މިއީ އިންޑިއާގެ ލިޔުންތެރިއެއް ކަމުގައިވާ ރުސްކިން ބޮންޑް ލިޔެފައިވާ ކުރުވާހަކައެއްގެ ތަރުޖަމާއެކެވެ. ރުސްކިން ބޮންޑަކީ އިނގިރޭސި ދަރިކޮޅެއްގެ މީހެކެވެ. އޭނާ އުފަންވީ 19 މޭ 1934 ގައެވެ. މިހާރުގެ އުމުރަކީ 91 އަހަރެވެ. އަދިވެސް ލިޔުމުގައި ކުރިއަށް އެބަދެއެވެ. އޭނާ ގިނައިން ލިޔެފައި ވަނީ ކުޑަކުދިންގެ ވާހަކައެވެ. މީގެ އިތުރަށް ކުރުވާހަކައާއި ނާވިލާ ލިޔެއެވެ. އަދި ޅެންވެސް ހަދައެވެ. އޭނާ އެންމެ ފުރަތަމަ ކުރުވާހަކައެއް ލިޔުނީ އުމުރުން އެންމެ 17 އަހަރުގައެވެ. މިހައިތަނަށް 500 އަށްވުރެ ގިނަ ކުރުވާހަކަ ލިޔެފިއެވެ.
ރޮހާނާއާ ހަމައަށް ދެވޭންދެން ރޭލުގައި އަހަރެން އިން ވަތްގަނޑު އޮތީ އަހަރެން އެކަންޏަށް ހިތަކަށް ލިބިފައެވެ. އެހައިތަނުން އެ ވަތްގަނޑަށް އަންހެންކުއްޖަކު އަރައިފިއެވެ. އެ ކުއްޖާ ގޮވައިގެން އެރީ އޭނާގެ މައިންބަފައިންހެން ހީވެއެވެ. އެއީ އެ ކުއްޖާގެ އަރާމަށާއި ފަސޭހައާއި ރައްކާތެރިކަމަށް ވަރަށް ބޮޑަށް ފަރުވާތެރިވެގެން އުޅޭ ބަޔަކުކަން އެނގެއެވެ. ރޭލުގައި ކަންތައް ކުރަންވާ ގޮތް މަންމަ ތަފުސީލުކޮށް ކިޔައިދިނެވެ. އޭނާ ގެންގުޅޭ ތަކެތި ބަހައްޓާންވާ ތަނާއި ކުޑަދޮރުން ބޯދޭން ނުޖެހޭ ވަގުތާއި ބީރައްޓެހިންނާ ވާހަކަނުދައްކައި ހުންނާނޭ ގޮތް ކިޔައިދިނެވެ.
އެމީހުން އަލްވަދާޢު ކިޔަފައި ރޭލުން ފައިބައިފިއެވެ. ރޭލު ދުއްވާލައިފިއެވެ. އަހަންނަކީ ލޯ އަނދިރި މީހަކީމެވެ. އަހަރެންގެ ލޮލަކީ ގަދަ އައްޔާއި އަނދިރިކަމަށް ޙައްސާސް ލޮލެކެވެ. އެހެންވީމާ އަންހެންކުއްޖާގެ ސިފަ ރަނގަޅަކަށް ކިޔައިދޭކަށް ނޭނގެއެވެ. އެކަމަކު ހިނގާއިރު ގޮވާ އަޑުން އަހަންނަށް އެއްކަމެއް ޔަގީންވިއެވެ. އެ ކުއްޖާ އަރައިގެން ހުރީ ފެންފައިވާނަކަށެވެ.
އެ ކުއްޖާގެ ސިފަޔާ ބެހޭ ގޮތުން އެއްޗެކޭ ބުނަން އެނގޭނީ ތަންކޮޅެއް ފަހުންނެވެ. ފަހަރެއްގައި އެއްގޮތަކަށްވެސް ބުނަން ނޭނގުމަކީވެސް އެކަށީގެންވާ ކަމެކެވެ. އެކަމަކު އަހަންނަށް އެއްކުޖާގެ އަޑާ ގަޔާވެވުނެވެ. އަދި ފައިވާނުގެ އަޑާވެސް ގަޔާވެވޭގޮތް ވިއެވެ.
[ތިޔަ ދަނީ ދެހްރާއަށްތަ؟] އަހަރެން އަހައިލީމެވެ.
އަހަރެން އިން ތަނަށް އަނދިރިއެޅިފައި ހުރީކަން ނޭނގެއެވެ. އެ ކުއްޖާ ދިޔައީ ސިއްސައިގެންނެވެ. ކުޑަކޮށް ހައިރާންވެފައި ބުނެފިއެވެ. [މިތާނގައި އެހެން މީހަކު އިންކަމެއް އަހަރެން ނުދެންހުރިން.]
