މުޖުތަމަޢުގައި ކުށެއް ނުކުރާ މީހަކަށް އަދަބު ނުދިނުމަށް ފުލުހުންގެ ކިބައިން ހޯމް މިނިސްޓަރ ޢިމްރާން ޢަބްދުﷲ އެދިވަޑައިގެންފިއެވެ. އެމަނިކުފާނު މިކަމަށް އެދިވަޑައިގެންނެވީ ފުލުހުންނަށް ޝަރަފްގެ ނިޝާނާއި ކުލަ ދިނުމަށް މިއަދު ބޭއްވި ޚާއްސަ ރަސްމިއްޔާތުގައި ވާހަކަފުޅު ދައްކަވަމުންނެވެ.
މިނިސްޓަރ ވިދާޅުވީ ރައްޔިތުންނަށް ޚިދުމަތް ދިނުމުގެ އެންމެ އިސް އެއް މުޢައްސަސާއަކީ ފުލުހުންގެ މުޢައްސަސާކަން ހުރިހާ ފުލުހުންވެސް ޤަބޫކުރައްވަންޖެހޭ ކަމަށެވެ. އަދި ރައްޔިތުންނަށް ޚިދުމަތް ދިނުމުގައި ރައްޔިތުން އުންމީދު ކުރާ މިންވަރަށް ޚިދުމަތް ދިނުމަށް ވެސް އެދިވަޑައިގެންނެވިއެވެ.
ފުލުހުންގެ މުއައްސަސާގެ ތެރެއިން ކުރިއަރާދާންވާނީ ރައްޔިތުންގެ މަޞްލަހަތު އިސްކޮށް ރައްޔިތުންގެ އެދުމާ އުއްމީދުތައް އިސްކުރާ އަދި ފުލުހުންގެ މުއައްސަސާގެ އިތުބާރު ދަމަހައްޓާ ބަޔަކަށްވެސް މިނިސްޓަރ ވިދާޅުވިއެވެ.
މިނިސްޓަރ މިއަދު ވަނީ ފުލުހުންގެ ކިބައިން ޚާއްސަ ދެކަމަކަށް އެދިވަޑައިގެންފައެވެ. އެއީ ތިމާގެ އެދުމާއި މަސްލަހަތަށްވުރެ ރައްޔިތުންގެ އެދުމާއި މަސްލަހަތު އިސްކުރުމާއި، މުއައްސަސާގެ އިތުބާރު ހޯދާ ދަމަހައްޓަން މަސައްކަތްކުރުމެވެ.
" ތިމާގެ އަމިއްލަ އެދުމާ މަޞްލަހަތަށްވުރެ ރައްޔިތުންގެ އެދުމާ މަޞްލަހަތާ އުއްމީދުތައް އިސްކުރާށޭ. ދެވަނަކަމަކީ އެބައެއްގެ ސަލާމަތާއި އަމާންކަން ކަށަވަރުކުރަން އޮންނަ މުއައްސަސާއާމެދުގައި އިތުބާރު ޔަޤީންކުރުން. އާދެ އެހެންކަމުން މިމުއައްސަސާގެ ކަރާމާތާއި، މުއައްސަސާގެ ޝަރަފާއި އިއްޒަތް ދަމަހައްޓަން ތިއްބެވީ ތިޔަބޭފުޅުން. އާދެ އެހެންކަމުން އަޅުގަނޑުމެން ކޮންމެ އޮފިސަރަކީ ތިމާގެ އަމިއްލަ އެދުމާއި މަސްލަހަތު މިމުއައްސަސާގެ ކަރާމާތާއި، ޝަރަފާއި، އިއްޒަތާ ފުށުއަރާހިނދު ތިމާގެ އަމިއްލަ އެދުމާއި މަސްލަހަތު ދޫކޮށް މުއައްސަސާގެ ޝަރަފާއި ކަރާމަތާއި އިއްޒަތް ދެމެހެއްޓޭނެ ބޭފުޅަކަށްވާށޭ،" މިނިސްޓަރ ވިދާޅުވިއެވެ.
