ދިވެހި ޒުވާނުންގެ ކުރިމަގު އުޖާލާކޮށް ބައްޓަންކުރުމުގެ މަޤްޞަދުގައި ސަރުކާރުން ފެށި "ދިވެހި ވަޠަނީ ޚިދުމަތް" (ނޭޝަނަލް ސަރވިސް) އަށް އެއް އަހަރު ފުރުމުގެ މުނާސަބަތުގައި، މި ޕްރޮގްރާމްގެ ތެރެއިން އަހަރަކު 1000 ޒުވާނުން ތަމްރީނުކުރުމަށް ކަނޑައެޅި ލަނޑުދަނޑި ފުރަތަމަ އަހަރުވެސް ޙާޞިލުކުރެވިފައިވާ ކަމަށް ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު މިއަދު އިޢުލާނުކުރައްވައިފިއެވެ.
މި މުނާސަބަތާ ގުޅިގެން ރައީސުލްޖުމްހޫރިއްޔާ މީސްމީޑިއާގައި ޙިއްޞާކުރެއްވި މެސެޖެއްގައި ވަނީ، ފާއިތުވި އެއް އަހަރުގެ ތެރޭގައި ތަމްރީނު ފުރިހަމަކުރި ހުރިހާ ޒުވާނުންނަށާއި އެ ކުދިންގެ ޢާއިލާތަކަށް ތަހުނިޔާ ވިދާޅުވެފައެވެ. އަދި މި ކާމިޔާބު ޙަރަކާތް ހިންގުމުގައި ޝާމިލުވި ހުރިހާ މުއައްސަސާތަކަށާއި ފަރާތްތަކަށް އެމަނިކުފާނު ވަނީ ޙައްޤު ޝުކުރު އަދާކުރައްވާފައެވެ. ރައީސުލްޖުމްހޫރިއްޔާ ވިދާޅުވީ، 01 އޮކްޓޫބަރު 2025 ގައި ފެށި މި ޚިދުމަތުގެ ފުރަތަމަ އަހަރަކީ ޒުވާނުންނަށް ވަރަށް އުފެއްދުންތެރި އަދި ކާމިޔާބު މަސައްކަތްތަކެއް ކޮށްދެވުނު ދައުރެއް ކަމަށެވެ.
ރަސްމީ މަޢުލޫމާތުތަކަށް ބަލާއިރު، މި ވޭތުވެދިޔަ އެއް އަހަރު ދުވަހުގެ ތެރޭގައި ނޭޝަނަލް ސަރވިސް އިނީޝިއޭޓިވްގެ ޓްރޭނިންގގެ ތެރެއިން 1028 ދިވެހި ޒުވާނުން ވަނީ ތަމްރީނު ފުރިހަމަކޮށްފައެވެ. މީގެއިތުރުން، ނޭޝަނަލް ސަރވިސް ސްކިލް ޓްރޭނިންގ ޕްރޮގްރާމުގެ ދަށުން 136 ޒުވާނަކު ތަމްރީނުކުރެވިފައިވާ ކަމަށްވެސް އެމަނިކުފާނުގެ މެސެޖުގައި ފާހަގަކުރެއްވިއެވެ.
ރައީސުލްޖުމްހޫރިއްޔާގެ މެސެޖުގައި އިތުރަށް ބަޔާންކުރައްވާފައިވަނީ، ދިވެހި ވަޠަނީ ޚިދުމަތުގެ ކުރިމަގު ފެންނަނީ ވަރަށް އުޖާލާކޮށް ކަމަށެވެ. އެގޮތުން ކުރިއަށް އޮތް ތަނުގައި މި ޚިދުމަތުގެ ދަށުން ފަންނީ އިތުރު ދާއިރާތައް ތަޢާރަފްކުރުމާއި، އިންޓަރންޝިޕް ޕްރޮގްރާމްތައް ފެށުމަށް ސަރުކާރުން ރާވަމުންދާ ކަމަށް ވިދާޅުވިއެވެ. އަދި މި ޕްރޮގްރާމްތައް ނިންމާ ޒުވާނުންނަށް ވަޒީފާގެ ފުރުޞަތުތައް ފަހިކޮށްދިނުމުގައި ނޭޝަނަލް ކެރިއަރ ސަރވިސްގެ ދައުރު އިތުރަށް ފުޅާކުރުމަކީވެސް ސަރުކާރުގެ މުހިންމު އަމާޒެއް ކަމުގައި ރައީސުލްޖުމްހޫރިއްޔާ ޑޮކްޓަރ މުޙައްމަދު މުޢިއްޒު ވަނީ ފާހަގަކުރައްވާފައެވެ.
