ކުއްޖެއްގެ ކިބައިން ތަފާތު ކަމެއް ފެންނަ ހިނދު ނުވަތަ ވަކި ކުއްޖަކާ އެއްގޮތް ކަންތައްތަކެއް ފާހަގަކުރެވުމުން އެކުއްޖާއަކީ އޯޓިސްޓިކް ކުއްޖެއް ކަމަށް އަމިއްލައަށް ނުނިންމެވުމަށް ޖެންޑަރ މިނިސްޓަރ ޢާއިޝަތު މުޙައްމަދު ދީދީ އެދިވަޑައިގެންފިއެވެ. މިނިސްޓަރ މިހެން ވިދާޅުވީ އޯޓިޒަމާ މެދު މީހުން ހޭލުންތެރިކުރުމުގެ ގޮތުން ދުނިޔޭގެ ފެންވަރުގައި ފާހަގަކުރާ ދުވަހާ ގުޅޭގޮތުން އާފަތިހާ ވާހަކަފުޅު ދައްކަވަމުންނެވެ. ބަލި ޑައިގްނޯޒްކޮށް ގޮތް ނިންމަވާނީ ޑޮކްޓަރުންނާއި އެކަމުގެ މާހިރުންކަމުގައި މިނިސްޓަރ ވިދާޅުވިއެވެ. އެއްވެސް މައްސަލައެއް ނެތް މީހުންވެސް އެކަކު އަނެކަކާއި ތަފާތު ކަމަށާއި އެކި މީހުންނަށް ކުރެވޭނީ އެކި ކަންކަން ކަމަށާއި އެހެން ކަމުން ކުދީން ލޭބަލް ނުކުރުމަށް މިނިސްޓަރ އެދިވަޑައިގަތެވެ.
އޯޓިޒަމް އޭ ބުނީމާ އެއީ އިދިކީލި ސިފައެއް ކަމަށް ނުވިސްނެވުމަށް ވަރަށް ބޮޑަށް އެދިވަޑައިގަންނަވާ ކަމަށް ވިދާޅުވިއެވެ. އަދި އާދަޔާ ޚިލާފު، ޖީނިއަސް، ތޫނުފިލި ކުދީންވެސް އޯޓިޒަމް ސްޕެކްޓްރަމްގެ ތެރޭގައި ހިމެނިފައި އެބަތިބި ކަމަށްވެސް ވިދާޅުވިއެވެ.
"އެކުދީންނަށް ކަންކަން ފެންނަ ގޮތް ތަފާތު، އަޑު އިވޭ ގޮތް ތަފާތު، މުއާމަލާތްކުރާ ގޮތް ވެސް ތަފާތު. އޭގެ މާނައެއް ނޫން އެކުދީންގެ ވިސްނުމުގައި އުނިކަމެއް ހުރީއޭ. ވަރަށް އާދަޔާ ޚިލާފު ތޫނުފިލި ކުދީން އެބަތިބި ބޮޑުވެގެން ޖީނިއަސް މީހުންނަށް ވެފައި." މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ އޯޓިސްޓިކް ކުދީންނަކީ ތަފާތު ކުދިންކަމުން އެ ތަފާތު ބަލައިގަނެ އެ ގަދަރާއި، އިހްތިރާމާއި، ޝަރަފް އެކުދީންނަށް ދޭންވީ ކަމަށެވެ. އަދި ކޮންމެ މީހަކީ ވެސް ތަފާތު މީހެއްކަމާއި އެންމެން އެއްގޮތް ނުވާނެކަމަށެވެ. ކުދީންގެ ތަފާތު ދެނެގަނެ އެ ތަފާތު ވިސްނުމާ އެއްގޮތަށް ކިޔަވައިދެވޭ ނަމަ ވަރަށް މޮޅު ކުދީންނަށް އެކުދީން ވާނެ ކަމަށް މިނިސްޓަރ ވިދާޅުވިއެވެ.
ދުނިޔޭގެ "އޯޓިޒަމް އެވެއަރނެސް" ދުވަހުގެ ގޮތުގައި ފާހަގަކުރަނީ އޭޕްރީލް މަހުގެ ދެވަނަ ދުވަހެވެ. މި ދުވަސް ފާހަގަކުރުމުގެ މައިގަނޑު ބޭނުމަކީ އޯޓިޒަމް ކުދީންގެ ތަފާތުތައް ދެނެގަނެ އެކުދީންގެ ހައްގުތައް ފާހަގަކުރުމެވެ. މިއަހަރުގެ މި ދުވަސް ފާހަގަކުރާއިރު މުޅި ދުނިޔެ މިއޮތީ ބޮޑު ބަލިމަޑުކަމެއްގެ ތެރޭގައެވެ. ކޮރޯނާ ވައިރަހުގެ އަސަރުކޮށް މުޖްތަމައަށް ކުރާ ނޭދެވޭ އަސަރުތަކުގެ ސަބަބުން އެންމެ ބޮޑު ނުރައްކަލެއް އޮތް ކުދީންނަށް އޯޓިސްޓިކް ކުދީން ވަނީ ވެފައެވެ. އެއްތަނެއްގައި ބަންދުވެ، އެއްކަންތައްތަކެއް ކޮށް، އެއްގޮތަކަށް އުޅެން ޖެހުމުގެ ސަބަބުން އެކުދީންނަށް އޮތް ނުރައްކާ ވަރަށް ބޮޑެވެ.
މިފަދަ ކުދީންނަށް އެހީތެރިވުމަށް ހެދިފައި ހުރި އެހީތެރިކަމުގެ ނިޒާމުތައް ގާއިމުވެފައި ހުރީ އެތައް ދުވަހެއްގެ ބުރަ މަސައްކަތުންނެވެ. ނަމަވެސް މިގޮތަށް ގޭތެރޭގައި ބަންދުވެ މާ ގިނަ ދުވަހު ކުދީން ތިބެންޖެހިއްޖެނަމަ އޭގެ ސަބަބުން އެކުދީންގެ އެތައް ހައްގުތަކެއް ގެއްލިގެން ހިނގައިދާނެއެވެ. ކުއްލި ނުރައްކަލުގެ ހާލަތުގައި އެޅޭ ފިޔަވަޅުތަކުން ކުދީންނަށް އެހީތެރިކަން ފޯރުކޮށްދިނުމަށްޓަކައި ގާއިމުކުރެވިފައި ހުރި ނިޒާމުތައް ރޫޅުނަ ނުދިނުމަށް މިނިސްޓްރީ އިން މަސައްކަތް ކުރައްވާނެކަމަށް މިނިސްޓަރ ވިދާޅުވިއެވެ.
