(19 އޮކްޓޯބަރ 2025 ގައި ޝާއިޢުކުރި ބަޔާގުޅޭ)
މިފަހަރު ، މީރަބަށް މާފުކުރާކަށް ޚާނަމް ބޭނުމެއްނޫނެވެ. މީރަބްދެކެ މުރުތަސިމްވާ ލޯބި ކޮންމެ ފަހަރަކު ، ޤުރްބާންކުރަން މިފަހަރު ، ދުލެއް ނުކުރާނެއެވެ. މަރިޔަމް ގޮވައިގެން މުރުތަސިމް ގެޔަށް އައުމުގެ ކުރިން ، މީރަބް އެގެއިން ބޭރުކޮށްނުލައިފިއްޔާ ، އެކަމެއް ނުވާނެއެވެ. މުރުތަސިމް އައިއްސިއްޔާ އެކަން ހުއްޓުވާނެއެވެ.
" މުރުތަސިމް އައިއްސިއްޔާ ، އަނެއްކާވެސް މީރަބަށް މާފު ލިބޭނެއެވެ. މިގޭގެ ޢިއްޒަތާއި ޙުރުމަތް ކަނޑަން މީރަބަށް އިތުރު ފުރުޞަތު ލިބޭނެއެވެ. " ޚާނަމްގެ ހިތް ، ޙަޔާ އިތުރަށް ތަޣައްޔަރު ކޮށްލިއެވެ.
މައްޗަށްގޮސް ، މީރަބް އަވަހަށް ތިރިޔަށް ބޭލުމަށް ޙަޔާއަށް ޚާނަމް އެންގިއެވެ. ވީއުފަލެއްގެބޮޑުކަމުން ، ކޮލުދަތަށް ދަންދެން ފެންނަ ވަރަށް ޙަޔާގެ މޫނަށް ހިނިތުންވުން ވެރިވިއެވެ. މީރަބްގެ ކޮޓަރިޔާ ހަމަޔަށް ދެވެންދެން ، ޙަޔާ ދިޔައީ އެ ހުނުމުގައި ހެމުން ނަށަމުންނެވެ. ކޮޓަރިޔާ ހަމަޔަށް ދެވުމާއެކު ، ގާވިހަމަހެއްހެން ސިފަ ބަދަލުކޮށް ކަންބޮޑުވެފައި ހުރިގޮތް މޫނުމައްޗަށް ގެނައެވެ.
މީރަބް އިނީ ، ސުންނަތް ނަމާދެއްކޮށް ނިމިގެން ، މަރިޔަމްގެ ސަލާމަތާއި ރައްކާތެރިކަމަށް އެދި ރޮމުންރޮމުން ، ﷲ އަށް ދުޢާ ކުރާށެވެ. މީރަބްގެ ދުޢާ ނިމެންދެން ޙަޔާ މަޑުކޮށްލިއެވެ. ނަމާދުކުނާމަތިން ތެދުވެ ، މީރަބް އެނބުރިލިއިރު ، ކުރިމަތީގައި ޙަޔާ ހުއްޓެވެ.
ޙަޔާއަށް ހުރިހާ ކަމެއް އެނގޭ ދޯއެވެ ! އެންމެ ފުރަތަމަ ދުވަހުވެސް އެ އަނަސްއަކީ ، މުރުތަސިމް މެންގެ ޢާއިލީ ދުޝްމަން ، މަލިކު މުޚްތާރުގެ ދަރި ، މަލިކު ޒުބޭރުކަން އެނގޭ ނޫން ހެއްޔެވެ ؟ " މީރަބް ބުންޏެވެ.
