2026 ވަނަ އަހަރު، މިހައި ހަލުއި ސްޕީޑެއްގައި ދުނިޔެ ބަދަލުވެގެން ހިނގައިދާނެ ކަމަކަށް، ފަހަރެއްގައި މީހަކު ހީވެސް ނުކޮށްފާނެއެވެ. އެކަމަކު، މި ތަބުދީލުގެ ފަހަތުގައި ވަނީ، ފަސް ވަނަ ގިއަރު ޓުރަމްޕް ފަދަ މުދަލާއި، ފައިސާއަށް ފެންބޮވައިގެންފައިވާ މީހުންނާއި، ބޮޑު އިޒުރޭލުގެ ހުވަފެންދެކޭ މީހުންނާއި އަދި އެމީހުންގެ ޢުދުވާނީ ސިޔާސަތުތަކެވެ. ހަލުވިކަމާއެކު ވެއްޓެމުންދާ އެމެރިކާގެ އަމްބަރާޠޫރިއްތުން ބައިނަލްއަޤުވާމީ ހުރިހާ ޤާނޫނުތަކާއި، އިންސާނީ އަޚުލާޤީ އަގުތައް އެއްފަރާތްކޮށް، މިހާރު ގެންގުޅެނީ ފާޅުގައި ގަނާކުރުމާއި، އެހެން ޤައުމުތަކުގެ ވަސީލަތްތަކާއި، ބިންތައް ފޭރުމުގެ ސިޔާސަތެކެވެ.
އެކަމަކު، އޭގެ ކުރިން މެދުއިރުމަތީގެ ވާހަކަ ދައްކާނަމަ، މުއްތަޙިދާ ޢަރަބި ޢިމާރާތުން ވަނީ މީގެ ދެތިން އަހަރު ކުރިން ފެށިގެން އެމީހުންގެ އަމިއްލަ ހުވިއްޔަތެއް ބިނާކޮށް، ސަޢޫދީގެ ނުފޫޒާއި، އަދި ސަޢޫދީގެ ކުޑައިގެ ދަށުން މިނިވަންވެފައިވާ ބާރެއްގެ ގޮތުގައި ނުކުތުމުގެ މަސައްކަތް ފަށާފައެވެ. އެހެން ގޮތަކަށް ބުނާނަމަ، އެއީ ބާރުގަދަ ސަޢޫދީ މަރުކަޒާ ފެއަށްޖެހި، ބާރުގެ އައު މަރުކަޒެއް އުފެއްދުމުގެ މަސައްކަތެވެ. އެކަމަށްޓަކައި ޢިމާރާތުން، ދުނިޔޭގެ އިސްތިޢުމާރީ ބާރުތަކާ ގުޅިގެން، އެމީހުންގެ ސިޔާސަތުތައް، އެ ސަރަޙައްދުގައި ކުރިއެރުވުމުގެ މަސައްކަތް ފެށިއެވެ. އިޒުރޭލާ ގުޅުން ގާއިމުކޮށް، މެދުއިރުމަތީގައި އިޒުރޭލުގެ މަސްލަހަތާއި، ސިޔާސަތުތައް ފާޅުގައި ކުރިއެރުވުމުގެ ދައުރު އަދާކުރުމަށް ޢިމާރާތުން އެއްބަސްވިއެވެ. އޭގެ އަސަރުތައް ޔަމަނާއި، އެފުރިކާގައިވާ ޢިމާރާތާއި ގުޅިފައިވާ އަދި ޢިމާރާތުން މަދަދުވެރިވާ ޕްރޮކްސީތަކުގެ ފަރާތުން ފެނިގެން ގޮސްފައިވެއެވެ.
ޢިމާރާތުން، ސަޢޫދީގެ ނުފޫޒަށް ލޯމަރާލުމުގެ އިތުރުން، އިޒުރޭލުގެ ކުރީސަފުގައި ޙަރަކާތްތެރިވާ ބައިވެރިއެއްގެ ގޮތުގައި ސަޢޫދީގެ މަސްލަހަތާއި، ސަލާމަތަށް ގޮންޖަހަން ފެށިއެވެ. އެހެންގޮތަކަށް ބުނާނަމަ، ސަޢޫދީ ޢަރަބިއްޔާއާއި، މެދުއިރުމަތީގައި، އިޒުރޭލާއި އެމެރިކާއަށް ސީދާގޮތެއްގައި ނުކުރެވުނު ހުރިހާ ކަންތައްތަކެއް، ކުރުމަށް ޢިމާރާތުން ފޫގަޅައިގެން ނުކުތީއެވެ. އޭގެ ނަތީޖާއެއްގެ ގޮތުން، އިޒުރޭލާއި އެމެރިކާގެ ވާގިވެރިކަމާއެކު، ބާރުގެ އައު މަރުކަޒެއްގެ ގޮތުގައި މެދުއިރުމަތީގައި ޙަރަކާތްތެރި ވުމުގެ މަގު، ޢިމާރާތަށް ފަހިވެގެން ދިޔައެވެ.
