މޯލްޑިވްސް އިސްލާމިކް ބޭންކް(އެމް.އައި.ބީ) ގެ ފަރާތުން ކޮންމެ ރޯދަމަހަކަށް ޚާއްޞަކޮށްގެ ބާއްވާ މިއަހަރުގެ "ރޯދަ ޕްރޮމޯޝަން" ބޮޑެތި ބަދަލުތަކާއިއެކު އިއްޔެ ފަށައިފިއެވެ.
އިއްޔެއިން ފެށިގެން މެއި 17 އަށް ކުރިއަށް ގެންދާ މިޕްރޮމޯޝަނުގައި 250،000.00 ރުފިޔާއާ ހަމައަށް ގޭތެރެއަށް ބޭނުންވާ ހިފައި ގެންގުޅޭ ސާމާނު ގަނެވޭނެއެވެ. އޭގެ އިތުރަށް ފަރުނީޗަރާއި،އިލެކްޓްރިކް ސާމާނާއި، ފޯނާއި ކޮމްޕިއުޓަރ، ޓީވީއާއި، ދޮންނަ މެޝިން ފަދަ ތަކެތިވެސް ލިބޭނެއެވެ.
އެ ޕްރޮމޯޝަނަކީ އެ ބޭންކްގެ "ކޮންސިއުމަރ ގުޑްސް ފައިނޭސިންގ ފެސިލިޓީގެ" ދަށުން ކުރިއަށް ގެންދާ ޚާއްސަ ޕްރޮމޯޝަނެކެވެ. މިއަހަރުގެ ޕްރޮމޯޝަނުގައިވަނީ މުދާ ގަނެވޭ މިންވަރު އިތުރުކޮށްދީ، ބޭންކަށް އަނބުރާ ފައިސާ ދެއްކުމަށް 3 އަހަރުގެ މުއްދަތެއް ދީފައެވެ. އެއީ އެހެން އަހަރުތަކާ އަޅާބަލާއިރު ވަރަށް ބޮޑު ބަދަލެކެވެ. ފައިސާ އަނބުރައި ދައްކަން އެހެން އަހަރުތަކުގައިދެނީ 18 މަހެވެ. އެހެން އަހަރުތަކުގައި މުދާ ނެގެނީވެސް އެއްލައްކަ ރުފިޔާ ހަމައަށެވެ.
"މި ޕްރޮމޯޝަނާއި އެކު އަޅުގަނޑުމެންގެ ކަސްޓަމަރުންނަށް ކުރިއަށް އޮތް ރޯދަ މަހަށް ގޭތެރެ އަށް ބޭނުންވާ ގިނަ އަދަދެއްގެ ސާމާނުތައް ފަސޭހަ ކަމާ އެކު ގަނެވޭނެ،" އިސްލާމިކް ބޭންކްގެ ޗީފް އޮޕަރޭޓިން އޮފިސަރ އަހުމަދު ރިޒާ ވިދާޅުވި އެވެ.
އޭނާ ވިދާޅުވީ އިސްލާމިކް ބޭންކުން ބަލައިގަނެފައިވާ ފިހާރައަކުން ހޯދަން ބޭނުންވާ ސާމާނުތަކެއްގެ އަގު އެނގޭގޮތަށް ރޯދަ ޕްރޮމޯޝަނަށް އެދޭ ފޯމާއެކު އެ ބޭންކުގެ ކޮންމެ ބްރާންޗަކަށް ހުށަހެޅުމުން ރޯދަ ޕްރޮމޯޝަނުގައި ބައިވެރިވެނެ ކަމަށެވެ. އަދި ޕްރޮމޯޝަނުގައި ބައިވެރިވުމަށް އެދޭފޯމު އެ ބޭންކުގެ ވެބްސައިޓުން ޑައުންލޯޑް ކުރެއްވޭނެއެވެ.
ރާއްޖޭގައި ގާއިމްކޮށްފައިވާ އެބޭންކުގެ ކޮންމެ ބްރާންޗަކުންވެސް މި ޕްރޮމޯޝަންގެ އެޕްލިކޭޝަން ބަލައިގަންނާނެއެވެ. އެ ބޭންކުގެ ބުރާންޗުތައް މިހާރު ހުރީ މާލޭގެ އިތުރުން، ހުޅުމާލެ، ހދ. ކުޅުދުއްފުށި، ގދ. ތިނަދޫ، ފުވައްމުލަކުގެ އިތުރުން އައްޑޫ ހިތަދޫގައެވެ.
މޯލްޑިވްސް އިސްލާމިކް ބޭންކަކީ ރާއްޖޭގައި ރިބާއާއި ނުލައި އިސްލާމީ ޝަރީއަތާއެއްގޮތްވާ ގޮތުގެމަތިން ފުރަތަމަ ޚިދުމަތް ފޯރުކޮށްދޭންފެށި ބޭންކެއެވެ.
އިސްލާމިކް ބޭންކުން ލިބޭ ޚިދުމަތްތަކުގެ ތެރޭގައި ކިޔެވުމަށް ބޭނުންވާ ފައިސާ ފޯރުކޮށް ދިނުމާއި،އެކައުންޓު ހުޅުވުމާއި،ރާއްޖެއިން ބޭރަށް ފައިސާ ފޮނުވުމުގެ ޚިދުމަތާއި ވިޔަފާރިތަކަށް ބޭނުވާ މާލީ އެހީތެރިކަމާއި ގޯތިގެދޮރު އިމާރާތް ކުރުމަށް ބޭނުވާ ހުރިހާ މާލީ އެހީތެރިކަމެއް ފޯރުކޮށް ދިނުންހިމެނެއެވެ.