ޚާނަމް މަންމަވެސް ، ދެންމެއަކު ހަމަ އެ ސުއާލު އޭނާއާ ކޮށްފިކަމަށް ޙަޔާ ބުންޏެވެ. ޙަޔާ ގާތަށް ހުރީ ، ބޮޑާ އަދި މަކަރުވެރިކަމުން ފުރިގެންވާ ހިންޏެއް އައިއްސައެވެ. އެކަމަކު އެކަން ޙަޔާ ދޮގު ކުރިއެވެ. އެއީ އޭނާއަށް އެނގޭކަމެއް ނޫންކަމަށްބުނެ ، ދޮގުހެދިކަމަށް ޙަޔާ ބުންޏެވެ. މީރަބްގެ ކުރިމަތީ އެކަމަށް ޙަޔާ ، އެއްބަސްވާންވީ ކީއްކުރަން ހެއްޔެވެ ؟ އެ އަނަސްއަކީ ، ކާކުކަން ، އެންމެ ފުރަތަމަ ދުވަހުވެސް އޭނާއަށް އެނގޭކަމުގައި ޙަޔާ ބުންޏެވެ. ރެސްޓޯރެންޓް ތެރޭގައި ، މަރިޔަމްގެ އަތުގައި އެންގޭޖްމަންޓް އަނގޮޓި އެހާ ލޯބިން ޒުބޭރު އެޅުވިއިރު ، އެތަން ބަލަހައްޓައިގެން ، އެމަންޒަރު ފޯނަށް ރިކޯޑްކުރަން ޙަޔާ ހުރިކަމަށް އެއްބަސް ވިއެވެ. އެވަގުތުވެސް ، އެއީ މަލިކު ޒުބޭރުކަން ޙަޔާއަށް އެނގެއެވެ. އެކަމަކު އެކަން ނޭނގޭކަމަށް ހަދައިގެން ޙަޔާހުރީކަމަށް ބުންޏެވެ.
" އޭގެފަހުން ، މަރިޔަމްއާއި މީރަބްގެ ކޮންމެ ފިޔަވަޅަކަށް އަހަރެން ފާރަލަމުން ގެންދިޔައިމެވެ. އެކަމަކުވެސް ، މުރުތަސިމްގެ ހިތުގައި މީރަބާމެދު ނަފްރަތު އުފައްދަން ފުރުޞަތު ލިބޭނެ ވަގުތަކަށް ، އަނގަ މަޑުންލައިގެން ހުރީއެވެ. މަރިޔަމަށް ކޮންމެ ގޮތެއްވިޔަސް އަހަރެންނަށް ވަރިހަމައެވެ. މަރިޔަމަށްވުރެ ، މުރުތަސިމް އަހަރެންނަށް މާ މުހިންމެވެ. މި ގޭގެ ޢާއިލީ ދުޝްމަން ، ޒުބޭރު ގެނެސް އެންމެންނަށް ވަގަށް މިގެޔަށް ވައްދައި ޒުބޭރާ މަރިޔަމް ޙަވާލުކުރިއިރުވެސް ، މަޑުން ހުރީއެވެ. އެއީ ކީއްކުރަންކަން އެނގޭ ހެއްޔެވެ ؟ މީރަބާއި މުރުތަސިމް ދުރުކޮށްލެވޭނެ ، ރަނގަޅު ފުރުޞަތަކަށް މަޑުކޮށްލަން ވެގެންނެވެ. ހަތަރު އުދަރެސް ފެނުޖެހި ، ކުރެވޭނެ އެއްވެސްކަމެއް ނެތި ، މީރަބްގެ ދުނިޔެ ބަރުބާދުވެގެންދާތަން އަހަރެންގެ ދެލޮލުން ބަލައިލަން ބޭނުންވާތީއެވެ. ނިކަން ދެކިބަލާށެވެ ! މިވަގުތު ، މިގެއިން ނުކުމެގެން ދިއުންފިޔަވައި ، އެހެން އެއްވެސް ގޮތެއް މީރަބަކަށް ނެތެވެ. އަހަރެންގެ މި ޙަމަލާ މިފަހަރު ހުހަކަށް ނުދާނެއެވެ. މިފަހަރު ކާމިޔާބު މިލިބުނީ އަހަރެންނަށެވެ. " ޙަޔާގެ މަކަރުވެރި ރޭވުން ކިޔައިދެމުން ގެންދިޔައެވެ.
