ހުޅުމާލޭގައި އަލަށްހަދާ ފްލެޓް ތަކަށް ކުރިމަތިލި މީހުންގެ ތެރެއިން ފްލެޓް ލިބުނު ފަރާތްތަކުގެ ލިސްޓް އާންމު ކޮށްފައިވާއިރު އެކަމުގައި ހުރި ކަންބޮޑުވުންތައް ސަރުކާރަށް ނިސްބަތްވެވަޑައިގަންނަވާ މަޖިލީހުގެ ދެމެމްބަރުން މިއަދު ހައުސިންގ މިނިސްޓަރ ޑރ މުޙަންމަދު މުއިއްޒުއަށް ހުށަހަޅުއްވައިފިއެވެ.
މިމައްސަލައިގައި މިނިސްޓަރާ ބައްދަލު ކުރެއްވީ ސަރުކާރަށް ނިސްބަތްވާ މާލޭގެ ދެދާއިރާގެ މެމްބަރުން ކަމަށްވާ މާފަންނު ދެކުނު ދާއިރާގެ މެމްބަރު އަބްދުﷲ ރިފާއު (ބޮޗޭ) އާއި މާފަންނު އުތުރު ދާއިރާގެ މެމްބަރު އަސްމާ ރަޝީދު (އަސްމައްތަ) އެވެ. ދެމެމްބަރުން މުއިއްޒުއަށް ހުށަހެޅި ޝަކުވާ ތަކުގެ ތެރޭގައި އެ ދެމެމްބަރުންގެ ދާއިރާއިން ފްލެޓަށް ކުރިމަތިލައި ލިސްޓުގައި ނަން ނެތް މައްސަލަ ހިމެނެއެވެ. އެހެންވެ އެކަން ވެގެންދިޔައީ ކިހިނެތްތޯ ދެމެމްބަރުން ވަނީ މިނިސްޓަރަށް ސުވާލު ދަންނަވާފައެވެ.
ހައުސިންގ މިނިސްޓަރ ޑރ މުއިއްޒު މިއަދު ސަރުކާރުގެ ދެމެމްބަރުންނާ ބައްދަލު ކުރެއްވުމުގެ ކުރިން މަޖިލީހުގައި ހިމެނޭ ސަރުކާރާ އިދިކޮޅު ބަޔެއް މެމްބަރުންވެސް ވަނީ މިނިސްޓަރާ ބައްދަލު ކުރެއްވުމަށް މިނިސްޓަރީއަށް ވަޑައިގެންފައެވެ. ނަމަވެސް އެ މެމްބަރުންނާ ވަނީ މިނިސްޓަރާ ބައްދަލު ކުރެއްވޭގޮތް ނުވެފައެވެ.