ބިރުވެރިކަމުގެ އެ ވިލާގަނޑު ފެނި، ސަޢޫދީ ޢަރަބިއްޔާއިން ވަނީ، އޭގެ މަހެއްހައި ދުވަސްކުރިން ޕާކިސްތާނާ އެކު ދިފާޢީ އެއްބަސްވުމެއްގައި ސޮއިކޮށްފައެވެ. ބޭނުމަކީ ބޮޑުވަމުން އަންނަ، އެ ނުރައްކަލުގެ ތަވާޒުނު ހިފެހެއްޓުމަށްޓަކާ ނިއުކުލިއާ ބާރަކާއެކު އިއްތިހާދެއް ހެދުމެވެ. އެކަމަކު، އެހިސާބުންވެސް އެކަމެއް ނުހުއްޓުނެވެ. ޢިމާރާތުން ޔަމަނުގައި ތިބި، އެމީހުންގެ ޕްރޮކްސީތަކަށް ހަތިޔާރާއި، ފައިސާ ފޯރުކޮށްދީގެން، ސަޢޫދީ ޢަރަބިއްޔާ އެއްފަރާތްކޮށް، ކަނަކަށް ލުމުގެ މަސައްކަތް ފެށިއެވެ. އޭގެ ބޭނުމަކަށް އޮތީ ސަޢޫދީއަށް ޕްރެޝަރކޮށްގެން އިޒުރޭލުގެ މަސްލަޙަތުތަކާ ދެކޮޅަށް ތެދުވުން ހުއްޓުވުމެވެ.
އޭގެ ރައްދުގައި، ސަޢޫދީ ޢަރަބިއްޔާއިން ވަނީ ޢިމާރާތާއެކު އޮތް ގުޅުން އޭގެ އެންމެ ދަށު ދަރަޖައަށް ގެނައުމުގެ އިތުރުން، ޔަމަނުގައި ތިބި ޢިމާރާތުގެ ޕްރޮކްސީތަކަށް ވަރުގަދަ ރައްދު ޙަމަލާތަކެއްދީ އެމީހުންގެ ދުވަސް ދުއްވާލާފައެވެ. ސަޢޫދީއާއި ގުޅިފައިވާ މިސްރާއި، އެކުވެރި އެހެން ޤައުމުތަކާއެކު މިހާރުވެސް އެފްރިކާގައި ޢިމާރާތާއި ދެކޮޅު ޙަރަކާތްތައް ހުއްޓުމެއް ނެތި ކުރިއަށް ގެންދެވެއެވެ.
ހަމައެކަނި ޢިމާރާތް-އިޒުރޭލު ގުޅުމަށް ރައްދުދިނުމުގެ ގޮތުން ހަދާފައިވާ ޕާކް-ސަޢޫދީގެ ދިފާޢީ އެއްބަސްވުމާއި، އަދި ފަހަކަށް އައިސް ޢިމާރާތާއި ދެކޮޅަށް، ސަޢޫދީއިން ހިންގަމުންދާ ނޭއްގާނި ޢަމަލުތަކާ ގުޅިގެން، ޢިމާރާތުން ވަނީ އައު ކުޅުންތެރިއަކު ދަނޑަށް ނެރުމަށް ނިންމާފައެވެ. އެމީހުން ގަބޫލުކުރާ ގޮތުގައި، އެކަމަށް އެންމެ ލާއިޤު ކުޅުންތެރިއަކީ ޕާކް-ސަޢޫދީ އިއްތިހާދުގެ ދުޝްމަނެކެވެ. އާދެ، އެއީ އިންޑިއާއެވެ.
ޢިމާރާތުގެ ވެރިޔާ، ދާދި ފަހުން އިންޑިއާއަށް ކުރި ދަތުރުގައި ދިފާޢީގޮތުން އެއްބާރުލުން ދިނުމުގެ އެއްބަސްވުމެއްގައި އިންޑިއާއެކު ސޮއިކުރިއެވެ. އެ އެއްބަސްވުމަކީ ހަމައެކަނި އިންޑިއާއާއި، ޢިމާރާތާ ދެމެދު ކުރެވުނު އެއްބަސްވުމެއް ނޫން ކަމުން، އެއީ ފުޅާ ދާއިރާއެއްގައި ފާރަވެރިވާން ޖެހޭ އެއްބަސްވުމެކެވެ.
