ޒިންބާބްވޭގެ ވެރިރަށް ހަރާރޭއިން އެގައުމުގެ އިރުމަތީގައި އޮންނަ ރުސާޕޭއަށް ދަތުރުކުރާ މަގުގައި ދެ ބަސް ޖެހި ހިނގި އެކްސިޑެންޓެއްގައި 47 މީހުން މަރުވެއްޖެއެވެ.
ރުސާޕޭ ކައިރީގައި ހިނގި މިއެކްސިޑެންޓުގައި ދެކޮޅުން އައި ދެބަސް ޖެހުނުވަރު ބާރުކަމުން ގިނަ ބަޔަކު ވަނީ ވަގުތުން މަރުވެފައެވެ. މަރުވި މީހުންގެ ތެރޭގައި ދެ ކުޑަކުދިންވެސް ހިމެނެއެވެ.
ފުލުހުންގެ ތަރުޖަމާނު ޕޯލް ނިޔާތީ ބުނި ގޮތުގައި އެކްސިޑެންޓް ހިނގީ ހަރާރޭއާ 156 ކިލޯމީޓަރު ދުރުން ހަރާރޭ-މުޓާރޭ ހައިވޭގައެވެ. "47 މީހުން މަރުވެފައިވާ ކަމަށް އަހަރުމެން ޔަގީންކޮށްދެން. އަހަރުމެން އަދިވެސް މިދަނީ އެކްސިޑެންޓު ހިނގަން މެދުވެރިވީ ސަބަބު ބަލަމުން." އޭނާ ބުންޏެވެ.
ޒިމްބާބުވޭ ސަރުކާރުގެ ނޫސް ހެރާލްޑް ނޫހުން ޓުވިޓާގައި ބުނެފައިވާ ގޮތުގައި އެކްސިޑެންޓުގެ ފޮޓޯތައް ޝާއިއުކުރެވޭވަރަށްވުރެ މާ ބިރުވެރިއެވެ. އެނޫހުން އިތުރަށް ބުނި ގޮތުގައި ރުސާޕޭގައި ހުރި މޯގް ފުރިގެން އެރަށުން ދަނީ މީހުން ވަޅުލުމުގެ މަސައްކަތްކުރާ އަމިއްލަ ބައެެއްގެ އެހީތެރިކަން ހޯދަމުންނެވެ.
ޒިމްބާބްވޭގެ މަގުތައް މަރާމާތުނުކޮށް ޒަމާންތަކެއް ވެފައިވާތީ ވަޅުގަނޑުތައް ހެދި، އެކަމުގެ ސަބަބުން އެކްސިޑެންޓުތައް ވަނީ އާއްމުވެފައެވެ. ނަމަވެސް، މި އެކްސިޑެންޓު ހިނގި މަގަކީ ދާދިފަހުން މަރާމާތުކޮށްފައި އޮތް މަގެކެވެ.
ޒިމްބާބްވޭއިން ޒެންބިއާއަށް ދަތުރުކުރާ ހައިވޭގައި ފާއިތުވި އަަހަރު ޖޫން މަހު ހިނގި ބަސް އެކްސިޑެންޓެއްގައި 43 މީހުން މަރުވެފައި ވެއެވެ.
މި އެކްސިޑެންޓާ ގުޅިގެން ޑެޕިއުޓީ ޓްރާންސްޕޯޓް މިނިސްޓަރު ފޯޗިއުން ޗާސީ ވިދާޅުވީ މަގުތަކުގައި މީހުން މަރުވުން މަދުކުރުމަށް ސަރުކާރުން ފިޔަވަޅު އަޅާނެ ކަމުގައެވެ.
"އެއްގޮތަކަށްވެސް ގެއްލެން ނުޖެހޭ ފުރާނަތަކެއް ގެއްލި ދިޔައީ. ހަރުކަށި ފިޔަވަޅުތަކެއް އެޅުމުގެ ކުރިން ހިނގާނެ އެންމެ ފަހު އެކްސިޑެންޓު މިއީ." އޭނާ ކުރެއްވި ޓުވީޓެއްގައި ވިދާޅުވެފައި ވެއެވެ.
މި ނުރައްކާތެރި އެކްސިޑެންޓާ ގުޅިގެން އދ. ގެ ސެކްރެޓަރީ ޖެނެރަލް އެންޓޯނިއޯ ގުޓަރޭޝް ވަނީ ހިތާމަ ފާޅުކުރައްވައި ޒިމްބާބްވޭގެ ސަރުކާރަށް ހަމްދަރުދީގެ މެސެޖެއް ފޮނުއްވާފައެވެ.