ޙަޔާގެ ޙީލަތާއި މަކަރާ އަދި މީރަބާމެދު ޙަޔާގެ ހިތުގައި އުފެދިފައިއޮތް ނަފްރަތާމެދު ، މީރަބްހުރީ ޙައިރާން ވެފައެވެ. އެހާ ކުޑައިރުއްސުރެ ، އެކުގައި އުޅެ ބޮޑުވި ، މަރިޔަމާމެދު އެއްވެސް ހަމްދަރްދީއެއް ޙަޔާގެ ހިތަކު ނެތެވެ. އެއީ އެ ގެޔާއި ޙަޔާ ކުޑައިރު ބަލައި ބޮޑުކުރި ޚާނަމް މަންމަ އާއި އަންވަރު އަދި މުރުތަސިމްގެ ދިރިހުރުމާއި ނެތިދިއުމާ ގުޅިފައިވާ ނުރައްކާތެރި ކަމެކެވެ. އެ ހުރިހާ ކަމަކަށްވުރެ ، އޭނާގެ މީހަކަށް މުރްތަސިމް ހެދުން ، ޙަޔާއަށް މާ މުހިންމު ވެއްޖެއެވެ. ކޮންފަދަ ލަދު ޙަޔާތްކުޑަ ، ހަމްދަރުދީއެއް ރަޙުމެއްނެތް އަނިޔާވެރި ހަރުކަށި މީހެއް ހެއްޔެވެ ؟ އެފަދަ ގޮތްކުޑަ އަމަލުތަކެއް ކުރަން ޙަޔާގެ ހިތުގައި ލަދުޙަޔާތުގެ ކަންފުޅެއްވެސް ނެތީތޯ މީރަބް ސުއާލު ކުރިއެވެ. އެ ސުއާލަށް ، ޖަވާބުދޭކަށް ޙަޔާ ބޭނުމެއްނޫނެވެ. އޭނާ އެއައީ ، ޚާނަމް މަންމަ ބުނެގެން މީރަބް ބަލައިކަމުގައި ޙަޔާ ބުންޏެވެ. އަދި އޭނާއާއެކީ ، ބަސްއަހައިގެން ޚާނަމް މަންމަގާތަށް ތިރިޔަށް އައުމަށް އެންގިއެވެ.
" ކާރު އޮތީ ތައްޔާރަށެވެ. މިގެއިން މީރަބް ނުކުމެގެން ދާންޖެހޭ ވަގުތު މިއޮތީ އައިއްސައެވެ. " މަލާމާތުގެ ހިނިތުން ވުމަކާއެކީ ޙަޔާ ބުންޏެވެ.
އެގެއިން ނުކުމެގެން އެއްވެސް ތާކަށް މީރަބް ނުދާނެކަމަށް ބުނުމާއެކީ ، މީރަބްގެ އަތުގައި ޙަޔާ ހިފައި ، ދަމާހަލާފައި މީރަބް ތިރިޔަށް ގެންދިޔައެވެ. އަންވަރުވެސް އެތަނުގައި އޭރު ހުއްޓެވެ. ދަމާހަލާފައި މީރަބް ގެނެސް ، ޚާނަމްގެ ކުރިމައްޗަށް ހޫރައިލިއެވެ. މީރަބްގެ އަގު ވައްޓައިލުމަށް ޙަޔާއަށް ލިބުނު ފުރުޞަތުގެ ބޭނުން ، އެންމެ ރަނގަޅު ގޮތުގައި ހިފައިލިއެވެ.
" މުރުތަސިމް ގެޔަށް އައުމުގެ ކުރިން ، ތި ރަޙުމެއްނެތް އަންހެނާ ، މި ގެއިން ނުކުމެގެން ، ކަރާޗީއަށް ދާށެވެ ! މުރުތަސިމްގެ އަނތްބެއްގެ ގޮތުގައި މިގޭގައި އުޅުމުގެ ޙައްޤު ، މިހާރު މީރަބަކަށް ނެތެވެ. މަރިޔަމް ގޮވައިގެން މުރުތަސިމް އަންނަތަނުން ، މިގޭގައި މީރަބް ހުރިތަން ފެނިއްޖެނަމަ ، ރުޅިއައިސްގެން ކޮންމެފަދަ ކަމެއްވެސް ކޮށްފާނެއެވެ. އޭގެ ކުރިން މިގެއިން ނުކުމެގެން ދާށެވެ! " ޚާނަމް އެންގިއެވެ.
މީރަބަށްހުރީ ރޮވިފައެވެ. ޙަޔާ ، މީރަބް ގެނައީ ، ނަމާދުފޮށާ ބާލަންވެސް ފުރުޞަތެއް ނުދީއެވެ. އޭނާ އެގެއިން ނުކުމެގެން ނުދާނެކަމަށް މީރަބް ބުންޏެވެ. އެހެނަސް ، މީރަބް އެގޭގައި ހުންނަތަން ދެކެން އެންމެ މިނިޓަކަށްވެސް އޭނާއަށް މަޑުނުކުރެވޭނެކަމަށް ޚާނަމް ބުންޏެވެ. އަންވަރުވެސް ، މީރަބް ކަރާޗީއަށް ގެންގޮސް ލައިދީފާނެކަމަށާއި އޭނާއާއެކީ އައުމަށް އެދުނެވެ. އަންވަރުވެސް މީރަބް އެގެއިން ނެރެލަން ބޭނުންވަނީތޯ ، މީރަބް ސުއާލު ކުރިއެވެ.
