ކުރިއަށް އޮތް ރިޔާސީ އިންތިޚާބުގައި އެމްޑީޕީގެ ރިޔާސީ ކެންޑިޑޭޓެއްގެ ގޮތުގައި ރައީސް ނަޝީދު ނެރުނީ ރާއްޖޭގެ ގާނޫނުތަކަށާއި ދުސްތޫރީ މިގަނޑުތަކަށް ގޮންޖަހާލަން ކަމަށް ހޯމް މިނިސްޓަރ އަޒުލީން އަހުމަދު ވިދާޅުވެއްޖެއެވެ.
އާފަތިހަށް މައުލޫމާތު ދެއްވަމުން މިނިސްޓަރ ވިދާޅުވީ ރައީސް ނަޝީދަކީ ހުކުމެއް ތަންފީޒު ކުރަންޖެހިފައިވާ ގައިދީއެއް ކަމަށެވެ. އެފަދަ ބޭފުޅުންނަށް އިންތިޚާބު ތަކުގައި ވާދައެއް ނުކުރެވޭނެ ކަމަށެވެ. "ޖަލުގައި ބަންދުކޮށްފައިވާ މީހުންނަށް ރިޔާސީ އިންތިޚާބުގެ އިތުރަށް އެއްވެސް އިންތިޚާބެއްގައި ކުރިމައްޗެ ނުލެވޭނެ. ޖަލުގައި ބަންދުކޮށްފައިވާ ގައިދީންނަކީ ދިވެހި ރާއްޖޭގެ ޖަލުތަކާއި ޕެރޯލްގެ ގާނޫނުގެ 62 ވަނަ މާއްދާއިން އެކަން (އިންތިޚާބު ތަކުގައި ވާދަކުރުން) މަނާކޮށްފައި އެ ހައްގު ނިގުޅައިގަނެފައިވާ ބައެއް. އެހެންވީމާ އެފަދަ ބަޔަކަށް ނުވާނެ ނޫންތޯ އެކަމެއް،" މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ މިކަންކަން މިހެންއޮތްއިރު އެމްޑީޕީން ރިޔާސީ ކެންޑިޑޭޓެއްގެ ގޮތުގައި ރަނގަޅު (ސައްހަ) ކެންޑިޑޭޓަކު ނެރޭނެ ކަމަށް އުންމީދު ކުރައްވާ ކަމަށެވެ.
ރައީސް ނަޝީދު ގައިދީއަކަށް ހުންނަވަނިކޮށް އެމަނިކުފާނު ރިޔާސީ ކެންޑިޑޭޓަކަށް އެމްޑީޕީން ނެރުނީ "ފިތުނަ އުފައްދަން ވެގެން ރާއްޖޭގެ ގާނޫނީ އަދި ދުސްތޫރީ މިންގަނޑު ތަކަށާއި އުސޫލުތަކަށް ގޮންޖަހައި އަދި ރާއްޖޭގެ ރައްޔިތުންގެ ކުރިމަތީގައި ގާނޫނަށް ގޮންޖަހަން،" މިނިސްޓަރ ވިދާޅުވިއެވެ.
އަޒުލީން ވިދާޅުވީ އެމްޑީޕީގެ ރިޔާސީ ކެންޑިޑޭޓެއްގެ ގޮތުގައި ރައީސް ނަޝީދުގެ ނަން އިލެކްޝަންސް ކޮމިޝަނަށް ހުށަހެޅިޔަސް އެ ކޮމިޝަނުން އެފަދަ ގައިދީއެއް ބަލައިގަންނާނެ ކަމަށް ގަބޫލު ނުކުރައްވާ ކަމަށެވެ. "އެމްޑީޕީއަށް ހަމައެކަނި އޮތް ގޮތަކީ ސައްހަ ކެންޑިޑޭޓަކު ނެރުން،" މިނިސްޓަރ ވިދާޅުވިއެވެ.
