އިބްރާހީމަކީ އާދަޔާ ޚިލާފަށް ފަލަ މީހެކެވެ. އޭނާގެ މަންމަ ބުނާ ގޮތުގައި އޭނާ ބޮޑު ވެގެން އައީ ހުރަހަށެވެ. މާނައަކީ އިސްކޮޅުން ދިގު ވުމުގެ ބަދަލުގައި ވީ ފަލައެވެ. އެހެންވީމާ އޭނާގެ އިސްކޮޅަށް ވުރެ ހަށިގަނޑުގެ ފުޅާ މިން ބޮޑެވެ.
ހެޔޮވަރުގެ ފަޓުލޫނެއް ހޯދުން އިބްރާހީމަށް އޮންނަނީ ވަރަށް ބޮޑު ކަމަކަށް ވެފައެވެ. ދިގުމިން ހެޔޮވަރިއްޔާ އުނަގަނޑަކުން ނާރާނެއެވެ. އުނަގަނޑުން އެރިއްޔާ ދިގުމިން ހެޔޮވަރެއް ނުވާނެއެވެ. އެހެންވީމާ އިބްރާހީމަކަށް ރެޑީމޭޑް ފަޓުލޫނެއް ލެވޭކަށް ނޯވެއެވެ. ހަމައެކަނި ފަޓުލޫނެއް ނޫނެވެ. ގަމީސް ވެސް އަދި އެތެރެއިން ލާ އެއްޗެތިވެސް ޖެހެނީ ފައްސާށެވެ. އިބްރާހީމަށް ހެޔޮވަރުގެ އެއްޗެތި ފަހާ ކާރުޚާނާއެއް މި ދުނިޔެއަކު ނުހުރެއެވެ.
އެއް ދުވަހަކު އިބްރާހީމަށް ލިބުނު ވަރަށް ރީތި ފަޓުލޫނު ފޮތިގަނޑެއް ހިފައިގެން ފަހާ ތަނަކަށް ފަޓުލޫނެއް ފައްސާން ހިނގައްޖެއެވެ. އެ ދުވަހަކީ އެ މީހުންނަށްވެސް އާދަޔާ ޚިލާފު ދުވަހަކަށް ވިއެވެ. އެއީ އެ ވަރުގެ މީހަކު އެ ތަނަށް ދުވަހަކުވެސް ނާންނާތީއެވެ. ފަހާ ތަނުގެ ވެރިމީހާގެ އިތުރަށް ފަހަން ތިބީ އިންޑިއާ މީހުންނެވެ. ވެރިމީހާ އަކީ ދިވެއްސެކެވެ.
އިބްރާހީމަކީ ވެރިމީހާ ދަންނަ މީހަކަށް ވުމާއެކު ފަޓުލޫނުގެ މިން ނެގީ އޭނާއެވެ. މިނަކީވެސް ޙައިރާން ވާ ފަދަ އާދަޔާ ޚިލާފު މިނެކެވެ. އުނަގަނޑުގައި ހުރި މިނަށް ވުރެ ފަޓުލޫނުގެ ދިގު މިން ކުރެވެ. ފަޓުލޫނުގެ ކަމަރު ކަރުގައި ވަށައިގެން ޖެއްސީމާ ހެޔޮވަރުކަން ނުވަތަ ނޫންކަން އެނގޭނޭ ކަމަށް ބައެއް މީހުން ބުނެއެވެ. އެހެން ދިމާވެފައިވެސް އެބަ ހުއްޓެވެ. ހަމަ ޔަޤީނުންވެސް އަޅުގަނޑަށް އެހެން ދިމާ ވެއެވެ. މިހެން ދަންނަވާ އިރު އަޅުގަނޑަކީވެސް އިބްރާހީމް ފަދަ އާދަޔާ ޚިލާފު މީހެއްކަން ހަނދާނެއް ނުނެތެއެވެ. އަޅުގަނޑުމެން ދެ މީހުން އެއް ތަނަކުން ފެނުނު މީހަކު ޙައިރާން ވާނެއެވެ. އަޅުގަނޑުގެ ވާހަކަ މި ވަރުން ފުއްދައިލައިފައި އިބްރާހީމްގެ ފަޓުލޫނުގެ ވާހަކަ ކުރިއަށް ގެންދާނަމެވެ.