" މީރަބް އައިފަހުން މިގެޔަށް ތޫފާނަކށްފަހު ތޫފާނެއް އައިސް ، އެންމެފަހުން ، މި ގެ މުޅިން ބަރުބާދު ކޮށްލައިފީމެއް ނޫން ހެއްޔެވެ ! ދެން އެންމެ ރަނގަޅުވާނީ ، މީރަބް މިގެއިން ނުކުމެގެން ދިޔައްޔާއެވެ. " ޚާނަމް ބުންޏެވެ.
މަރިޔަމް ގޮވައިގެން މުރުތަސިމް އައިމަ ، ލަސްނުކޮށް އޭނާ އެގެއިން ނުކުމެގެން ހިނގައިދާނެކަމަށް މީރަބް ބުންޏެވެ. މީރަބް ބޭނުންވަނީ ، އެގެއިން ގަދަކަމުން ނެރެލެވިގެން ދާންތޯ ޚާނަމް ސުއާލު ކުރިއެވެ.
" މުރުތަސިމް އަންނަދެން މީރަބް މަޑުކުރަނީ ކީއްކުރަން ހެއްޔެވެ ؟ މުރުތަސިމް އައިސްވެސް މީރަބް މިގެއިން ބޭރުކޮށްލާނެއެވެ. އެހެންވީމަ ، މިހާރު ނުކުމެގެން ނުދާންވީ ކީއްވެ ހެއްޔެވެ ؟ " ޙަޔާވެސް މީރަބާ ދިމާލަށް އެއްޗެތި ކިޔައިގަތެވެ.
އަންވަރުވެސް މީރަބްގާތު ދާން ހިނގާށޭ ބުންޏެވެ. އިތުރަށް ބޭޒާރުވާން ، އެގޭގައި މަޑުކުރާނެކަމެއް ނެތްކަމަށް އަންވަރު ބުންޏެވެ.
މުރުތަސިމް ދިޔައީ ، މަރިޔަމް އަނބުރާ ގެންނާނެކަމަށް އޭނާއަށް ވަޢުދުވެފައި ކަމަށާއި ، މުރުތަސިމް އެނބުރި ނާންނަނިސް ، އޭނާ އެގެއިން ނުނުކުންނާނެކަމަށް މީރަބް ބުންޏެވެ.
ހަމަ އެވަގުތު ، މީރަބްގެ އަތުގައި ހިފައިގެން ގެއިން ބޭރަށް ނެރެލުމަށް ، ހާޔާއަށް ޚާނަމް އެންގިއެވެ. ޙަޔާއަށް ލިބުނު ރަނުގެ ފުރުޞަތުގައި މީރަބްގެ އަތުކުރީގައި ބާރަށް ހިފިއެވެ. އެހެންނަމަވެސް ، އަންވަރު ޙަޔާއާ ދިމާލަށް ހަޅޭއްލަވައިގަނެ ، އެކަން ހުއްޓުވިއެވެ. އެކަމާ ގުޅިގެން ، މީރަބަށް އަންވަރު ތާއީދުކުރާ ކަމށް ވަންޏާ ، އޭނާވެސް އެ ޢާއިލާގެ ޢިއްޒަތާއި ޤަދަރަށް އިޙްތިރާމް ނުކުރާކަމަށް ބަލާނެކަމަށް ޚާނަމް ބުންޏެވެ.
އަނެއްކާވެސް ޙަޔާ ، މީރަބްގެ އަތުގައި ހިފައި ދޮރާދިމާއަށް މީރަބް ގެންދަން މަސައްކަތް ކުރިއެވެ. އެހެނަސް ، ޙަޔާގެ އަތް މީރަބް ފޮޅުވައިލިއެވެ.
" ކަލޭމެން ހީކުރަނީ ކީކޭކަމަށް ހެއްޔެވެ ؟ މުރުތަސިމްގެ އަނތްބަކަށްހުރެ ، އަހަރެން މުރުތަސިމަށްވީ ވަޢުދު އުވައިލަންވީ ހެއްޔެވެ ؟ " މީރަބް ބުންޏެވެ.
