ރޭ ފަތިހު ހިނގި ކަނޑުމަތީ އެކްސިޑެންޓެއްގައި ދޯންޏެއް އަޑިއަށް ހިނގައްޖެއެވެ. މި އެކްސިޑެންޓް ހިނގީ ބ. މާމަޑުއްވަރީން ފުރައިގެން މާލެ ދަތުރުކުރި "ރަމްކޮ" ނަމަކަށް ކިޔާ މުދާ އުފުލާ ދޯންޏަކާއި "ހޯކް" ނަމަކަށް ކިޔާ ތެޔޮ ބާޖެއް ޖެހިގެންނެވެ.
މުދާ އުފުލާ ދޯނި ވަނީ މި ޙާދިސާގައި އެއްކޮށްކަހަލަ ގޮތަކަށް އަޑިއަށް ގޮސްފައެވެ. ހާދިސާ ހިނގިއިރު ދޯނީގައި ތިން ދިވެހިންނާއި ބިދޭސީއަކު ދަތުރުކުރިއެވެ.
ސަމަރ އައިލެންޑް މޯލްޑިވްސް ރިސޯރޓް ކައިރިން ހިނގި މިހާދިސާގެ ރިޕޯރޓް އެމްއެންޑީއެފް ކޯސްޓްގާޑް މެރިޓައިމް ރެސްކިއު ކޯރޑިނޭޝަން ސެންޓަރ (އެމްއާރުސީސީ) އަށް ލިބިފައިވަނީ ރޭ ފަތިހު 4:45 އެހައިކަންހާއިރު ކަމަށް އެމްއެންޑީއެފުން ވިދާޅުވިއެވެ. ރިޕޯޓް ލިބުމާއެކު ޙާދިސާ ހިނގި ސަރަހައްދަށް އެމްއެންޑީއެފް މާލެ އޭރިއާ ކޯސްޓްގާޑުގެ ޓީމެއް ވަނީ ގޮސް އެހީތެރިވާން ފަށައިފައެވެ.
ތޭވީސް މީޓަރުގެ ދިގުމިން ހުރި އެ ދޯނި ތެޔޮ ބާޖުގައި ޖެހުމުގެ ސަބަބުން ދޯނީގެ ކޮޅު މައްޔާ ފަޅައިގެންގޮސްފައިވާ ކަމަށް އެމްއެންޑީއެފުން ވިދާޅުވެފައިވެއެވެ.
މި އެކްސިޑެންޓް ހިނގިއިރު މި ދޯނީގައިތިބި 4 މީހުންވަނީ ތެޔޮ ބާޖަށް ނަގައިފައެވެ. އޭގެ ތެރެއިން އެއްވެސް މީހަކަށް އަނިޔާއެއް ވެފައި ނުވާކަމަށް ވެސް އެމްއެންޑީއެފުން ވިދާޅުވެފައިވެއެވެ. މިހާދިސާ ހިނގަން މެދުވެރިވި ސަބަބުން ފުލުހުން ގެންދަވަނީ ތަޙުޤީޤު ކުރައްވަމުން ކަމަށް އެމްއެންޑީއެފުން ވިދާޅުވެފައިވެއެވެ.
