އެމްޑިޕީ އިސްވެ އޮންނަ ސަރުކާރަކުން ޕެންޝަން ފަންޑުގައި އަތެއް ނުލާނެކަމަށް ރައްޔިތުންގެ މަޖިލީހުގެ ރައީސް، ކުރީގެ ރައީސް މުޙައްމަދުނަޝީދު ވިދާޅުވެއްޖެއެވެ.
މަޖިލީހުގެ ރައިސް މިހެން ވިދާޅުވީ ޕެންޝަންފަންޑުގެ ފައިސާ ނެގޭ ގޮތަށް އިދިކޮޅު ޕީއެންސީގެ ނައިބު ލީޑަރު، މާވަށު ދާއިރާގެ މެންބަރު މުޙައްމަދު ސަޢީދު ހުށަހެޅުއްވި ބިލާ ބެހޭގޮތުން މަޖިލީހުގައި ވާހަކަ ދައްކަވަމުންނެވެ. ބިލު އޮތީ ދައުލަތަށް މާލީ ބުރައެއް އުފުލަން ޖެހޭ ގޮތަށް ކަމަށް ވިދާޅުވެ ވަނީ މަޖިލީހުން ބޭރުކޮށްލައިފައެވެ. މިމައްސަލައިގައި މަޑުއްވަރީގެ ދާއިރާގެ ޕީއެންސީ މެމްބަރ އާދަމް ޝަރީފް ވަނީ އިދިކޮޅުފަރާތަކުން މަޖިލީހަށް ވެއްދި ބިލް ބޭރުކޮށްލުމުން އެކަމާ ހިތްހަމަ ނުޖެހުން ފާޅުކުރައްވައިފައެވެ. އަދި އެބިލް ބޭރުކޮށް ލުމަކީ މިކަހަލަ ޙާލަތެއްގައި ޑިމޮކްރަސީއާ ވެސް ބީރަޓެހި ކަމެއްކަމަށް އޭނާ ވިދާޅުވިއެވެ. އަދި މިހަކަލަ ޙާލަތެއްގައި ދައުލަތަށް އެހީތެރިކަމެއް ފޯރިކޮށްދިނުމަށް އިދިކޮޅުގެ ޙިއްސާއެއް މަޖިލީސް މެދުވެރިކޮށް ހޯދުމަށް އުޅުމުން އެކަން ފެއިލްކޮށްލުމެއްގެ ގޮތުގައި އެކަން ދެކެވަޑައިގަންނަވާ ކަމަށް ވެސް އޭނާ ވިދާޅުވިއެވެ.
މަޖިލީހުގެ ރައީސް ވިދާޅުވީ ކޮވިޑްގެ ބަލިމަޑުކަމުގެ ހާލަތުގައި ސިއްހީ ހިދުމަތްތައް ދިނުމަށާއި ދައުލަތް ހިންގުމަށް ސަރުކާރުގައި ފައިސާ އެބަ ހުރި ކަމަށެވެ. އެހެންކަމުން ޕެންޝަން ފަންޑުގެ ފައިސާއިން ހޭދަ ކުރަން ނުޖެހޭނެ ކަމަށެވެ. މަޖިލީހުން ރުހުން ދީގެން އެމްއެމްއޭ މެދުވެރިކޮށް އިތުރު ފައިސާ ނެރެފައިވާ ކަމަށެވެ. އަދިބޭރުން ލިބޭ އެހީތަކުގެ ތެރެއިން ވެސް ސަރުކާރަށް ފައިސާ ލިބެމުންދާ ކަމަށެވެ.ޕެންޝަން ފަންޑުގައި ފައިސާ ބޭނުން ކުރުމަކީ އެމްޑީޕީގެ ސަރުކާރަކުން ތާއީދު ކުރާނެ ސިޔާސަތެއް ނޫން ކަމަށް ވެސް ވިދާޅުވިއެވެ.
"ޕެންޝަން ފަންޑުގައި އަތްލާކަށް ނުޖެހޭނެ. ގައުމެއްގެ ޕެންޝަން ފަންޑުގައި އަތްލީމަ އެ ގައުމެއްގެ މާޒީ އެކީގައި ދިޔައީ. އެމްޑީޕީގެ މެނިފެސްޓޯއެއްގެ ދަށުން ހިނގާ ސަރުކާރަކުން ޕެންޝަން ފަންޑަށް މިފަދަ ގޮތެއް ހެދުމަށް އެއްބަސްވުން އެއީ ވަރަށް ދަތިކަމަކަށް ވާނެ" މަޖިލީހުގެ ރައީސް ވިދާޅުވި އެވެ.