މުރުތަސިމް އަންނަދެން ކަމެއްނުކޮށް މަޑުކޮށްލުމަށް ، އަންވަރުވެސް ޚާނަމްގެ ކިބައިން އެދުނެވެ. އެކަމުގައި އެންމެންގެ ނިންމުމަކަށް ވާންވާނީ މުރުތަސިމްގެ ނިންމުންކަމަށް އަންވަރަށް ފެނުނެވެ.
ޒުބޭރު މަލިކު ބުނިތަނަކަށް މުރުތަސިމް ގޮސްވަނުމާއެކީ ، ޒުބޭރުގެ ހަށިފާރަވެރިން އައިސް ، މުރުތަސިމް ވަށައިލާ ، ފާސްކޮށް ހެދުމަށްފަހު ، ޒުބޭރުގާތަށް ދިއުމުގެ ހުއްދަ ދިނެވެ.
ޒުބޭރާއި މުރުތަސިމާ ދެމެދު ، ދެކޮޅުވެރިކަމުގެ ބަހުސެއް ހިނގުމަށްފަހު ، އެންމެ ފަހުން ، ޒުބޭރު އެބުނާ ދަނޑުބިމުގެ ފަތް ޒުބޭރާ ޙަވާލު ކުރެވުނެވެ. އަދި ، ޒުބޭރުގެ މައްޗަށް އުފުލިފައިވާ ތިން ޤަތުލުގެ އިލްޒާމުވެސް މުރުތަސިމް ދޫކޮށްލައިފިކަމުގައި މުރުތަސިމް ބުންޏެވެ. މުރުތަސިމަށް ހުށަހެޅުނު ޝަރުތުތައް ފުރިހަމަވުމާއެކީ ، މަރިޔަމް ބަންދު ކުރެވިފައިވާ ކޮޓަރީގެ ތަޅުދަނޑި ، މުރުތަސިމާ ޙަވާލު ކުރެވުނެވެ. އަދި ، މުރުތަސިމް ގެޔަށްގޮސް ، މީރަބަށް ޝުކުރު އަދާކުރުމަށް ، ޒުބޭރު ބުންޏެވެ. މީރަބްގެ އެހީތެރިކަމާނުލައި ، އަދި މީރަބްގެ ވަޢުދު ފުރިހަމަކޮށް ނުދިންނަމަ ، މަރިޔަމް އޭނާގެ އަތްދަށަކަށް ނުގެނެވުނީހެވެ. އެކަމަށްޓަކައި ، މީރަބަށް ޝުކުރު ޙައްޤެވެ. މުރުތަސިމްގެ ދެލޯ ، ރުޅިވެރިކަމުން ފުރިގެންގޮސް ، އަނގުރު އަލިފާން ގަނޑަކަށް ވިއެވެ. ޒުބޭރު ހެމުންހެމުން ، އޭނާގެ އަޢުވާނުންނާއެކީ އެތަނުން ނުކުމެގެން ދިޔައެވެ.
މުރުތަސިމް ، މަރިޔަމަށް ގޮވަމުން ގޭތެރެޔަށް ވަދެ ، އޭނާއަތަށް ޒުބޭރުދިން ތަޅުދަނޑިފަތިން ، އެކިފަހަރު އެކިދޮރު ހުޅުވޭތޯ ބަލަމުން ގެންދިޔައެވެ. އެންމެފަހުން ، މުރުތަސިމްގެ އަޑުގެ ނެތްތަނަށް މަރިޔަމަށް ގޮވަމުން ގެންދިޔައެވެ. މަރިޔަމަށް މުރުތަސިމްގެ އަޑު އިވުމާއެކީ ، އޭނާ ބަންދުކޮށްފައިވާ ދޮރުގައި ތަޅައިގަތުމުން ، މުރުތަސިމް އެދޮރު ހުޅުވިއެވެ.