އެތައް ހިސާބެއްގެ ދުރު ނުލާހިކު އަލިކޮށް ފެންނަ މީހުންނަށްވެސް ބައެއް ފަހަރަށް ދިމާ ކުރިމަތީގައި ހުންނަ އެއްޗެހިވެސް ނުފެންނަ ގޮތް ދިމާވެއެވެ. އެއީ ފުން ވިސްނުމާއެކު ސިކުނޑި މާ ބޮޑަށް ފުރިފައި ހުންނާތީ ވާ ގޮތެއް ކަމުގައި ވެދާނެއެވެ. އަދި ބައެއް ފަހަރު މުޅީން އަނދިރި މީހުން ނުވަތަ ފުސްކޮށް ފެންނަ މީހުން ކުދިކުދި ކަންތައް އެނގުނީމާ އެހެން ހިއްސުތަކުގެ ބޭނުންކޮށްގެން ގިނަ އެއްޗެހި ދެނެގަނެއެވެ.
[އަހަރެންވެސް މަންޖެ ނުދެކެން.] އަހަރެން ބުނެލީމެވެ. [އެކަމަކު މި ވަތްގަނޑަށް އެރިއަޑު އިވުނު.]
އަހަރެން މިއީ އަނދިރި މީހަކުކަން އެ ކުއްޖާއަށް ނާންގައި ހިފެހެއްޓޭނެ ބާވައޭ އަހަރެންގެ ހިތަށް އެރިއެވެ. އަހަރެން އިށީނދެއިން ތަނުން ނުއެއް ތެދުވަމެވެ. އެހެންވީމާ އެއީ މާ އުނދަގޫ ކަމަކަށް ނުވާނެއޭވެސް ހިތަށް އެރިއެވެ.
އަންހެންކުއްޖާ ބުންޏެވެ. [އަހަރެން ފައިބާނީ ސަހާރަންޕޫރަށް. އަހަރެންގެ ބޮޑު ދައިތަ އަހަރެން ބަލައި އައިސް ހުންނާނެ.]
[އެހެންވެއްޖެއްޔާ މާ ބޮޑަށް ފަރިތަވާން އުޅޭނެ ކަމެއް ނެތްހެން ހީވަނީ.] އަހަރެން ބުނެލީމެވެ. [ބޮޑު ދައިތައިންނަކީ ވަރަށް ހަރުކަށި ބައެއް.]
[ކޮން ތާނކަށް ތިޔަ ދަނީ؟] އޭނާ އަހައިފިއެވެ.
[ފުރަތަމަ ދެހެރާއަށް. އެތަނުން ދާނީ މަސޫރީއަށް.]
[އޯހ. ހާދަހާ ނަސީބު ގަދަ މީހެކޭ. އަހަންނަށްވެސް މަސޫރީއަށް ދެވޭނެ ނަމައޭ ހިތަށް އަރާ. އަހަރެން ފަރުބަދަ ދެކެ ވަރަށް ލޯބިވޭ. ޚާއްސަކޮށް އޮކްޓޯބަރު މަހު.]
[އާނ. މިއީ އެންމެ ރަނގަޅު ދުވަސްވަރު.] އަހަރެންގެ ހަނދާންތައް އައު ކުރަމުން ބުނެފީމެވެ. [ފަރުބަދަތައް ފޮރުވިފައި ހުންނަނީ ދާލިއާ މަލުންނެވެ. އިރުގެ ހޫނުކަންވެސް ވަނީ އުފާވެރި އިހުސާސަކަށެވެ. ރޭގަނޑު މަޅިލައިގެން ތިބެ ކުޑަކޮށް ބޮއިލުމަކީވެސް ހިތްހަމަ ޖެހޭ ކަމެއް. ފަތުރުވެރިންވެސް މިހާރު ގޮސް ނިމިއްޖެ. އެހެންވީމާ މަގެއްގެ މަތީން މީހަކުވެސް ފެންނާނީ ވަރަށް މަދުން. އޮކްޓޯބަރު މަހަކީ ހަގީގަތުގައިވެސް ރަނގަޅު ދުވަސްވަރެއް.]
އޭނާ އަނގަޔަކުން ނުބުނެއެވެ. އަހަރެންގެ ވާހަކައިން އޭނާއަށް އެއްވެސް ކަހަލަ އަސަރެއް ކުރިބާވައޭ ހިތަށްއެރިއެވެ. ނުވަތަ އަހަރެން މިއީ ޢިޝްޤީބަލީގައި ޖެހިފައި ހުރި މޮޔައެއް ކަމުގައި ނީނުކުރާނޭ ބާވައޭވެސް ހިތަށް އެރިއެވެ. ދެން އަހަންނަށް މޮޔަ ކަމެއް ކުރެވިއްޖެއެވެ.
