"މިއީ މާޔުސްކަމާއި މޮޅިވެރިކަމުގެ ކަޝްމީރު" ކަޝްމީރުގެ އިންޑިޔާ ފަޅީގެ ހާލަތު ބަޔާންކުރަމުން ކިޔަވާކުއްޖަ ކަމުގައިވާ ތަޖައްމުލް އިސްލާމް މަންނޫ ބުންޏެވެ.
މަންނޫ އަކީ ހައިދަރުއާބާދު ޔުނިވަސިޓީގައި ޕީއެޗްޑީއަށް ކިޔަވާ ދަރިވަރެކެވެ. އޭނާގެ ރަށް، ކަޝްމީރުގެ ބޮންދިޕޫރާއަށް ދިއުމަށް ފަހު އެނބުރިއައީ ބުރާސްފަތި ދުވަހުއެވެ.
"ވާދީ (ކަޝްމީރު) ގައި އޮތީ ގޮސްހުސްވުމާއި، ރުޅިވެރިކަމާއި، ކަމެއްނުކުރެވުމާއި، ބިރުވެރި ހިމޭންކަމެއް." މިއަދު ކަޝްމީރު އޮތް ހާލަތު ބަޔާންކުރަމުން އޭނާ ބުނެލިއެވެ.
މުޅި ސަރަހައްދުން މުވާސަލާތީ ގުޅުން ކަނޑާލާފައިވާތި ކަޝްމީރުގެ އެހެން ސަރަހައްދުތަކުގައި ހިނގާ ކަންކަމުގެ މައުލޫމާތު ނުލިބޭ ކަމަށް އޭނާ ބުންޏެވެ. "ފުރުސަތެއް ލިބޭ ކޮންމެ ފަހަރަކު މީހުން ދަނީ ނުކުމެ މުޒާހަރާކުރަމުންނެވެ.
ކަޝްމީރުގެ އިންޑިޔާ ފަޅީގެ ވެރިރަށް ސްރީނަގަރުގައި އިއްޔެ ހަވީރު މުޒާހަރާކުރަން ނުކުން އެތައް ހާސް ބައެއްގެގެ ގަޔަށް އިންޑިޔާގެ ސަލަމާތީ ބާރުތަކުން ވަނީ ކަރުނަ ގޭސް ޖަހާފައެވެ. އަދި އިންޒާރުގެ ގޮތުން ވައިގެ ތެރެއަށް ބަޑި ޖަހާފައި ވެސް ވެއެވެ.
"އަހަރުމެން ބޭނުންވަނީ މިނިވަންކަން." "370 ވަނަ މާއްދާ އުވާލުމަކީ ގަބޫލުކުރެވޭނޭ ކަމެއްނޫން،" ފަދަ ލިއުންތައް ހިފައިގެން މުޒާހަރާ ކުރަމުން ދިޔަ މީހުން ނުކުތީ އިއްޔެ ހިންގާފައި އޮތް ކާފިއުއަށް ބެލުމެއް ނެތިއެވެ.
"ކަޝްމީރު ވަނީ ހިސާރުކުރެވިފައި. އެއްވެސް ގޮތަކަށް މުވާސަލާތީ ޚިދުމަތުގެ ބޭނުން ނުކުރެވޭ. އަހަރުމެން މިތިބީ ފާޑެއްގެ ގޭ ބަންދެއްގަ." ހައިދަރުއާބާދު ޔުނިވަސިޓީގެ ސްޓޫޑަންޓް ޔުނިއަންގެ ރައީސުކަން ދާދި ފަހުން ކޮށްފައިވާ މަންނޫ ބުންޏެވެ.
އަނެއްކޮޅުން، އިންޑިޔާގެ ގަނޫނު އަސާސީގެ 370 ވަނަ މާއްދާ އުވާލައި، ކަޝްމީރަށް ދީފައި އޮތް ޚާއްސަ އިމްތިޔާޒު ނިގުޅައިގަތުމަށް އިންޑިޔާ ސަރުކާރުން ނިންމުމާ ގުޅިގެން، އދ. ން ކަޝްމީރާ މެދު ދެކޭ ގޮތް ބަދަލުނުވާކަމަށް އެ ޖަމްއިއްޔާއިން ބުނެފިއެވެ.
"އދ. ން އެ ސަރަހައްދާ މެދު ދެކޭ ގޮތް ބިނާވެފައި ވަނީ އދ. ގެ ޗާޓަރުގެ މައްޗަށް އަދި އެ ސަރަހައްދާ ގުޅޭގޮތުން ފާސްކޮށްފައިވާ ގަރާރުތަކުގެ މައްޗަށް." އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޝްގެ ތަރުޖަމާނު ސްޓެފެން ޑުޖާރިކް އިއްޔެ ނެރުއްވި ބަޔާނެއްގައި ވެއެވެ.
370 ވަނަ މާއްދާ އުވާލުމާއެކު އިންޑިޔާއިން ވަނީ ވަރުގަދަ ސަލާމަތީ ފިޔަވަޅުތަކެއް އަޅައި ކަޝްމީރުގެ އާއްމު ދިރިއުޅުން ހުއްޓުމަކަށް ގެނެސްފައެވެ.
ޚަބަރުތައް ބުނާ ގޮތުން، އިންޑިޔާގެ ނިންމުމާ ދެކޮޅަށް ހަރުކަށި ރައްދެއް ދިނުމުމުގެ ފުރުސަތު ކަޝްމީރުގެ ރައްޔިތުންނަށް ނުދިނުމަށްޓަކައި ސަލާމަތީ ބާރުތަކުގެ 8 ލައްކަ މީހުން ވަނި ކަޝްމީރަށް ފޮނުވާފައެވެ.