ދޮރުހުޅުވައިލުމާއެކީ ، މުރުތަސިމްގެ ކުރިމަތީ އެހުރީ މަރިޔަމެވެ. މުރުތަސިމްގެ ދެލޯ ބޮޑުވިއެވެ. ގަބުވެފައި އެތައް އިރަކު އޭނާއަށް ހުރެވުނެވެ. އަދި ، މަރިޔަމަށްވެސް ، ގެންފައިހުރި ބިރެއްގެ ބޮޑުކަމުން ހުރެވުނީ ގަބުވެފައެވެ. މުރުތަސިމްގޮސް ، އޭނާގެ ކޮއްކޮގެ ގައިގައި ބައްދާލައިގެން އިރުކޮޅަކު ހުރުމަށްފަހު ، މަރިޔަމްގެ އަތުގައި ހިފައިގެން ، ގެޔަށް ދިއުމަށްޓަކައި އެގެއިން ނުކުތެވެ.
މަރިޔަމް ގެޔަށް ވަނުމާއެކީ ، މާ ހަމްދަރުދީވެގެންކަމަށް ހަދައިގެން ، ފުރަތަމަވެސް މަރިޔަމްގާތަށް ދުވެފައި ދިޔައީ ޙަޔާއެވެ. މަރިޔަމް ރަނގަޅުތޯ އަހައިލާ ، މަރިޔަމްގެ އަތުގައި ހިފައިގެން ގޭތެރެޔަށް ވެއްދިއެވެ. މީރަބްވެސް މަރިޔަމަށް ގޮވައިލިއެވެ. އިތުރު އެއްވެސްކަމެއް މީރަބަކަށް ނުކުރެވުނެވެ. ޚާނަމް އިނީ ރުޅިއައިސް ރަތްވެފައެވެ. މީރަބް އައިސްގެން އުފާވީކަމެއްވެސް ޚާނަމްގެ މޫނުމައްޗަކުން ނުދައްކައެވެ.
މަރިޔަމްގޮސް ، ޚާނަމްގެ ކުރިމައްޗަށް ހުއްޓުނެވެ. ޚާނަމް އަތް އުފުލާލައި ، އިތުރުކަމެއް ކުރާނެކަމެއް ނެތްކަމުގެ ޢިޝާރާތެއް މަރިޔަމަށް ކޮށްލިއެވެ. އަދި ، މަރިޔަމް ގެއިން ނުކުމެގެން ދިޔަ ޙާލަތުގައި އެނބުރި ގެޔަށް އައިކަމަށް ހީކުރާކަމުގައި ޚާނަމް ބުންޏެވެ. އަދި ، ޙަޔާއަށް ގޮވާލައި ، މަރިޔަމްގެ ކޮޓަރިޔަށް މަރިޔަމް ގެންދިއުމަށް އެންގިއެވެ. މާދަމާއަކީ ، ނޮރޭޒާއެކީ ، މަރިޔަމްގެ ކައިވެނި ކުރެވޭ ދުވަސްކަންވެސް ، ޚާނަމް ހަނދާން ކޮށްދިނެވެ.
މަރިޔަމް ގޮވައިގެން އޭނާގެ ކޮޓަރިޔަށް ދާން ، ޙަޔާ ހިނގައިގަތުމާއެކީ ، މީރަބް މަރިޔަމަށް ގޮވައިލިއެވެ. އެހެނަސް ، މަރިޔަމް އަޅައިނުލާ ، ޙަޔާއާ އެކުގައި ކޮޓަރިޔަށް ދިޔައެވެ.
މަލިކު ޒުބޭރުގެ ގަޔަށް ކިތައް އުންޑަ ފޮނުވައިލިންތޯ ، މުރުތަސިމާ ޚާނަމް ސުއާލު ކުރިއެވެ.
" މަންމާއެވެ ! ބޭބެޔަކު ދިޔައީ ، އޭނާގެ ކޮއްކޮ ސަލާމަތް ކުރުމަށެވެ. " މުރުތަސިމް ބުންޏެވެ.
ދުޝްމަނެއްގާތަށްގޮސް ، މުރުތަސިމް އެއައީ ބަލިވެގެންކަމަށް ޚާނަމް ބުންޏެވެ. މަރިޔަމް ސަލާމަތުން ނުގެނެވުނުނަމަ ، ބަލިވީ ކަމަށާއި ، ކޮއްކޮއަކަށްޓަކައި ، މަލިކު ޒުބޭރުގެ ކުރިމަތީ ބޯގުދުކޮށްލުމަކީ ބަލިވުން ނޫންކަމަށް މުރުތަސިމް ބުންޏެވެ. ބަލިވީ އޭނާގެ އަމިއްލަ ގޭގައިކަމަށްވެސް މުރުތަސިމް ބުންޏެވެ. އެއީ ، މީރަބަށް ނިސްބަތްކޮށް މުރުތަސިމް ބުނި ވާހަކައެއްކަން މީރަބަށް އެނގެއެވެ.
