްޔެގެ ޖަލްސާގެ ކުރިން ރައީސު ޓްރަމްޕް ކުރެއްވި ޓުވީޓެއްގައި ވެއެވެ.
