ތަފާތު ބަލިތަކާއި ހިރަފުހާއި، ނޭފަތަށް ވަންނަ ޒާތްޒާތުގެ ކުނޑިން ސަލާމަތްވުމަށް އަނގައާއި ނޭފަތް މަތީގައި އަޅާ މާސްކަކީ ވަރަށް ހެޔޮ އަގުގައި ފަސޭހައިން ލިިބެން ހުރި އެއްޗެކެެެވެ. އެހެންނަމަވެސް ނޮވެލް ކޮރޯނާ ވައިރަސްެ އިން މުޅި ދުނިޔެއަށް ފަތުރާލި ކޮވިޑް- 19 ގެ ބަލިމަޑުކަމާއެކު މާސްކް މިވަނީ އެންމެންވެސް އެންމެ ބޭނުންވާ އެކައްޗަށް ވެފައެވެ. ޚާއްޞަކޮށް މި ބަލި އެންމެ ބޮޑަށް ފެތުރެމުންދާ އެމެރިކާއާއި ޔޫރަޕްގެ ގައުމުތަކުގައެވެ.
މާސްކްގެ ބޭނުން ބޮޑުވެ އެބަޔަކު އަތުޖެހުނު އެއްޗެއް ހިފަހައްޓައި އަނެއް ބަޔަކަށް ނުދީ ހިފަހައްޓާ ހިސާބަށް ހުޅަނގުގެ ގައުމުތައް މިވަނީ މިކަމުގައި ގޮތް ހުސްވެފައެވެ.
ކޮވިޑް- 19 އިން ރައްކާތެރިވުމަށް ޖަރުމަނުން ގަނެފައިވާ 2 ލައްކަ މާސްކް ނުދީ އެމެރިކާއިން ހިފަހައްޓާފައިވާ ކަަމަށް ޖަރުމަނުން އިއްޔެ ވަނީ ބުނެފައެވެ.
"އެެމެރިކާ މިވަނީ ޖަރުމަނުން ގަނެފައިވާ އެެފްއެފްޕީ-2 ގެ 2 ލައްކަ މާސްގެ މައްޗަށް ތައިލޭންޑުގެ ވެރިރަށް ބެންކޮކުގައި އަތްގަދަކޮށްފައި." ވެރިރަށް ބާލިންގެ އިންޓާނަލް އެފެއާޒް ސެނެޓަރ އެންޑްރިޔާސް ގޭސެލް ވިދާޅުވިއެވެ. އޭނާ ވަނީ އެމެރިކާއިން ބައިނަލްއަގުވާމީ ގާނޫނަށް އިހުތިރާމު ކުރުމަށް ގޮވައިލުމަށް ޖަރުމަނުގެ ސަރުކާރުން އެދިވަޑައިގެންފައެެވެ.
"ބައިވެރިންނާއެކު މި ބީދައިން މުއާމަލާތްކުރުމަކީ ކޮށްގެންވާނެކަމެއް ނޫން. ބައިނަލްއަގްވާމީ ކާރިސާއެެއްގެ ތެރޭގައި ނަމަވެސް ވަހުޝީ ގޮތްތަކަށް އަމަލުކޮށްގެން ނުވާނެ." ގޭސެލް ވިދާޅުވިއެވެ.
އަނެއްކޮޅުން، ސިއްހީ އާލާތްތައް އުފައްދާ ސްވިސް ކުންފުންޏަކުން ފާއިތުވި ހަފުތާގައި ބުނެފައިވާ ގޮތުގައި އިޓަލީއާއި ސްޕޭންގެ އޯޑަރަށް އެކުންފުނިން ފޮނުވި އެތައް މިލިއަން މާސްކާއި އަންގި ފްރާންސުން ނަގާފައެވެ. އެ ކުންފުނިން ޝާއިއުކުރި ބަޔާނެއްގައި ބުނެފައި ވަނީ މިއީ "ވަރަށް ކަންބޮޑުވާންޖެހޭ، އެކަށީގެންނުވާ އަަމަލެއް" ކަމުގައެވެ. ފްރާންސްގެ މިއަމަލަށް ފަހު އެ ކުންފުނިން މިހާރު ނިންމާފައި ވަނީ މާސްކާއި އަންގި ބެލްޖިއަމް މަގުން ސްޕޭންއާއި އިޓަލީއަށް ފޮނުވާށެވެ.
އެހެންބަޔަކު މާސްކަށް އަތްގަދަކުރި ކަމުގެ ޝަކުވާ ޖަރުމަނުން ކުރާއިރު، ޖަރުމަނުންވެސް އެފަދައިން އަމަލުކުރި ކަމުގެ ޝަކުވާ ޔޫރަޕުގެ އެހެން ބައެއް ގައުމުތަކުން ދަނީ ކުރަމުންނެވެ.
ފާއިތު މާރިޗު މަސް ނިމެމުން ދަނިކޮށް ސްވިޒަލޭންޑުން ގަނެފައިވާ 2 ލައްކަ 40 ހާސް މާސްކް ޖަރުމަނުން ނުދީ ހިފަހައްޓާފައިވާތީ، ސުވިޒަލޭންޑުން ވަނީ ޝަކުވާކޮށްފައެވެ. އަނެކޮޅުން، އޮސްްޓްރިޔާއިން ވެސް ބުނެފައި ވަނީ އެގައުމުގެ ބޭނުމަށް އުފެއްދި ގިނަ އަދަދެއްގެ މާސްކްގެ މައްޗަށް ޖަރުމަނުން އަތްގަަދަކޮށްފައިވާ ކަމުގައެވެ.
"އޮސްޓްރިޔާގެ ބޭނުމަށް އުފެއްދި އެއްޗެއް ޖަރުމަނުގައި ރައްކާކޮށްފައި ހުރީތީ، އެ ހިފެހެއްޓުމުގެ ހައްގެއް ޖަރުމަނަށް ނޯންނާނެ." ވިއެނާގައި ނޫސްވަރިންނާ ވާހަަކަފުޅުދައްކަވަމުން އޮސްްޓްރިޔާގެ އިކޮނޮމިކް މިނިސްޓަރ މާގްރެޓް ޝްރޭމްބޮކް ވިދާޅުވިއެވެ.
ޗެކް ރިޕަބްލިކުން ވެސް ވަނީ މި ބީދައިން އަަމަލުކޮށްފައެވެ. ފާއިތުވި މާރިޗު މަހުގެ ތެރޭގައި ޗައިނާއިން އިޓަލީއަށް ހަދިޔާކުރި އިިޓަލީއަށް ގެންދިޔަ މަގުމަތީގައި ޗެކް ރިޕަބްލިކުން އަތުލާފައެވެ.
ކޮވިޑް- 19 ގެ ބަލިމަޑުކަން މުޅި ދުނިޔޭގައި ވަކި ހިއްޕަމުން ދާއިރު، މި ބަލީގެ އަސަރު އެެންމެ ބޮޑަށް ކޮށްފައިވަނީ ކުރިއަރާފައިވަ ހުޅަނގުގެ ގައުމުތަކަށެވެ. ބައްޔާ ހަނގުރާމަކުރާނެ ވަސީލަތްތައް މަދުވެ ގޮތްހުސްވަމުންނެވެ.