އެހެންކަމަށް ވަންޏާ ، އެ އަންހެނާ ދާނެތާކަށްދާން ފޮނުވައިލަން ޚާނަމް ބުންޏެވެ. އަދި އެ އަންހެނާގެ ކިބައިން މުރުތަސިމް ސަލާމަތްވުމަށް ބުނެ ، މުރުތަސިމާ ދިމާލަށް ޚާނަމް ހަޅޭއްލަވައިގަތެވެ. މުރުތަސިމާ ދިމާލަށް ހަޅޭއްލަވައިގަތުމަށްފަހު ، ޚާނަމް އެތަނުން ނުކުމެގެން ދިޔައީ ، މީރަބާ ދިމާލަށް ދެލޯއަޅަމުންނެވެ. އަންވަރުވެސް އެތާ ހުރުމަށްފަހު ، މުރުތަސިމާއި މީރަބް އެކަނި ބައިތިއްބާފައި އެތަނުން ނުކުމެގެން ދިޔައެވެ.
މުރުތަސިމްގެ ހިތަށް ތަދުވެގެން ހުރީ ރޮވިފައެވެ. މުރުތަސިމްގެ ލޮލުން ކަރުނަ ފައިބަމުން ދިޔައެވެ.
" މީރަބް އެވެ ! ހިނގާށެވެ ! " އެންމެފަހުން ، މުރުތަސިމް ބުންޏެވެ.
މީރަބް ހުރީ ގަބުވެފައެވެ. އަނެއްކާވެސް ، ހިނގާށޭ ބުނެ ، މީރަބާ ދިމާލަށް މުރުތަސިމް ބަލައިލިއެވެ. މީރަބް އެއްޗެކޭ ބުނަން އަނގަހުޅުވައިލުމާއެކީ ، އެއްވެސް އެއްޗެކޭ ނުބުނުމަށް މުރުތަސިމް ބުންޏެވެ.
މީރަބް ގުޑައިނުލުމުން ، މީރަބްގެ އަތުގައި ހިފައިގެން ގެންގޮސް ކާރަށްއަރުވައި ، ކަރާޗީއަށް ދާން މުރުތަސިމް ނައްޓައިލިއެވެ.
ކަރާޗީއަށް ، ވައްޤާސްގެ ގޭގެ ދޮރުމައްޗަށް މީރަބް ގެންގޮސް ކާރު ހުއްޓައިލުމަށްފަހު ، މީރަބަށް ކާރުގެދޮރު ހުޅުވައިލަ ދިނެވެ.
" މިދުވަސް އަތުވެދާނެ އެއްވެސްކަމެއް ނުކުރުމަށް މީރަބަށް އަހަރެން ހަނދާން ކޮށްދިނިން ދޯއެވެ ؟ މީރަބް ތިކުރީ ، ކުރިންވެސް އަހަރެން ބުނެފައި އޮތްގޮތަށް ، އަހަރެންނަށް ބަރުދާސްތު ކުރެވޭފަދަ ޢަމަލެއް ނޫނެވެ. " މުރުތަސިމް ބުންޏެވެ.
ކާރުން ފައިބަންވެސް ނޭނގި ގަބުވެފައި އިންދާ ، މީރަބްގެ އަތުގައި މުރުތަސިމް ހިފައި ގަދަކަމުން ކަހަލަ ގޮތަކަށް ނެރެ ، މީރަބް ، ކާރުން ބޭލިއެވެ.
" މީރަބަށް ޙައްޤު މިނިވަންކަމަށް ، މީރަބަށް މަރުޙަބާއެވެ ! " މުރުތަސިމް ބުންޏެވެ.
މުރުތަސިމް އެހެން ބުނުމަށްފަހު ، އިރުކޮޅަކުވެސް މަޑުކޮށްނުލައި ، ރުޅިވެރިކަމާއެކީ ބާރުބާރަށް ހިނގާފައިގޮސް ، ކާރަށް އަރައި ، ގޭގެ ދޮރުމައްޗަށް މީރަބް ދޫކޮށްލުމަށްފަހު ، ބާރުބާރަށް ކާރު ދުއްވައިލިއެވެ.
