ރައީސް ޔާމީން ވަރަށް ލޯބިފުޅުވާ ނާއިބު ރައީސަކަށް އެމަނިކުފާނު ވެގެންދާނެ ކަމަށް ޕީޕީއެމްގެ ރިޔާސީ ކެންޑިޑޭޓް ރައީސް ޔާމީންގެ ރަނިންމޭޓް ޑރ. މުހައްމަދު ޝަހީމް އަލީ ސައީދު ވިދާޅުވެއްޖެއެވެ.
ޕީޕީއެމްގެ ރިޔާސީ ޓިކެޓް ހަވާލު ކުރެއްވުމަށް ދަރުބާރުގޭގައި ބޭއްވި ޖަލްސާގައި ވާހަކަފުޅު ދައްކަވަމުން ޑރ. ޝަހީމް ވިދާޅުވީ އެމަނިކުފާނު ވެގެންދާނީ ރައީސް ޔާމީނަށް ވަރަށް ވަފާތެރި ނާއިބު ރައީސަކަށް ކަމަށެވެ.
އެމަނިކުފާނުގެ ޓީމެއް ނޯންނާނެ ކަމަށާއި އެމަނިކުފާނު ހުށަހަޅާނެ ވަޒީރުންނެއް ވެސް ނުތިބޭނެ ކަމަށާއި އެމަނިކުފާނަކީ ރައީސް ޔާމީންގެ ޓީމުގެ މެންބަރެއް ކަމަށް ވެސް ވިދާޅުވިއެވެ.
"އިއްޒަތްތެރި ރައީސް! މާތްﷲ އިރާދަކުރެއްވިއްޔާ އަޅުގަނޑު ވެގެންދާނީ ރައީސުލްޖުމްހޫރިއްޔާ ވަރަށް ލޯބިވާ ނާއިބު ރައީސަކަށް. އަޅުގަނޑު ވެގެންދާނީ ރައީސުލްޖުމްހޫރިއްޔާއަށް ވަރަށް ވަފާތެރި ނާއިބު ރައީސަކަށް. އިއްޒަތްތެރި ރައީސް! އަޅުގަނޑުގެ ޓީމެއް ނޯންނާނެ. އަޅުގަނޑު ހުށަހަޅާ ވަޒީރުންތަކެއް ވެސް ނުތިބޭނެ. އަޅުގަނޑަކީ މަނިކުފާނު ޓީމުގެ އެއް މެންބަރު. އެގޮތުގައި އަޅުގަނޑު ދެމިހުންނާނަން،" ޑރ. ޝަހީމް ވިދާޅުވިއެވެ.
ރައީސަށް ހެޔޮލަފައެއް އަރުވަންޖެހިއްޖެ ހާލަތެއްގައި ރައީސަށް އަރުވާނީ އެންމެ ހެޔޮލަފައެއް ކަމަށާއި "އެމަނިކުފާނުގެ މޭފުޅަށް ވަޒަނެއް އަރާނީ (މާތްﷲ އިރާދަ ކުރެއްވިއްޔާ" އަޅުގަނޑުގެ މޭ ފޫއަޅުވާލާފައި" ކަމަށް ވެސް ޝަހީމް ވިދާޅުވިއެވެ.
އެމަނިކުފާނު ވިދާޅުވީ ދިވެހިރާއްޖެ މިހާރު ކުރިމަތިލަމުން މިދަނީ ވަރަށް ވަރުގަދަ ފިކުރީ ހަނގުރާމައަކަށް ކަމަށެވެ. އެހަނގުރާމަ ގޮސް ހުއްޓޭ ހިސާބަކީ އިސްލާމްދީނުގެ އަސާސްތައް ރާއްޖެއިން ފޮހެލުން ކަމަށްވެސް ޝަހީމް ވިދާޅުވިއެވެ.
މިއީ އެތައް އަހަރެއްގެ ކުރިން ފެށިގެން ކުރިމަތިވަމުން އަންނަ ހަނގުރާމައެއް ކަމަށާއި ﷲގެ ހެޔޮރަހުމަތްފުޅުން ރާއްޖެ ސާލަމާތް ކޮށްދެއްވައި މިހާހިސާބަށް އާދެވިފައިވާ ކަމަށްވެސް ވިދާޅުވިއެވެ.
"ސިޔާސީ އެކިއެކި މައްސަލަތުގެ ސަބަބުން ނުތަނަވަސް ކަމުގެ ތެރެއިން ބޭރުގެ އެކިއެކި ބާރުތަކުން ޚާއްސަކޮށް އިސްލާމްދީނާ އަދަވާތްތެރި ބާރުތަކުން މިކަމުގެ ތެރެއަށްވަދެ ދިވެހިންގެ މިނިވަންކަމާއި ސިޔާދަތާއި މާތްވެގެންވާ އިސްލާމްދީނާ ކުޅެލުމަށްޓަކައި މަސައްކަތް ކުރަމުންދަނީ. މިފަދަ ވަގުތެއްގައި އިސްލާމްދީނާ އަދަވާތްތެރި ބާރުތަކަށް އެހީތެރިވެ ދިވެހިންގެ މިނިވަންކަން ނިގުޅައިގަނެ މިތަނުގައި ބަލިކަށި ސަރުކާރެއް ގާއިމްކޮށް ދިވެހިން ފަހަތަށް ޖެއްސުމަކީ އެއީ އަޅުގަނޑުމެންގެ ވަތަނަށް ވެވޭނެ ވަރަށްބޮޑު ޚިޔާނާތެއް. އެކަމުގައި އަޅުގަނޑުމެން ބައިވެރިވެގެން ނުވާނެ،" ޝަހީމް ވިދާޅުވިއެވެ. އެފަދަ ކަންކަމުގެ މިސާލު ޝަހީމް ވަނީ އިރާގާއި ތުރުކީވިލާތުން ދައްކަވައި ވާހަކަފުޅު ދައްކަވައިފިއެވެ.
ބަލަގަ ެަދީބައްވެސް ފައްސަތޭކަ ޕަސަންޓް ދިން ބެއެއް ވާހަކަ ތިބުނަނީ