ސެޕްޓެމްބަރު މަހު 23 ވަނަ ދުވަހު ރާއްޖޭގައި ބޭއްވުމަށް ހަމަޖެހިފައިވާ ރިޔާސީ އިންތިޚާބު ވެގެންދާނީ ރާއްޖޭގައި މިހާތަނަށް ބޭއްވި ރިޔާސީ އިންތިޚާބުތަކުގެ ތެރެއިން ދުނިޔެއަށް އެންމެބޮޑަށް ހުޅުވާލައިގެން ބާއްވާ އިންތިޚާބު ކަމަށް އިލެކްޝަންސް ކޮމިޝަންގެ ރައީސް އަހުމަދު ޝަރީފް އާދަމް ވިދާޅުވެއްޖެއެވެ.
ރިޔާސީ އިންތިޚާބު ބާއްވާނެ ތާރީޚު އިއުލާން ކުރެއްވުމަށް ރޭ ބޭއްވި ރަސްމިއްޔާތުގައި ވާހަކަ ދައްކަވަމުން އޭނާ ވިދާޅުވީ އިންތިޚާބު އޮބްޒާވް ކުރުމުގެ ފުރުސަތު އާންމުކޮށް ހުޅުވައިލައްވާނެ ކަމަށެވެ. އެގޮތުން ދުނިޔޭގެ 8 ގައުމެއްގެ އިންތިޚާބާ ބެހޭ މަރުކަޒު ތަކަށް ޚާއްސަ ދައުވަތު ދެއްވާނެ ކަމަށް ވިދާޅުވިއެވެ. "އޭގެ އިތުރަށް ބައިނަލްއަގުވާމީ ޖަމިއްޔާ ޖަމާތްތަކުގެ ތެރެއިން އީޔޫއަށް އަޅުގަނޑުމެން ރަސްމީކޮށް މިފަހަރު ދައުވަތުދޭނަން އިލެކްޝަން އޮބްޒާވް ކުރެއްވުމަށް. އަދި އެއާއެކީގައި އޯއައިސީއަށް މިފަހަރު އިންތިޚާބު އޮބްޒާވް ކުރުމުގެ ދައުވަތު ފޮނުވާނަން،" ޝަރީފް ވިދާޅުވިއެވެ.
އޭގެ އިތުރަށް އިންތިޚާބުތައް އޮބްޒާވް ކުރުމާއި މޮނިޓަރ ކުރުމަށް ތަފާތު ބައްރުތަކުގައި ހަރަކާތްތެރިވާ ތިން ޖަމްއިއްޔާ އަކަށް މިފަހަރުގެ ރިޔާސީ އިންތިޚާބު އޮބްޒާވް ކުރުމުގެ ފުރުސަތު ހުޅުވާލައިފައި އޮންނާނެ ކަމަށް ވިދާޅުވިއެވެ.