މީރަބްހުރީ ، ރޮވިފައެވެ. ހަދާނެގޮތް ބޮޑުވެފައެވެ. އޭނާގެ އެއްވެސް ކުށެއް ސާބިތުވާން ނެތް ޙާލަތެއްގައި ، ނޭނގުމެއްގެ ތެރޭގައި ، މަރިޔަމްގެ ލޯބި އޭނާއަށް ހޯދައިދިނުމަށްޓަކައި ، އަދި ޚާއްޞަކޮށް ، އަނަސްއާއި މަރިޔަމަށް ވީ ވަޢުދު ފުއްދައިދިނުމަށްޓަކައި ކުރެވުނު ޖިހާދުގައި އޭނާ އެވަނީ ބަލިވެފައެވެ. މީރަބްގެ ހިތަށް އެންމެ އުނދަގޫވެ ، ތަކްލީފުން ފުރި އެހިތް ކުދިކުދިވެގެން ދިޔައީ ، މުރުތަސިމްގެ ކުރިމަތީ ، އޭނާގެ އަގެއް ނެތް ޙާލަތެއް ކުރިމަތިވެގެން ދިއުމުންނެވެ. އެކަމުގައި ޙަޔާގެ ޙިލަތްތެރި ރޭވުމެއް އޮތްކަން ، އެއްވެސްމީހަކަށް ނޭނގެއެވެ. އެކަން ސާބިތުކޮށްދިނުމަށްޓަކައި ، މީރަބަށް އެއްވެސް ފުރުޞަތެއް ނުލިބެއެވެ. ކުރާނެކަމެއް ނެތެވެ.
މުރުތަސިމްގެ ހިތުގައި ފުރަތަމަ އުފެދުނީ ، ފޮޓޯގްރަފީއަށް އޮތް ލޯތްބެވެ. ދެވަނަޔަށް އުފެދުނީ މީރަބްގެ މައްޗަށް މުރުތަސިމްގެ މައްޗަށް އޮތް ޚާއްޞަ ލޯތްބެވެ. އެ ލޯބި ، އޭނާގެ އަތުން ބީވެގެން ދާނެ އެއްވެސް ކަމެއް ނުކުރުމަށް ، މުރުތަސިމް އޮތީ މީރަބްގެ ކިބައިން އެދިފައެވެ. އަދި ، އެ ލޯބި އޭނާއަށް ގެއްލިއްޖެނަމަ ، އޭނާއަށް ކެތްނުކުރެވޭނެކަމަށްވެސް ، އޮތީ ބުނެފައެވެ. އެކަމަކު ، ކޮންމެފަދަ ޙާލަތެއް ކުރިމަތިވެގެން ކަމަށްވިޔަސް ، މުރުތަސިމަށް އޭނާގެ ދެވަނަލޯބި އެއޮތީ ގެއްލިފައެވެ. މުރުތަސިމް އެފަދަ ކަމެއް ނުކުރަން މުރުތަސިމް ރޮމުން އާދޭސް ކޮށްކޮށް އޮއްވައި މީރަބަށް ކުރެވުނު ކަމަކުންނެވެ. މީރަބްގެ ކުށެއްނެތި ނޭނގުމެއްގެ ތެރޭގައެވެ. އެކަމަށް މީރަބަށް މަޢާފު ލިބުމަކީ ، ވެދާނެކަމެއްކަމެއްވެސް ނޭނގެއެވެ. މީރަބަށް ، އެހިސާބުން އެވަނީ ، އޭނާގެ ޙަޔާތުން މުރުތަސިމް ގެއްލިފައެވެ. މުރުތަސިމް އަދާކުރަމުން ގެންދިޔައީ ހަމައެކަނި ، މީރަބްގެ ފިރިއެއްގެ ވާޖިބެއްނޫނެވެ. މުރުތަސިމަކީ ، މީރަބްގެ ކޮންމެ ހިތާމައެއްގައި އަދި ކަންބޮޑުވާ ކޮންމެ ޙާލަތެއްގައި ، އޭނާއާ އެންމެ ގާތުގައި ހުންނަ އެހީތެރި އެކުވެރިޔާއެވެ. މީރަބްގެ ހިތް ކުދިކުދިވެގެން ދިޔައެވެ. ( ނުނިމޭ )
