ސްރީލަންކާގެ އިރުން ދަތުރުކުރަމުން ދަނިކޮށް ފާއިތުވި ބުރާސްފަތި ދުވަހު އަލިފާންރޯވެ އަނދަމުންދާ ބިޔަ ތެޔޮ ޓޭންކަރުން ޑީސަލް ކަނޑަށް ބޭރުވާން ފަށަައިިފި ކަމަށް ސްރީލަންކާގެ ކަނޑުގެ ސިފައިން ބުނެފިއެވެ.
ކުވޭތުގެ އަލްއަޙްމަދީ ބަނދަރުން 2 ލައްކަ 70 ހާސް ޓަނުގެ ސާފުނުކުރާ ތެލާއި، 17 ހާސް ޓަނުގެ ޑީސަލް ބަރުކޮށްގެން އިންޑިޔާގެ ޕަރާދީޕް ބަނދަރަށް ދަތުރުކުރަމުން ދަނިކޮށް ރޯވި އެމްޓީ. ނިއު ޑައިމަންޑްގައި އަަނދަމުން ދިޔަ އަލިފާންގަނޑު އިހަށްދުވަހު ނިިއްވާލެވުނު ނަމަވެސް އިއްޔެ އަނެއްކާވެސް އެ އުޅަނދު އަނެއްކާވެސް ވަނީ އަނދަން ފަށާފައެވެ.
ކަނޑުގެ ސިފައިން ބުނެފައިވާ ގޮތުގައި ސްރީލަންކާގެ އިރުން 55 ކިލޯމީޓަރު ދުރުގައި މިހާރު އޮތް ތެޔޮ ޓޭންކަރު ކައިރިން ކަނޑުމަތިން ތެޔޮގަނޑެއް ވަނީ ފެނިފައެވެ. އަދި ތިމާވެށްޓަށް ލިބިދާނެ ގެއްލުން ކުޑަކުރުމަށްޓަކައި މިހާރު ދަނީ އިންޑިޔާގެ ކޯސްޓު ގާޑުގެ މަތިންދާބޯޓެއް ބޭނުންކޮށްގެން އެ ތެޔޮގަނޑު ބައިބައިކުރާ ކަހަލަ މާއްދާއެއް ސްޕްރޭ ކުރަމުންނެެވެ.
ޕެނެމާގައި ރަޖިސްޓަރީކޮށްފައިވާ ބިޔަ އުޅަނދުން ކަނޑަށް ތެޔޮ އެޅެން ފަށައިފިނަމަ އެކަން ވެގެންދާނީ އިންޑިޔާ ކަނޑުގެ ތިމާވެށްޓަށް ކުރިމަތިވާ ބޮޑު ކާރިސާއަކަށެވެ.
ސްރީލަންކާގެ ކަނޑުގެ ސިފައިންގެ ތަރުޖަމާނު ކެޕްޓަން އިންޑިކާ ޑިސިލްވާ ވިދާޅުވި ގޮތުގައި އެ އުޅަނދުގެ އިންޖީނު ރޫމުގައި ރޯވެފައިވާއިރު، ތެޔޮ ރައްކާކޮށްފައިވާ ސަރަހައްދަށް އަދި އަލިފާނުގެ އަސަރުކޮށްފައި ނުވެއެވެ.
"ޓޭންކަރު ވަނީ ވާތްފަރާތަަށް އަރިއަޅާލާފައި. އޭގައި ރޯވެފައިވާ އަލިފާން ނިއްވަން ޖަހަމުންދާ ލޮނު އޭގެ ވަތުން ހިއްކަމުން ދާއިރު އެލޮނާއެކު އޭގެ ޓޭންކުތަަކުގައި ހުރި ޑީސަލްވެސް ބޭރުވަނީ." އޭނާ ވިދާޅުވިއެވެ.
ބަނދަލު ހޯދުމަށް ދައުވާކުރުމަށާއި، ޕެނެމާގައި ރަޖިސްޓަރީކޮށްފައިވާ އެ އުޅަނދުގެ ވެރިފަރާތަށް އުޅަނދު ކަފުޖަހައިގެން ސްރީލަންކާއާ ދުރަށް ގެންދަން އަމުރުކުރުމަށް ތައްޔާރުވުމަށް ސްރީލަންކާގެ ޕްރޮސެކިއުޓާ ޖެނެރަލް ޑައްޕުލާ ޑި ލިވޭރާ ވަނީ އެ ގައުމުގެ ކަނޑުގެ ކަންތައްތަކާ ގުޅޭ އިދާރާތަކަށް އަންގަވާފައެވެ.
ސްރީލަންކާއާއި އިންޑިޔާގެ ކަނޑުގެ ސިފައިން ދަނީ ތެޔޮ ޓޭންކަރުގައި އަނދަމުންދާ އަލިފާންގަނޑު ނިއްވާލެވޭތޯ ކެނޑިނޭޅި މަސައްކަތްކުރަމުންނެވެ.
އެމްޓީ. ނިއުޑައިމަންޑަކީ އިންޑިޔާ ކަނޑުގެ ގައުމެއް ކަމަށްވާ މޮރިޝަސްގެ ފަރަކަށް ފާއިތުވި ޖުލައި މަހު އެރި އެމްވީ. ވަކަޝިޔޯއަށްވުރެ އެތައް ގުނައެއް ބޮޑު އުޅަނދެކެވެ. އެމްވީ. ވަކަޝިޔޯއިން ބޭރުވި 1000 ޓަނުގެ ތެލުގެ ސަބަބުން މޮރިޝަސްގެ ފަރުތުކަށާއި، ކަނޑުގެ ދިރުމަަށް ވަނީ ބޮޑުތި ގެއްލުންތަކެއް ވެފައެވެ.
