ފަންނުވެރިން ބިނާކުރުމުގެ ޕްރޮގްރާމެއް އއ. އުކުޅަހުގައި މިއަދު ފަށައިފިއެވެ.
މިއީ އިކޮނޮމިކް މިނިސްޓްރީއާއި މޯލްޑިވްސް ޕޮލިޓެކްނިކް ގުޅިގެން ކުރިއަށް ގެންދާ ޕްރޮގްރާމެކެވެ. މިއަދު ފެށީ މީގެ ފުރަތަމަ ޕްރޮގްރާމް ކަމަށް އިކޮނޮމިކް މިނިސްޓްރީން ވިދާޅުވިއެވެ.
މިއަދުގެ ޕްރޮގްރާމް ފަށައިފައިވަނީ 43 ބައިވެރީންނާއެކުގައެވެ. މި ޕްރޮގްރާމް ކުރިއަށް ގެންދާނީ 6 މަހަށެވެ. މިއީ ލެވެލް ތިނެއްގެ ގެސްޓު ހައުސްތައް މެނޭޖުކުރަން ދަސްކޮށްދޭ ކޯހެއް ކަމަށް ވެސް އިކޮނޮމިކް މިނިސްޓްރީން ވިދާޅުވިއެވެ.
މި ޕްރޮގްރާމު ހިންގުމުގެ މަގުސަދަކީ ރާއްޖޭގެ މަސައްކަތުގެ ބާޒާރަށް ދިވެހިން ނެރުމާއި އެކިއެކި ވަޒީފާތަކަށް ދިވެހިންނަށް ބޭނުންވާ ފަންނީ ތަމްރީނާއި ހުނަރުވެރިކަން ދަސްކޮށްދިނުމެވެ.
މި ޕްރޮގްރާމުގެ ދަށުން ފަތުރުވެރިކަމާއި މަސައްކަތްތެރިކާ ގުޅޭ ތަފާތު ކޯސްތައް މުސްތަގުބަލުގައި ވެސް ކުރިއަށް ގެންދާނެ ކަމަށް މިނިސްޓްރީން ވިދާޅުވިއެވެ.
