އިސްރާއީލުން ހިސާރުކޮށްފައި އޮންނަތާ 12 އަހަރުވެފައިވާ ޣައްޒާ މިހާރު އޮތް އިންސާނީ ހާލަތު ރަނގަޅު ނުކުރެވި ކުރިއަށްދާނަމަ އިސްރާއީލާއި ފަލަސްޠީނާ ދެމެދު ހަނގުރާމައެއް ފެށީދާނެ ކަމުގެ އިންޒާރު އދ. ގެ ސެކްރެޓަރީ ޖެނެރަލް އެންޓޯނިޔޯ ގުޓަރޭޝް ދެއްވައިފިއެވެ.
އޭނާ މިހެން ވިދާޅުވެފައިވަނީ 23 ޑިސެންބަރު 2016 ގައި އދ. ގެ ސަލާމަތީ މަޖިލީހުން ފާސްކުރި ގަރާރު 2334 އަށް އަމަލުކުރެވިފައިވާ މިންވަރާ ބެހޭގޮތުން އޭނާ ސަލާމަތީ މަޖިލީހަށް ހުށަހެޅުއްވި ފުރަތަމަ ރިޕޯޓުގައެވެ.
އެ ގަރާރުގައި އައިސްފައިވަނީ "ހިފާފައިވާ ފަލަސްޠީނުގެ ހުރިހާ ބިމެއްގައި، އޭގެ ތެރޭގައި އިރުމަތީ ޤުދުސްވެސް ހިމެނޭހެން، ވަޒަންވެރިވެކުރުމުގެ ހުރިހާ މަސައްކަތެއް ވަގުތުން ހުއްޓާލު"މަށް ގޮވައިލާފައެވެ. އަދި "ވަޒަންވެރިކުރުމަށް ހެދޭ އަވަށްތަކަކީ އެއްވެސް ގާނޫނީ ހައިސިއްޔަތެއް ނެތް، ބައިނަލް އަގްވާމީ ގާނޫނުތަކާ ފާޅުގައި ޚިލާފު ތަންތަން" ކަމުގައެވެ.
ގުޓަރޭޝް އޭނާގެ ރިޕޯޓު ސަލާމަތީ މަޖިލީހުގެ މެންބަރުންނަށް ބައްސަވާފައިވަނީ، މެދު އިރުމަތީގެ ހާލަތު ދިރާސާކުރުމަށް ކޮންމެ މަހަކު އެއްފަހަރު ބާއްވާ ބައްދަލުވުން މިއަދުގެ ވަގުތެއްގައި ބޭއްވުމަށް މަޖިލީހުން ތައްޔާރުވަމުން ދަނިކޮށެވެ.
"30 މާރިޗު 2018 ގައި ފެށުނު އިހްތިޖާޖުތައް ހުއްޓުވުމަށް އިސްރާއީލު ސިފައިން ހަތިޔާރު ބޭނުންކުރުމުގެ ސަބަބުން މަރުވެފައިވަމީހުން ގިނަ ކަމުން ސިހިފައި" ހުންނެވި ކަމަށްވެސް އެ ރިޕޯޓުގައި އޭނާ ވިދާޅުވެފައި ވެއެވެ.
ގުޓަރޭޝް އިތުރަށް ވިދާޅުވެފައިވާ ގޮތުގައި "ހަތިޔާރު ބޭނުންކުރުމުގައި ވީ އެންމެ ބޮޑަކަށް ނަފުސު ކޮންޓުރޯލުކުރުމަކީ އިސްލާއީލުގެ މަސްއޫލިއްޔަތެކެވެ. އަދި މަރުވެދާނެ ކަމުގެ ނުވަތަ ބޮޑު އަނިޔާއެއް ލިބިދާނެކަމުގެ ނުރައްކަލެއް އޮތް ހާލަތުގައިވެސް ހަތިޔާރުގެ ބޭނުންކުރަން ޖެހޭނީ އެންމެ ފަހުގެ ކަމެއްގެ ގޮތުގައެވެ."
މި އަސްކަރީ އުދުވާންތައް މިހެން ކުރިއަށް ދާއިރު 2006 ވަނަ އަހަރު ހަމާސް އިން ފަލަސްޠީނުގެ އާއްމު އިންތިޚާބު ކާމިޔާބުކުރުމުން އިސްރާއީލުން ފެށި، އަދި ޖެހިގެން އައި އަހަރު ޣައްޒާ ހަމާސްގެ ބާރުގެ ދަށަށް އައުމުން އިސްރާއީލުން އިތުރަށް ވަރުގަދަ ކުރި ހިސާރުގެ ސަބަބުން ފަލަސްޠީނުގެ ދެ މިލިއަނެއްހާ މީހުން ޣައްޒާގައި އުޅެމުން ދަނީ ވަރަށް ނިކަމެތި ހާލުގައެވެ.