އެމެރިކާއަކީ، ސަޢޫދީ ޢަރަބިއްޔާގެ ދިފާޢީ މަދަދުޤާރު ކަމުގައިވިޔަސް، އެމެރިކާއިން އަބަދުވެސް އިޒުރޭލުގެ މަސްލަހަތަށް އިސްކަންދޭނެއެވެ. އެހެންކަމުން، ޢިމާރާތާއި، ސަޢޫދީއާ ދެމެދު ހިނގަމުންދާ ކޯޅުންތަކުގައި އެމެރިކާއިން ބުރަވަނީ ޢިމާރާތުގެ ކޮޅަށެވެ. މިތަނުގައިވެސް، ސީދާގޮތެއްގައި ކުރިއަށް ނުކުތުމުގެ ބަދަލުގައި، އެމެރިކާއިން އެހީތެރިވާނީ އިންޑިއާ-ޢިމާރާތް އިއްތިޙާދަށެވެ. އޭގެ އިތުރުން، އެ އިއްތިޙާދު ހަރުދަނާ ކުރުމުގެ މަސައްކަތް އެކި ގޮތްގޮތުން އެމެރިކާއިން ކުރާނެއެވެ.
ފަހުގެ މި ކުރިއެރުންތަކުގެ ސަބަބުން، އިތުރު ދެތިން ކުޅުންތެރިއަކުވެސް ވަނީ ކުޅެން ނުކުމެފައެވެ. ޚާއްސަކޮށް ތުރުކިޔޭއިން ޕާކް-ސަޢޫދީ އިއްތިޙާދާ ގުޅޭނެއެވެ. ސަބަބަކީ މެދުއިރުމަތީގައި، ޢިމާރާތާއި، އިޒުރޭލުގެ ނުފޫޒު ބޮޑުވަމުން ދިއުމަށް ތުރުކިޔޭއަކުން ބޭނުމެއް ނުވާނެއެވެ. ވަރަށް އަވަހަށް ޤަތަރާއި އެހެން މަދު ޤައުމުތަކެއްވެސް، އެ އިއްތިޙާދާއި ގުޅި، މެދުއިރުމަތި އިތުރަށް ބައިބައިވެ، އާ ގޮތަކަށް ބައްޓަން ވެގެން ދާނެއެވެ.
އަހުރެމެން މިހާރު ދުރު ހުޅަނގަށް ބަލައިފިނަމަ، ފެތެމުންދާ އެމެރިކާގެ ސާމުރާޖީ އަމްބަރާޠޫރިއްޔަތު ސަލާމަތްކުރުމަށް ވިލާތުގެ ޤައުމުތަކުން ކުރި މަސައްކަތުން، އެމީހުން މިއަދު އެތިބީ އަމިއްލައަށް އެކަކު އަނެކަކާ ދެކޮޅަށް ނަގޫ ގޮށްޖެހިފައެވެ. އާޚިރުގައި، ވިލާތުގެ ޤައުމުތަކުން އެމެރިކާއޭ ކިޔުނު ދައްޖާލުގެ ކިބައިން ސަލާމަތްވުމަށްޓަކައި ހަނގުރާމަކުރާތަން ފެނުމަކީވެސް ދުރުގައިވާ ކަމެއް ނޫނެވެ.
އެމެރިކާގެ ސާމުރާޖިއްޔަތު ފުޅާކުރުމުގެ ނުރައްކާ ކުރިމަތިވުމުން، ކެނެޑާގެ ބޮޑުވަޒީރު ޗައިނާއަށް ތާރީޚީ ދަތުރެއްކޮށް، ހައިރާން ކުރުވަނިވި ގޮތަކަށް ކެނެޑާގެ ވިޔަފާރިތައް ޗައިނާއަށް މުޅިން ހުޅުވައިލިކަން އިޢުލާން ކުރިއެވެ. އޭގެ އިތުރުން ޗައިނާއިންވެސް ކެނެޑާއާ މެދު ދެކެނީ މެދުކެނޑިފައިވާ ވެނެޒުއެލާގެ ތެލުގެ ބަދަލެއްގެ ގޮތުގައެވެ.
