އިންޑޮނޭޝިޔާގައި ފާއިތުވި އެޕްރީލްމަހު 17 ވަނަ ދުވަހު ބޭއްވި ރިޔާސީ އިންތިޚާބު މިހާރުގެ ރައީސު ޖޯކޯ ވިދޯދޯ ކާމިޔާބުކުރެއްވިކަން އިއްޔެ އިއުލާންކުރުމާ ގުޅިގެން މެދުތެރޭ ޖަކާޓާގައި ގިނަ ބަޔަކު މުޒާހަރާއަށް ނުކުމެއްޖެއެވެ.
އިންތިޚާބުގައި ބަލިވެވަޑައިގަތް ކެންޑިޑޭޓު ޕްރަބޯވޯ ސުބިއަންޓޯގެ ކެމްޕޭން ޓީމުން މުޒާހާރާ އަށް ހިތްވަރުދީފައި ނުވެއެވެ. އޭނާ ނެރުއްވި ބަޔާނެއްގައި ވިދާޅުވެފައި ވަނީ އިންތިޚާބުގެ ނަތީޖާއާ މެދު އުފެދިފައިވާ ދެބަސްވުން ހައްލުކުރައްވަން އޭނާ ބޭނުންފުޅުވަނީ ގާނޫނީގޮތުން ކަމުގައެވެ.
އެހެންނަމަވެސް، އޭނާއަށް ތާއީދުކުރާ އެތައް ހާސް ބަޔަކު ވަނީ ރޭ މެދުތެރޭ ޖަކާޓާގެ މަގުތަކަށް ނުކުމެ މުޒާހަރާކޮށްފައެވެ. އަދި މުޒާހަރާ ހަމަނުޖެހެމަކަށް ބަދަލުވެ އިމާރާތްތަކާއި، އެއްގަމު އުޅަނދުތަކުގައި ރޯކޮށް، ފުލުހުންގެ ގަޔަށް ގަލާއި، ޕެޓްރޯލް ބޮން އުކާފައި ވެއެވެ.
އިންޑޮނޭޝިޔާގެ ނޭޝަނަލް ޕޮލިސްގެ ތަރުޖަމާނު ޑެޑީ ޕްރަސެޓްޔޯ ބުނެފައިވަނީ، ރޭގެ ވަގުތެއްގައި މުޒާހަރާ ހަމަނުޖެހުމަކަށް ބަދަލުވެ، ބުދަދުވަހުގެ (މިއަދުގެ) ފަތިސްދަމާ ހަމައަށް ހަމަނުޖެހުން ކުރިއަށް ގޮސްފައިވާ ކަމުގައެވެ.
މެންދަމަށް ފަހުވެސް އިލެކްޝަން މޮނިޓަރިންގ އޮފީސް (ބަވަސްލޫ) ކުރިމަތީގައި މުޒާހަރާކުރަން ތިބި މީހުން ދުރަށް ނުޖެހުމުން ފުލުހުން ވަނީ ކަރުނަ ގޭސް ބޭނުންކޮށްފައެވެ. ޖަކާޓާ ޕޯސްޓް ނޫހުން މިއަދު ހެނދުނު ބުނެފައިވާ ގޮތުގައި މިއަދު ހެނދުނުވެސް މުޒާހަރާކުރާ ބައެއް މީހުން ބަވަސްލޫ ކުރިމަތިން ދުރަށް ނުގޮސް އެބަތިއްބެވެ.
ފުލުހުންގެ ތަރުޖަމާނު ބުނީ ޖަކާޓާގައި ސަލާމަތީ ބާރުތަކުގެ 50 ހާސް މީހުން ހަރަކާތްތެރިވަމުން ދާކަމުގައެވެ.
އެނެއްކޮޅުން، އިންޑޮނޭޝިޔާގެ ކޯޑިނޭޓިންގ މިނިސްޓަރ ފޯ ޕޮލިޓިކްސް، ލޯ އެންޑް ސެކިއުރިޓީ ވިރާންޓޯ ވިދާޅުވީ ގައުމަށް ޣައްދާރުވުމާއި، ވަގަށް ހަތިޔާރު އެތެރުކުރުމުގެ ކުށުގައި އާމީ ސްޕެޝަން ފޯސަސްގެ ކުރީގެ ކޮމާންޑަރެއް ކަމުގައިވާ މޭޖާ ޖެނެރަލް (ރިޓާޔަޑް) ސުނާރްކޯ ހައްޔަރުކޮށްފައިވާ ކަމުގައެވެ. އޭނާއަކީ އިދިކޮޅު ކެންޑިޑޭޓު ޕްރަބޯވޯއަށް ތާއީދުކުރައްވާ ބޭފުޅެކެވެ.
ސުނާރްކޯ ހައްޔަރުކުރުމާ ސިޔާސީ ހަމަނުޖެހުމާ އެއްވެސް ގުޅުމެއް ނެތް ކަމަށް މިނިސްޓަރު ވިދާޅުވިނަމަވެސް، ގިނަ ބަޔަކު ގަބޫލުކުރާ ގޮތުގައި އެއީ ޕްރަބޯވޯއަށް ސިޔާސީ ގޮތުން ފިއްތުމަށް ކޮށްފައިވާ ކަމެކެވެ.
ޖަކާޓާގައި ހަމަނުޖެން ބޮޑުވުމާ ގުޅިގެން އިނގިރޭސިވިލާތާ، އޮސްޓްރޭލިޔާ ފަދަ ބައެއް ގައުމުތަކުން ވަނީ ޖަކާޓާއަށް ދަތުރުކުރުމުގައި ސަމާލުވުމަށް އަންގައި ޓްރެވެލް އެޑްވައިޒަރީ ނެރެފައެވެ.