ސަރުކާރުގެ ކޮންމެ މުއައްސަސާއެއް ވެސް ހެދިބޮޑުވެގެންދާނީ ރައްޔިތުންގެ ބައިވެރިވުން އޮވެގެން ކަމަށާއި މުއައްސަސާތައް ހިނގަނީ ރައްޔިތުންގެ ބައިތުލްމާލުން، ރައްޔިތުން ކުރާ މަސައްކަތުން ދައުލަތަށް ލިބޭ އާމްދަނީން ކަމަށްވެސް މިނިސްޓަރ ވިދާޅުވިއެވެ. އެހެންކަމުން ކޮންމެ މުއައްސަސާއެއްގެ މައްޗަށް ރައްޔިތުންގެ ބައިވެރިވުމާއި، ރައްޔިތުންގެ އެއްބާރުލުމާއި، ރައްޔިތުން ބޭނުންވާ އުއްމީދު ހޯދަންޖެހޭކަމަށް އެމަނިކުފާނު ވިދާޅުވިއެވެ.
" ރައްޔިތުން މިމުއައްސާގެ ކިބައިން އެދޭ ގިނަ ކަންތައްތަކެއް އެބަހުރި. ރައްޔިތަކަށް ބޮޑުކަމެއް ދިމާވާ ކޮންމެ ހިނދަކު އެންމެ ފުރަތަމަ މުއައްސަސާތަކުގެ ތެރެއިން ހަނދާނަށް އަންނަނީ ފުލުހުންގެ މުއައްސަސާ. ކަނޑުމަތީގެ ހާދިސާއެއް ދިމާވިޔަސް، އެވަގުތު އެކަމުން ސަލާމަތްވާން ދަނީ ފުލުހުންނާ ދިމާއަށް، އަލިފާނުގެ ހާދިސާއެއް ދިމާވިޔަސް ފުލުހުންނާ ފުރަތަމަ ގުޅާނީ، އާއިލާގެ ތެރޭގައި މައްސަލައެއް ދިމާވިޔަސް ފުލުހުންނާ ފުރަތަމަ ގުޅާނީ، މުދަލަށް ގެއްލުމެއް ލިބުނަސް ފުލުހުންނާ ފުރަތަމަ ގުޅާނީ، އާދެ އެހެންކަމުން ރައްޔިތުން އުއްމީދުކުރޭ މީގެއިން ކޮންމެ ވަގުތެއްގައި ކޮންމެ ހާލަތެއްގައި އެންމެ އަވަސްކަމާއި އެންމެ ފުރިހަމަކަމާއެކު ފުލުހުންގެ މުއައްސަސާއިން ރެސްޕޮންޑްކުރުން. އަދި އެވަރަކުން ނުނިމޭ، ރައްޔިތުން އެދޭ މިންވަރަށް ރައްޔިތުން އެދޭގޮތަށް އެކަންކަމަށް ރެސްޕޮންޑްކުރުން އެއީ މިމުއައްސަސާގެ އެންމެ މުހިއްމު އެންމެބޮޑު އެއްއަމާޒު،" މިނިސްޓަރ ވިދާޅުވިއެވެ.
" ކޮންމެ ފުލުހަކުވެސް ވިސްނަންޖެހެނީ ތިމާއާ ކިހާވަރެއްގެ ޒިންމާއެއް، މަޞްޢޫލިއްޔަތެއްތޯ ހަވާލުކުރެވިފައިވަނީ. ޝަރަފާއެކުގައި މިޒިންމާ އެންމެ ހެޔޮގޮތުގައި އަދާކޮށްދެވޭނީ އަޅުގަނޑުމެންގެ މުއައްސަސާއަށް،" މިނިސްޓަރ ވިދާޅުވިއެވެ.