އަނެއްކޮޅުން ޓްރަމްޕް ފަދަ ފާޝިސްތީ ޝަޚުޞިއްޔަތަކު ވިލާތުގެ ޤައުމުތަކާއި، އެ ޤައުމުތަކުގެ އިސްވާރުންނަށް މެދުނުކެނޑި ގަނާކޮށް، ނިކަމެތި ކުރުމުގެ ސަބަބުން، ވިލާތުން މިހާރު ވަނީ ޢަމަލީ ގޮތުން އެކަމާ ދެކޮޅަށް ތެދުވާން ފަށާފައެވެ. ސްކެންޑިނޭވިއާގެ ޤައުމުތަކުން ވަނީ ގްރީންލޭންޑްގެ މައްސަލައިގައި އެމެރިކާއާ ދެކޮޅަށް މާކުރިން ނުކުމެފައެވެ. އިނގިރޭސި ބޮޑުވަޒީރުވެސް ދެކޮޅުވެރިކަމުގެ އިޝާރާތެއް ކުރިއިރު، ވިލާތުގެ ނިސްބަތުން އެންމެ ބާރުގަދަ ޤައުމު ކަމަށްވާ ފުރާންސުން ވަނީ ދެކޮޅުވެރިކަމުގެ ސިޔާސަތެއް ފާޅުގައި އިޢުލާން ކޮށްފައެވެ. ދާދި ފަހުން ފުރާންސުގެ ބޮޑުވަޒީރު އިމަނުއެލް މެކްރޯން ދިން ތަޤުރީރެއްގައި ވިލާތުގައި ވުނަކުރުމަށް ޗައިނާއަށް ވަނީ ފާޅުގައި ދަޢުވަތު ދީފައެވެ.
އަހުރެމެން ހަނދާން ބަހައްޓަންޖެހޭ ނުގުތާއަކީ، ދެކުނުގެ ސަރަޙައްދުން އޮސްޓްރޭލިއާ ފަދަ ބާރުތަކުންވެސް މިހާރު ދަނީ އެމެރިކާގެ މަސްލަހަތާއި، ޗައިނާއާ ދެކޮޅު އިއްތިހާދާއި ދުރަށެވެ. އޮސްޓްރޭލިޔާއިން ބުނެފައިވާ ގޮތުގައި، އެ ޤައުމުގެ އިޤުތިޞާދު ޗައިނާއާ ގުޅިފައިވާތީ، ޗައިނާއާ ދެކޮޅަށް ތެދުވާކަށް އޮސްޓްރޭލިއާ ބޭނުމެއް ނުވެއެވެ.
މިހާރުގެ ޙާލަތަށް ނަޒަރުކުރާއިރު، ނޭޓޯ ރޫޅިގެން ދިއުމަކީވެސް ވެދާނެ ކަމެކެވެ. އަދި، ވިލާތުގެ ޤައުމުތަކުން ދިފާޢީ އާ އެއްބަސްވުމަކާ ދިމާއަށް ދިއުމަކީވެސް އެކަށީގެންވާ ކަމެކެވެ. މެދުއިރުމަތި މިހާރުވެސް ބައިބައިވެފައިވާއިރު، ވަރަށް އަވަހަށް އެތަނަށް ސިޔާސީގޮތުން ބޮޑު ބިންހެލުމެއް އަންނާނެ ކަމަށް ބެލެވެއެވެ. އަދި، އޭގެ އަސަރުތަކުގެ ސަބަބުން ވިލާތުގެ ޤައުމުތަކަށް، އެމެރިކާއާ ދެކޮޅަށް ތެދުވުމުގެ ހިތްވަރު ލިބިގެންދާނެއެވެ. މިއީ އެމެރިކާގެ ރައުސްމާލީ އަމްބަރާޠޫރިއްޔަތުން ދޮޅިފުރާ ލާނެ އެންމެ ފަހު ނޭވާއަށް ވުމަކީވެސް ދުރުގައިވާ ކަމެއް ނޫނެވެ.
ބާރުގެ މި ވާދެމުމުގައި ދެ ބާރެއް އޮތްއިރު، އޭގެ ތެރެއިން އެއް ބާރަކީ ދުރު އިރުމަތީގައި ޙަޤީޤީ ފައިދާ ނަގާނެ ޙާލަތެއްގައި އޮތް ބާރެކެވެ. އަނެއް ބާރަކީ މެދުއިރުމަތީގައި މިދިޔަ ސަތޭކަ ވަރަކަށް އަހަރު، ވިލާތުގެ ފަސްބައިގައި ލޭބޯ ފަންޏެއްހެން އެލިފައި އޮތް ބާރެކެވެ. މިހާރު، މުޅި މި ކުޅިވަރުގައި، އެ ލޭބޯ ފަނީގެ ކުރިމަގަކީ ކޮބައިކަން އެނގިގެން ދާނެއެވެ. މިވަގުތު އެކަމުގެ އެންމެފަހުގެ އެސެސްމަންޓް ހަދަން އުނދަގޫވެފައި އަދި، ތަންކޮޅެއް އަވަހެވެ!