[ބޭރު ފެންނަނީ ކިހިނެއް؟] އަހަރެން އަހައިލީމެވެ.
އަހަރެންގެ ސުވާލަކީ އޭނާ ހައިރާންކުރުވި ސުވާލެއްހެން ހީވެއެވެ. އަހަންނަށް ނުފެންނަކަން އޭނާއަށް އެނގުނީ ބާވައެވެ؟ އެކަމަކު އޭނާގެ ޖަވާބުން އަހަރެންގެ ޝައްކު ފިލައިފިއެވެ.
[އަމިއްލައަށް ކުޑަދޮރުން ބޭރު ބަލައިލަބަލަ.] އޭނާ ބުންޏެވެ.
އަހަރެން މަޑުމަޑުން އެއްފަރާތަކަށް ޖެހިފައި އަތުން ކުޑަދޮރުގެ އޮޅު ފާހަގަކުރެވޭތޯ މަސައްކަތްކޮށްލީމެވެ. ކުޑަދޮރު ހުރީ ހުޅުވައިފިއެވެ. އަހަރެން ދޮރާ ދިމާއަށް، ޖެހެމުންދާ ވައިރޯޅިއާ ދިމާއަށް، މޫނު އަނބުރައިލީމެވެ. އަހަރެން ބޭރު ބަލަނީއޭ އޭނާއަށް ހީވާނޭ ގޮތް ވިސްނައިގެންނެވެ. އަހަންނަށް އިންޖީނުގެ އަޑާއި ރޭލުގެ ދަގަނޑު ފުރޮޅު އެނބުރޭ އަޑު އިވެއެވެ. ނަންބޯޑުތަކާއި ހޮޅިދަނޑިތަށް ފަސްދީ ދާތަން އަހަރެން ޚިޔާލީ ލޮލަށް ފެނެއެވެ.
[މިހެން ބާރަށް ދާއިރު ރޭލު މިއޮތީ ހުއްޓިފައޭ ގަސްތައް ދުވެފައި ދަނީއޭ ހީވާގޮތްވާކަން ފާހަގަކުރެވޭތަ؟] އަހަރެން ބުނެލީމެވެ.
[އެއީ އަބަދުވެސް އެކަން ވާގޮތެއްނު؟] އޭނާ ބުންޏެވެ. [އެއްވެސް ޖަނަވާރެއް އެބަފެނޭތަ؟]
[ނުފެނޭ.] އަހަރެން ފުރިހަމަ ޔަގީންކަމާއެކު ބުނެލީމެވެ. ދެހެރާގެ ޖަންގަލިތަކުން ޖަނަވާރެއް މިހާރު ފެންނަނީ ވަރަށް މަދުންކަން އަހަރެން ދެނަހުރީމެވެ.
އަހަރެން ކުޑާދޮރާ ދިމާއިން މޫނު އަނބުރައިލައި އެ ކުއްޖާޔާ ދިމާއަށް މޫނު ސީދާކޮށްލީމެވެ. ދެ މީހުން އިރުކޮޅެއް ވާންދެން ހިމޭނުން ތިބީމެވެ.
[މަންޖެގެ މޫނު ވަރަށް ޝައުގުވެރި.] އަހަރެން ބުނެލީމެވެ. އަހަރެންގެ ހިތްވަރު އާލާވާން ފަށައިފިއެވެ. ކޮންމެ ގޮތެއް ވިޔަސް އަހަރެން މި ބުނީއަކީ މީހަކު ނުރުހުންވާ ކަހަލަ ވާހަކައެއް ނޫނެވެ. ރީތި ވާހަކަ ބުނީމާ ނުރުހުންވާޏީ ވަރަށް މަދު އަންހެން ކުއްޖެކެވެ. އޭނާ ވަރަށް ހިތްގައިމު ގޮތަކަށް ހީނގަތެވެ. ވަރަށް ސާފު، ރަނގަބީލީ ހުނުމެކެވެ.
[ޝައުގުވެރިއޭ ބުނީމާ ވަރަށް ގަޔާވެއްޖެ. އަހަރެންގެ މޫނު ވަރަށް ރީއްޗޭ މީހުން ބުނާ އަޑު އަހައަހައި މިހާރު ފޫހިވެއްޖެ.]
