ފާއިތުވި އޮގަސްޓު މަހުގެ ކުރީކޮޅުން ފެށިގެން ލީބިޔާގެ ވެރިރަށް ޓްރިޕޮލީ (ޠަރާބުލުސް) ގައި ހިނގަމުންދާ ހަނގުރާމަ ހުއްޓުވުމުގައި އެހީތެރިވުމަށް، ގައުމީ އެއްބައިވަންތަކަމުގެ ސަރުކާރުގެ ރައީސު ފާއިޒު އައްސައްރާޖު ބައިނަލްއަގްވާމީ މުޖުތަމައަށް ގޮވާލައްވައިފިއެވެ.
އައްސައްރާޖު ރިޔާސަތުގައި ލީބިޔާގައި ވެރިކަންކުރާ ރިޔާސީ މަޖިލީހުން ނެރުނު ބަޔާނެއްގައި ވަނީ ބައިނަލްއަގްވާމީ މުޖްތަމައުން "ހަނގުރާމަ ހުއްޓުުވައި އާއްމުން ހިމާޔަތްކުރުމަށްޓަކައި ވަރުގަދަ އަމަލީ ފިޔަވަޅުތަކެއް އެޅުމަށާއި، އާއްމުންގެ ފުރާނައާއި މުދާ ރައްކާތިކުރުމަށް އުފުލަންޖެހޭ ތާރީޚީ މަސްއޫލިއްޔަތު އދ. ގެ ސަލާމަތީ މަޖިލީހުން އާއްމުންގެ ފުރާނައާއި މުދާ ހިމާޔަތްކުރުމަށް" ގޮވައިލާފައެވެ.
"ހާލަތު އިތުރަށް ގޯސްވެ، ބޮއްސުންލައިގެން ދިޔަ ނުދިނުމަށްޓަކައި ހުރިހާ ހަމަލާތަކެއް ހުއްޓާލުމަށް" އެބަޔާނުގައި އިތުރަށް ގޮވާލާފައި ވެއެވެ.
ގައުމީ އެއްބައިވަންތަކަމުގެ ސަރުކާރުން ހާމަކުރި ގޮތުގައި ފާއިތުވި އޮގަސްޓު މަހުން ފެށިގެން ޓްރިޕޮލީގައި ހަނގުރާމަކުރަން ފެށިފަހުން 96 މީހުން މަރުވެފައި ވެއެވެ. އަދި 444 މީހުން ޒަޚަމްވެފައިވާ އިރު، އޭގެ ތެރެއިން 306 މީހުންނަށް ލިބިފައި ވަނީ ނުރައްކާތެރި ޒަޚަމެވެ. އޮގަސްޓު މަހުގެ 26 ވަނަ ދުވަހުން ފެށިގެން 9 ދުވަހަށް ޓްރިޕޮލީގައި ހަމަލާތައް ބަދަލުކުރެވުނެވެ. އެއަށް ފަހު އދ. ގެ މެދުވެރިވުމާއު ހަމަލާތައް ވަގުތީ ގޮތުން ހުއްޓާލާފައި އޮތެވެ. އެހެންނަމަވެސް، ފާއިތުވި އަންގާރަ ދުވަހު އަނެއްކާވެސް ހަމަލާތައް ވަނީ ފެށިފައެވެ.
ހަނގުރާމައިގެ ސަބަބުން ޓްރިޕޮލީގެ ދެ އެއާޕޯޓުވެސް ބަންދުވެފައިވާތީ، މިސްރާތާގެ އެއާޕޯޓުގައި ވަނީ ދިގު ކިއު ދަމާލާފައެވެ. އެއާޕޯޓުގައި ފުރަން ގޮސް ތިބި މީހުންގެ ކިއުވަނީ އެއާޕޯޓުގައި ކާރު ޕާކުކުރާ ސަހަރައްދާ ހަމައަށް ދެމިގެން ގޮސްފައެވެ. ޓްރިޕޮލީއަށް ދަތުރުކުރާ ފްލައިޓުތައް މިސްރާތާއަށް ބަދަލުކުރުމުގެ ސަބަބުން އެރަށުގެ ކުޑަ އެއާޕޯޓު ވަނީ ތޮއްޖެހިފައެވެ.
އަނެއްކޮޅުން ލީބިޔާގެ ބާރުގަދަ ސިފައިންގެ ޖެނެރަލް ޚަލީފާ ޙަފްތަރު ވިދާޅުވެފައި ވަނީ ޓްރިޕޮލީގައި ހިނގާ ހަނގުރާމައިގައި އޭނާގެ ސިފައިންގެ އެއްވެސް ބައިވެރިވުމެއް ނެތް ކަމަށާއި، ޓްރީޕޮލީއަށް ވަދެ އެރަށް ހަމައަކަށް އެޅުމުވުމަށް އޭނާގެ ސިފައިން ވަރަށް އަވަހަށް ޓްރިޕޮލީއަށް ވަންނާނެކަމަށެވެ.
2011 ވަނަ އަހަރު ލީބިޔާގެ ޒައީމު ކާނަލް މުޢައްމަރު އަލްގައްޒާފީގެ ވެރިކަން ވައްޓާލުމަށް ފަހު ލީބިޔާގައި ވާދަވެރި ތިން ސަރުކާރެއް އޮންނަކަން ފާހަގަކޮށްލަން ޖެހެއެވެ. އެއީ ޓްރިޕޮލީގައި އޮތް ގައުމީ އެއްބައިވަންތަ ކަމުގެ ސަރުކާރާއި، ލީބިޔާގެ ޠުބްރުގްގައި ގާނޫނު ހަދާ މަޖިލީހުން ގާއިމުކޮށްފައިވާ ސަރުކާރާއި، ޓްރިޕޮލީ ގައި އޮތް ނޭޝަނަލް ސެލްވޭޝަން ސަރުކާރެވެ. މީގެ ތެރެއިން އދ. ން ގަބޫލުކުރަނީ ގައުމީ އެއްބައިވަންތަ ސަރުކާރެވެ. ޖެނެރަލް ޚަލީފާ ހަފްތަރުގެ ދަށުގައި އޮތް ލީބިޔާގެ ލަޝްކަރު ތާއީދުކުރަނީ ޠުބްރުގްގެ ސަރުކާރަށެވެ.
