ގުޅިފައިވާ އިއްތިހާދުގެ ކެމްޕޭން ނިންމާލުމަށް އައްޑޫސިޓީ ހިތަދޫގައި ރޭ ބޭއްވި ޖަލްސާގައި އިބްރާހީމް މުހައްމަދު ސާލިހަށް ތާއިދު ކުރެއްވި ހައުސިން މިނިސްޓްރީގެ ސީނިއަރ ޕޮލިސީ އެގްޒެކެޓިވް ޢަބްދުﷲ ޒިޔާދު މިއަދު އެ މަގާމުން ވަކިކުރައްވައިފި ކަމަށް ރައީސް އޮފީހުން ވިދާޅުވެއްޖެއެވެ.
ރޭ ހިތަދޫގައި ބޭއްވި ޖަލްސާގައި ވާހަކަ ދައްކަވަމުން ޒިޔާދު ވިދާޅުވީ އިއްތިހާދާ ގުޅެން ނިންމެވީ ރޭ 8:30 ގައި ކަމަށެވެ. އޭނާ ވިދާޅުވީ ކުރިއަށްއޮތް ރިޔާސީ އިންތިޚާބުގައި އޭނާގެ އާއިލާއި، ރައްޓެހި ރަހުމަތްތެރިންނާއި އައްޑޫ ރައްޔިތުން ވެސް އިބްރާހީމް މުހައްމަދު ސާލިހަށް ވޯޓު ދެއްވުމަށެވެ.
ހައުސިން މިނިސްޓްރީގެ އިސްބޭފުޅެއްގެ ހައިސިއްޔަތުން އޭނާވަނީ އައްޑުއަށް ވަޑައިގެން ސަރުކާރުގެ މަޝްރޫއުތައް ހިންގެވުމުގައި ހަރަކާތްތެރިވެ ވަޑައިގެންފައެވެ. އެގޮތަށް މަސައްކަތް ކުރެއްވުމުގައި އައްޑޫ ރައްޔިތުން ނުރުހޭ ގޮތަކަށް އެއްވެސް ކަމެއް ކުރެވިފައިވާ ކަމަށްވަނަމަ އެކަމަށް މައާފަށް އެދިވަޑައި ގަންނަވާ ކަމަށް އޭނާ ވިދާޅުވިއެވެ.
