އައްޑޫ ސިޓީގެ ކަރަންޓުގެ ޚިދުމަތް ރަނގަޅު ކުރުމަށް އެ ސިޓީގައި ސެންޓްރަލް ޕަވަރ ސްޓޭޝަނެއް ޤާއިމްކޮށް ނިންމުމަށް، ދުބާއީގެ ޑެފިނިޓް ސޮލިއުޝަންސްއާ ފެނަކަ ކޯޕަރޭޝަނާ ދެމެދު އެއްބަސްވުމެއްގައި ސޮއިކޮށްފިއެވެ.
ފެނަކައިން ހާމަކުރާ ގޮތުގައި މިއީ 31 މިލިޔަން ޑޮލަރުގެ މަޝްރޫޢެކެވެ. ފެނަކައިގައި ބޭއްވި ރަސްމިއްޔާތުގައި އެ ކުންފުނީގެ ފަރާތުން ސޮއިކުރެއްވީ މެނޭޖިންގ ޑިރެކްޓަރު މުޙައްމަދު ނަޖާޙްއެވެ. ޑެފިނިޓް ސޮލިއުޝަންސްގެ ފަރާތުން ސޮއިކުރެއްވީ އެ ކުންފުނީގެ ފައުންޑަރ އަދި ސީއީއޯ އަބްދުﷲ ސައީދެވެ.
މި އެއްބަސްވުމުގެ ދަށުން ޕަވަރ ސްޓޭޝަން ފުރިހަމަކުރަން ކުރަންޖެހޭ ހުރިހާ މަސައްކަތެއްގެ އިތުރުން، އިންޖީނުތައް ބަހައްޓައި އޮޕަރޭޝަނަށް ގެނައުމުގެ މަސައްކަތްވެސް ކުރާނެއެވެ. މަޝްރޫޢު ފުރިހަމަވާއިރު 26.37 މެގަވޯޓުގެ ކަރަންޓު އުފެއްދުމުގެ ޤާބިލްކަން ހުންނާނެ ކަމަށް ފެނަކައިން ވިދާޅުވިއެވެ. ޕަވަރ ސްޓޭޝަންގައި ބެހެއްޓުމަށް ހަމަޖެހިފައިވަނީ ބެލްޖިއަމްގެ އަންގްލޯ ބެލްޖިއަން ކޯޕަރޭޝަންގެ ލޯ ސްޕީޑް ޒަމާނީ އިންޖީނުތަކެކެވެ.
ނަޖާޙު ވިދާޅުވީ މި ޕްރޮޖެކްޓް ފެށިގެންދާއިރު އަމާޒަކީ އިރާދަކުރެއްވިއްޔާ މި ފެށޭ 2027 ވަނަ އަހަރުގެ ނިޔަލަށް އައްޑޫ ސިޓީގެ ކަރަންޓުގެ މައްސަލައަށް ފުރިހަމަ ހައްލެއް ލިބިގެންދިއުން ކަމަށެވެ.
ޑެފިނިޓް ސޮލިއުޝަންސްއާ މި މަސައްކަތް ހަވާލުކުރީ، ކުރިން އެ މަސައްކަތް ހަވާލުކުރި ޗައިނާގެ ޑޮންފަންގ ކުންފުނިން އެއްބަސްވުމާ އެއްގޮތަށް މަޝްރޫޢު ކުރިއަށް ނުގެންދާތީ އެ އެއްބަސްވުން ބާތިލުކުރުމަށްފަހުއެވެ. ޑެފިނިޓް ސޮލިއުޝަންސްއަކީ ދުބާއީގެ އިތުރުން މެދުއިރުމަތީގެ ޤައުމުތަކުގައި މިފަދަ ގިނަ މަޝްރޫޢުތައް ހިންގާފައިވާ ތަޖުރިބާ ލިބިފައިވާ ކުންފުންޏެކެވެ.
