2018 ވަނަ އަހަރު އޮންނަ ރިޔާސީ އިންތިޚާބުގައި ދިވެހި ރައްޔިތުންނަށް އޮތް ހަމައެކަނި ޗޮއިސް އަކީ ރައީސް ކަމަށް ރައީސް އަބްދުﷲ ޔާމީން ދެވަނަ ދައުރަކަށް އިންތިޚާބު ކުރުން ކަމަށް ޓޫރިޒަމް މިނިސްޓަރ މޫސާ ރަމީޒް ވިދާޅުވެއްޖެއެވެ.
ރައީސް ޔާމީން އަރިހުގައި ހުވަދު އަތޮޅަށް ވަޑައިގެން އެއަތޮޅު ކޮލަމާފުށީ ރައްޔިތުންނާއެކު ބޭއްވި ބައްދަލުވުމެއްގައި މިނިސްޓަރ ޒަމީރު ވިދާޅުވީ ރައީސް ޔާމީން އަންނަ އަހަރު އަނެއްކާ ރައީސް ކަމަށް އިންތިޚާބު ނުވުމަކީ ޕީޕީއެމަށް އޮތް ޗޮއިސްއެއް ނޫން ކަމަށެވެ.
"ދިވެހިންނަށް އޮތް ހަމައެކަނި ޗޮއިސަކީ 2018 ގައި ރައީސް ޔާމީން ހޮވުން" މިނިސްޓަރ ޒަމީރު ވިދާޅުވިއެވެ.
ޒަމީރު ވިދާޅުވީ ކޮލަމާފުށީގެ ރައްޔިތުންވެސް ތަރައްގީ ބޭނުންވާނެ ކަމަށާއި ތަރައްގީ ބޭނުން ނަމަ އޮތް ގޮތަކީ ރައީސް ޔާމީން ދެވަނަ ދައުރަކަށް ރައީސް ކަމަށް އިންތިޚާބު ކުރުން ކަމަށާއި މިހާރުވެސް އެރަށުގައި ރައީސް ޔާމީންއަށް އޮތް ތާއީދު ބޮޑުވަމުން އަންނަ ކަމަށެވެ. ރައީސް ޔާމީންގެ ސިޔާސަތާމެދު ޚިޔާލު ތަފާތުވާ މީހުން ތިބިނަމަ އެމީހުންނާވެސް ވާހަކަ ދައްކައިގެން ޚިޔާލުތައް އެއްގޮތްކޮށް، ރައީސް ޔާމީނާއެކު މަސައްކަތް ކުރެވޭނެ ގޮތްތަކެއް ހޯދަންޖެހޭ ކަމަށްވެސް ޒަމީރު ވިދާޅުވިއެވެ. އަދި ރައީސް ޔާމީނަކީ މަސައްކަތް ދަންނަ ވެރިޔެއް ކަމަށާއި ދިވެހިން ބޭނުން ވަނީ އެކަހަލަ ވެރިޔެއް ކަމަށްވެސް މިނިސްޓަރ ޒަމީރު ވިދާޅުވިއެވެ.
ޒަމީރު ވިދާޅުވީ ކުރިޔަށް އޮތް ވިލިނގިލީ ދާއިރާގެ ބައި އިލެކްޝަން ސަރުކާރަށް ކާމިޔާބުކޮށްދީފިނަމަ ކޮލަމާފުށްޓަށް ދެން ސަރުކާރުން އަންނާނީ މާސްޓަރ ޕްލޭނަކާއެކު ކަމަށެވެ.
