މިއަދު ހަވީރު މއ. ސެމީޑީލް ގޭގައި ރޯވި އަލިފާން ނިއްވައިލެއްވިއްޖެ ކަމަށް އެމްއެންޑީއެފުން ވިދާޅުވެއްޖެއެވެ.
އެމްއެންޑީއެފްގެ ތަރުޖަމާނު ކެޕްޓަން އިބްރާހީމް ޢާޒިމް ވިދާޅުވީ 10 ބުރީގެ އެ ގޭގައި ރޯވި އަލިފާން ނިއްވާލުމަށްފަހު މިހާރުދަނީ އިތުރަށް ބަލަންޖެހޭ ކަންކަން ބަލަމުން ކަމަށެވެ.
މިޙާދިސާގައި ރޯވެފައިވަނީ 3 ވަނަ ފަންގިފިލާގައެވެ. އެހެންނަމަވެސް އަލިފާނުގެ އަސަރު އެހެން ފަނގިފިލާތަކަށް ވެސް ކޮށްފައިވެއެވެ. އެގޮތުން އެގޭ 4 ފަންގިފިލާގައި ހުރި ގުދަނެއްގައި ވެސް ރޯވި ކަމަށް އެމްއެންޑީއެފުން ވިދާޅުވިއެވެ.
މިޙާދިސާގައި އެއްވެސް މީހަކަށް އަނިޔާއެއް ލިބިފައެއް ނުވެއެވެ. އެހެންނަމަވެސް ސަލާމާތީ ސަބަބުތަކަށްޓަކައި އެގެއިން މީހުން ހުސްކުރިއެވެ. އަދި އަލިފާން ނިއްވަން އުޅުނު ސިފައިންގެ ތެރެއިން ދެމީހަށް ދުމުގެ އަސަރުކޮށްގެން ސެނަހިޔާ ހޮސްޕިޓަލުން ވަނީ ފަރުވާ ދިނުމަށްފަހު ދޫކޮށްލައިފައެވެ.
މިހާދިސާ ހިނގަން މެދުވެރިވި ސަބަބާއި ލިބުނު ގެއްލުމުގެ މަޢުލޫމާތެއް އަދި ނުލިބެއެވެ.
