ހުޅަނގުގެ ގައުމެއްގައި މުސްލިމުންގެ ތަނަކަށް ދިން އެންމެ ނުރައްކާތެރި ހަމަލާގައި، ކެނެޑާގެ ކުއެބެކް ސިޓީ މިސްކިތަށް ބަޑިން ހަމަލާދިން 29 އަހަރުގެ މީހާ އުމުރަށް ޖަލަށްލާން އިއްޔެ ހުކުމްކޮށްފިއެވެ. އެލެގްޒެންޑާ ބިސޮނެޓަށް ކަފާލާތުގެ ދަށުން މިނިވަންވުމަށް އެދެވޭނީވެސް 40 އަހަރު ފަހުންނެވެ.
އޭނާއާ ދެކޮޅަށް އުފުލި ދައުވާގައި ދައުލަތުގެ ވަކީލުން އެދިފައި ވަނީ އޭނާ 29 ޖަނަވަރީ 2017 ގައި ދިން ނުރައްކާތެރި ހަމަލާއަކީ ނަފްރަތާއި، ބޯހަރުކަމުގެ ނަތީޖާއެއްގެ ގޮތުން ހިންގާފައިވާ އަމަލަކަށް ވާއިރު، އޭނާގެ ހަމަލާއިން މަރުވި ކޮންމެ މީހެއްގެ މަރަށް އޭނާއަށް 25 އަހަރުގެ ޖަލު ހުކުމެއް އިއްވުމަށެވެ. އެހެންނަމަވެސް ފަނޑިޔާރު ފްރާންސުވާ ހޫޓް ވިދާޅުވީ މީހުން މަރާފައިވާ މީހަކުވެސް 150 އަހަރަށް ޖަލަށްލާން ހުކުމްކޮށް އޭނާގެ އުމުރަށް ވުރެ ދިގު ހުކުމެއް އިއްވުން ވާނީ ކެނެޑާގެ ގާނޫނުގެ ދަށުން އަނިޔާވެރި ހުކުމަކަށް ކަމުގައެވެ.
އެލެގްޒެންޑާ ބިސޮނެޓް ވަނީ އެރޭ ކުއެބެކްގެ ސެއިންޓް-ފޯއި އަވަށުގައި ހުންނަ ކުއެބެކް އިސްލާމިކް ކަލްޗަރަލް ސެންޓަރަށް ބަޑިއެއް ހިފައިގެންވަދެ، ޢިޝާ ނަމާދަށް ފަހު މިސްކިތުގައި މަޑުކޮށްލައިގެން ތިބި 40 ފިރިހެނުންނާއި ހަތަރު ކުޑަކުދިންނަށް ބަޑިން ހަމަލާދީ، އޭގެތެރޭން 6 މީހުން މަރާލައި، 5 މީހަކު ވަރަށް ބޮޑަށް ޒަޚްމްކޮށްލާފައެވެ. މިސްކިތުގައި ތިބި މީހުންނަކީ އަލްޖީރިއާ، ގިނީ، މޮރޮކޯ އަދި ޓިއުނީޝިޔާއިން ކެނެޑާއަށް ހިޖުރަކޮށް އެގައުމުގެ ރަށްވެހިންނަށް ވެފައި ތިބިމީހުންނެވެ.
"ކަލޭ ތި ވަނީ ކަލޭގެ ގައުމުގެ ހަ މީހަކު މަރާލާފައި. އެމީހުންގެ ކުށަކަށްވީ އެމީހުން ކަލެއާ ތަފާތު ބަޔަކަށް ވުން. ކަލޭގެ ނަފުރަތާއި، ނަސްލީ ތަފާތުކުރުމުން ކަލޭ ތިވަނީ އެމީހުންނާއި، ކަލެއާއި، ކަލޭގެ މައިންބައިންބަފައިންގެ ދިރިއުޅުން ބަރުބާދުކޮށްފައި." ހުކުމް އިއްވަމުން ފަނޑިޔާރު ހޫޓް ވިދާޅުވިއެވެ.
246 ސަފުހާގެ ހުކުމް އިއްވަން ހަ ގަޑިއިރު ހޭދަވިއިރުވެސް ބިސޮނެޓް އިނީ އިސްދަށަށް ޖަހައިގެން އެއްޗެއް ނުބުނެއެވެ.
