ބަންގްލާދޭޝްގައި ދިރިއުޅޭ ރޮހިންޖާ ރެފިއުންޖީންގެ ތެރެއިން ބަޔަކު މިޔަންމާ އަނބުރާ ގެންދަން މިއަދު ކުރި މަސައްކަތްވެސް ކާމިޔާބު ނުވިއެވެ.
މިޔަންމާގެ ފޮރިން ސެކްރެޓަރީ މިޔިންޓް ތޫ އިސްބޭފުޅަކަށް ހުންނަވައިގެން ފާއިތުވި މަހު ރޮހިންޖާ ރެފިއުޖީ ކޭންޕުތަކަށް މިޔަންމާގެ ވަފުދެއް ޒިޔާރަތް ކުރުމަށް ފަހު ވެވުނު އެއްބަސްވުމެއްގެ ދަށުން، ރޮހިންޖާ ރެފިއުޖީންގެ ލީޑަރުންގެ ރުހުމާވެސް އެކު، 3450 ރެފިއުޖީން މި ބުރުގައި މިޔަންމާއަށް އެނބުރިދާ ގޮތަށް އޮތީ ހަމަޖެހިފައެވެ.
އެއީ ބަންގްލާދޭޝްގެ ފޮރިން މިނިސްޓްރީން މިޔަންމާއަށް ފޮނުވި ލިސްޓުގައި ހިމެނޭ 22 ހާސް މީހުންގެ ތެރެއިން މިޔަންމާ ސަރުކާރުން 'އެނބުރި ދެވިދާނެ' ކަމަށް ބުނި މީހުންނެވެ.
އެމީހުން ގެންދިއުމަށް ބަންގްލާދޭޝް ސަރުކާރުން 5 ބަހާއި 10 ޓްރަކް ފޮނުވި ނަމަވެސް އެއިން އުޅަނދަކަށް އަރާނެ މީހަކު ނުވިއެވެ.
"އަހަރުމެން ހެނދުނު 9 (ރައްޖޭ ގަޑިން ހެނދުނު 8) ޖެހީއްސުރެ އިންތިޒާރުގައި ތިބިން. އަމިއްލަ އިޚްތިޔާރުގައި ރުހިގެން އެނބުރި ދާން ބޭނުން މީހަކު ގެންދަން." ޓެކްނާފް ކޭންޕާ ހަވާލުވެގެން ހުންނެވި ބަންގްލާދޭޝްގެ އޮފިޝަލް ޚާލިދު ޙުސައިން ވިދާޅުވީއެވެ.
"އެކަކުވެސް އަދި ނާދޭ". އޭނާ ހާމަކުރެއްވިއެވެ.
ރޮހިންޖާ މުސްލިމުން ވަނީ އެ މީހުންގެ ހާލަތު ބަދަލުކުރުމަށް މިޔަންމާ ސަރުކާރުން އެއްބަސް ނުވަނީސް އެނބުރި ދިއުމަށް ދެކޮޅުހަދާފައެވެ.
"އަހަރުމެން އެނބުރި ދާނީ އަހަރުމެންނަކީ ފުރިހަމަ ރަށްވެހިންނަށް ހެދުމުން." "އެންމެ ކުޑަމިނުން ބޯހިޔާކޮށްލާނެ ތަނެއް މިތަނުގައި އަހަރުމެންނަށް ލިބޭ." އުމުރުން 35 އަހަރުގެ ފަރްހާނާ ބޭގަމް ބުންޏެވެ. އޭނާއަކީވެސް ދެ ދަރިން ބަލަމުންދާ މައެކެވެ.
ރެފިއުޖީންގެ ތެރޭގައި ގައުމަށް އެނބުރިދާން ރުހޭ ބަޔަކު ތިބިތޯ ބަލަން ބަންގްލާދޭޝް ރެފިއުޖީ ކޮމިޝަނާއި އދ. ގުޅިގެން ރެފިއުޖީންނާއި ސުވާލުކޮށްފައި ވެއެވެ.
"އެއްވެސް ރެފިއުޖީ އާއިލާއަކުން އެކަމުގެ ރުހުން އަދި އަހަރުމެންނަށް ދީފައި ނުވޭ." އދ. ގެ އޮފިޝަލަކު މިއަދު ވިދާޅުވިއެވެ.
2017 ގައި މިޔަންމާގެ ސިފައިން ރޮހިންޖާ މުސްލިމުންނާ ދެކޮޅަށް ހިންގި ލާއިންސާނީ އަމަލުތަކުގެ ސަބަބުން 7 ލައްކަ 40 ހާސް މީހުން ވަނީ މިޔަންމާ ދޫކޮށް ބަންގްލާދޭޝްއަށް ގޮސްފައެވެ. އެމީހުން ރެފިއުޖީ ކޭންޕުތަކުގައި އުޅެމުން ދާއިރު، ރޮހިންޖާ މުސްލިމުންގެ 2 ލައްކަ މީހުން އަންނަނީ ކުރިއްސުރެ ބަންގްލާދޭޝްގައި ދިރިއުޅެމުންނެވެ. ބަންގްލާދޭޝް އެއީ އެގައުމުގެ ރައްޔިތުން ނޫންކަމަށް ބުނާއިރު، މިޔަންމާއިންވެސް އެމީހުން ބަލައިގަތުމަށް ދެކޮޅު ހަދާފައެވެ.