އިބްރާހީމްގެ ފަޓުލޫނު ފަހައި ނިމޭނޭ ކަމަށް ފިހާރައިގެ ވެރިމީހާ ބުނީ އެއް ހަފްތާ ފަހުންނެވެ.
އޭގެ އެއް ހަފްތާ ފަހުން އިބްރާހީމް އައި އިރު ފަޓުލޫނު އޮތީ ފަހައި ނިމިފައެވެ. އަގު ދީފައި އަވަހަށް ހިފައިގެން ގެއަށް ހިނގައްޖެއެވެ. އޭގެ އަނެއް ދުވަހަކީ ޢީދު ދުވަސް ކަމަށް ވާތީ އިބްރާހީމް ގަސްތު ކުރީ ޢީދު ނަމާދަށް ދާން އައު ފަޓުލޫނު ލާށެވެ.
ޢީދު ދުވަހުގެ ހެނދުނު ތެދުވެ ފެން ވަރައި ނަލަ ވެގެން ފަޓުލޫނު ލާން އުޅެ އުޅެ އުނގަނޑުން އަރާ ގޮތެއް ނުވިއެވެ. އިބްރާހީމްގެ ގާތަށް އައީކީ އަމަށަކު ރުޅިއެއް ނޫނެވެ. ބުނި އަގު ދީފައި ފެއްސީމާވެސް ފަޓުލޫނު މި އޮތީ ކުރުކޮށް ފަހައިފައެވެ. އެކަމަކު ކުރީ ދުވަހު ހެޔޮވަރުތޯ ނުބެލުނުކަން އެއީ އޭނާއަށް ވެސް އެޅުނު ޅަ އެއްޗެއްކަން ވިސްނުނީމާ ރުޅިގަނޑު ކުޑަކޮށް މައިތިރި ވެއްޖެއެވެ.
އަވަސް އަވަހަށް އެހެން ފަޓުލޫނެއް ލައިގެން އެ ފަޓުލޫނު ކޮތަޅަކަށް ލައިގެން ދިޔައީ ފަހާ ތަނަށެވެ. ޢީދު ދުވަސް ކަމަށް ވާތީ އެ މީހުން ވަރަށް ހެނދުނު އެތަން ހުޅުވައިފިއެވެ. ނަސީބު ރަނގަޅު ކަމުން ފިހާރައިގެ ވެރިމީހާވެސް ހުއްޓެވެ. އިބްރާހީމް ގޮސް ވެގެން އުޅޭ ގޮތް ކިޔައި ދިނީމާ އޭނާ ބުންޏެވެ.
"އަހަރެންގެ މަސައްކަތް ތަންކޮޅެއް ބުރަ ކަމުން ތިޔަ ފަޓުލޫނު ފެއްސީ ބާބޫ ލައްވައެވެ. ބާބޫ އަކީ އިންޑިއާ މީހެކެވެ."
ބާބޫ ގެނެސްގެން އޮޅުން ފިލުވީމާ ވެގެން އުޅޭ ގޮތް އެނގިއްޖެއެވެ. ޙަޤީޤަތުގައި އެ ފަކީރުގެ ވެސް ކުށެއް ނެތެވެ. އޭނާ މިން ޖަހާފައި އޮތް ކަރުދާސްގަނޑަށް ބަލައިލި އިރު އުނަގަނޑުގެ މިނަށް ވުރެ ފަޓުލޫނުގެ ދިގު މިން މާ ކުރެވެ. އެހެންވީމާ އޭނާ ހީކުރީ އެއީ އޮޅިގެން ޖެހިފައި އޮތް މިނެއް ކަމަށެވެ. އެހެންވީމާ ދިގު މިން އުނގަނޑުގެ މިނަށް ބަދަލު ކޮށްލައިގެން ފެހީއެވެ.
