އެމެރިކާގެ ރައީސު ޑޮނަލްޑް ޓްރަމްޕް މަގާމާ ހަވާލުވެވަޑައިގެންނެވި އެންމެ ބޮޑު ސިޔާސީ އަދި ގާނޫނީ ކާމިޔާބީ އެމެރިކާގެ ސުޕްރީމް ކޯޓުން އޭނާއަށް ހޯދައިދީފިއެވެ. އެއީ މުސްލިމް ފަސް ގައުމެއްގެ ރައްޔިތުން އެމެރިކާއަށް އެތެރެވުން މަނާކުރަން ރައީސު ޓްރަމްޕް ފާއިތުވި އަހަރު ނެރެއްވި ގަރާރަށް ތާއީދުުކޮށްގެންނެވެ.
5-4 ގެ އަޣުލަބިއްޔަތުން ކޯޓުން ކުރި ހުކުމުގައި ވަނީ އެމެރިކާއަށް ވަންނާނީ ކޮން ބައެއްކަން ކަނޑައެޅުމުގެ ބާރު ރައީސަށް ލިބިފައިވާތީ އީރާން، ލީބިޔާ، ސީރިޔާ، ސޯމާލިޔާ އަދި ޔަމަނުގެ ރައްޔިތުުން އެމެރިކާއަށް އެތެރެވުން މަނާކުރަން ރައީސު ޓްްރަމްޕް ނެރުއްވި ގަރާރަށް އަަމަލުކުރުން ހުއްޓުވާނެ ގާނޫނީ ހަމައެއް ނެތް ކަމުގައެވެ.
ޓްރަމްޕްގެ ރަައީސުކަމުގެ ފުރަތަމަ މަހުގެ ތެރޭގައި އެމެރިކާއަށް އެތައް ގައުމެއްގެ މީހުން ވަނުން މަނާކުރާ ގަރާރެއް ނެރުއްވިއެވެ. އެހެންނަމަވެސް، ކޯޓުތަކަށް މައްސަލަަތައް ހުށަހެޅި، ގާނޫނީ އެތައް މައްސަލައެއްގެ ތެރެއިން އެގަރާރަށް އަމަލުކުރުން ހުއްޓާލީއެވެ. މިހާރު އަމަލުކުރާ ގަރާރަކީ 2017 ވަނަ އަހަރުގެ ސެޕްޓެންބަރު މަހު ނެރުއްވި ގަރާރެކެވެ. އެ ގަރާރު ފުރަތަމަ ނެރެއްވި އިރު ހަވަނަ އިސްލާމީ ގައުމެއްވެސް އެގަރާރުގައި ހިމެެނިފައި އޮތެވެ. އެއީ އެފްރިކާގެ ގައުމެއް ކަމުގައިވާ ޗާޑެވެ. އެހެންނަަމެވެސް، މިއަހަރުގެ އެޕްރީލް މަހު ޗާޑު ވަނީ އެގަރާރުން އުނިކުރެވިފައެވެ.
"ސުޕްރީމް ކޯޓުން ޓްރަމްޕްގެ ދަތުރުކުރުން މަނާކުރުން ދަމަހައްޓައިފި. ވާއޮ" ސުޕްރީމް ކޯޓުގެ ހުކުމަށް ފަހު އުފާފާޅުކުރައްވަމުން ރައީސު ޓްރަމްޕް ކުރެއްވި ޓްވީޓެއްގައި ވެއެވެ.
މި ހުކުމަށް ފަހު އިދިކޮޅު ޑިމޮކްރެޓިކް ޕާޓީން ބުނެފައިވަނީ ޓްރަމްޕްގެ ގަރާރު ގާނޫނީ ގޮތުން ރަނގަޅު ވުމަކީ އެއީ ކުރުން ރަނގަޅު ކަމެއް ކަމުގައި، ނުވަތަ އެމެރިކާ މީހުން ގަބޫލުކުރާ ހަމަތަކަށް ފެތޭ ކަމެއް ކަމުގައި ވުމެއް ނޫން ކަމުގައެވެ.
މުސްލިމުން އެމެރިކާއަށް އެތެރެވުން ކޮންޓްރޯލުކުރުމާއި، އެމެރިކާ ދެކުނުގެ ސަރަހައްދީ ރޮނގުން ގަވާއިދާއި ޚިލާފަށް މީހުން އެތެރުވުން ހުއްޓުވުމަކީ ޑޮނާލްޑް ޓްރަމްޕްގެ އެންމެ ބޮޑެތި އިންތިޚާބީ ވައުދުތަކުގެ ތެރޭގައި ހިމެނޭ ކަންކަމެވެ.