އަހާނ. އެކުއްޖާގެ މޫނަކީ ރީތި މޫނެއްތާއެވެ؟ އަހަރެންގެ ހިތަށް އެރިއެވެ. އެޔާއެކު ބުނެލީމެވެ. [ޝައުގުވެރި މޫނު ރީތިވެސް ވެއެއްނު؟]
[ތިޔައީ ވަރަށް ކެރޭ، ޖެހިލުން ކުޑަ ޒުވާނެއް.] އޭނާ ބުންޏެވެ. [ތިޔަހައި ސީރިއަސް ވެފައި އިނީ ކީއްވެގެން؟]
އޭނާއަށް ދައްކައިލާން ހީނގެންފާނަމޭ އަހަރެންގެ ހިތަށް އެރިއެވެ. އެކަމަކު ހުނުމުގެ މަތީން ހަނދާންވުމާއެކު އަހަންނަށް އުނދަގޫތަކެއް ވެއެވެ. އަދި އެކަނިވެރިކަންވެސް އިހުސާސްވެއެވެ.
[ތިޔަ ފައިބާން އުޅޭ އިސްޓޭޝަނަށް ވަރަށް އަވަހަށް ފޯރައިފާނެ.]
[ޝުކުރުހުރި. މިއީ ވަރަށް ކުރު ދަތުރެއް. ދެގަޑި ތިން ގަޑިއިރަށްވުރެ ގިނައިރު ރޭލުގައި އިނުމަކީ އަހަންނަށް ކުރެވޭ ވަރުގެ ކަމެއް ނޫން.]
އެކަމަކު އެކުއްޖާ ވާހަކަދައްކާ އަޑާއި ހޭނ އަޑު އަހާން، އެތާނގައި ކިތަންމެ ގިނަ އިރަކު އިންނާންވެސް އަހަރެން ހުރީ ތައްޔާރަށެވެ. އޭނާގެ އަޑުގައި ހުރީ ފަރުބަދަމަތީން ފައިބާ ފެންއާރުގެ އަޑުފަދަ ޖާދޫއެކެވެ. ރޭލުން ފޭބުމާއެކު ދާދި ދެންމެއަކު ހިނގި ހުރިހައި ކަމެއް އޭނާގެ ހަނދާންނުން ފޮހެވިގެން ހިނގައިދާނެއެވެ. އެކަމަކު ދަތުރު ނިމޭއިރުވެސް އަހަރެންގެ ހަނދާނަކުން ނުއެއް ފޮހެވޭނެއެވެ. އަދި އޭގެ ފަހުންވެސް ހަނދާން ހުންނާނެއެވެ.
އިންޖީނުގެ ރަނގަބީލުގެ އަޑު އިވިއްޖެއެވެ. ފުރޮޅުގެ އަޑާއި ރާގު ބަދަލުވެއްޖެއެވެ. އަންހެންކުއްޖާ ތެދުވެ، އޭނާ ހިފައި ގެންގުޅޭ ތަކެތި އެއްކުރާން ފަށައިފިއެވެ. އޭނާގެ ބޮލުގައި ހުރީ ހުޅިއެއް ޖަހައިފައި ބާވައޭ ނުވަތަ ގަތައިފައި ބާވައޭ އަހަރެންގެ ހިތަށް އެރިއެވެ. ކޮނޑުމައްޗަށް ވިހުރުވައިލައިފައި އޮތީ ކަމުގައިވެސް ވެދާނެއެވެ. ނުވަތަ ކުރުކޮށް ކޮށައިފައިވެސް ހުރެދާނެއެވެ.
ރޭލު މަޑުމަޑުން ގޮސް އިސްޓޭޝަނަށް މަޑުކޮށްފިއެވެ. ބޭރުން އިވެނީ މަޖޫރީންގެ ގޮވެލިފަތީގެ އަޑާއި ސަޔާއި ހެދިކާ ވިއްކާ މީހުންގެ އަޑެވެ. އެޔާއެކު ވަރަށް ބާރަށް، ވަރަށް ތޫލި އަންހެން އަޑެއްވެސް އިވުނެވެ. އެއީ އެ ކުއްޖާގެ ބޮޑުދައިތަގެ އަޑުކަން ޔަގީނެވެ.
[ދެން ދަނީ. ސަލާން.] އެ ކުއްޖާ ބުނެލިއެވެ.
އޭރު އެ ކުއްޖާ ހުރީ ކޮޅަށެވެ. އަހަރެންގެ ގައިގައި ޖެހޭހައި ކައިރީގައެވެ. އޭނާގެ ބޮލުން ދުވަނީ ވަރަށް މީރު ވަހެކެވެ. އަހަރެން ބޭނުންވީ އޭނާގެ ބޮލުގައި އަތް ޖައްސައިލާށެވެ. އެކަމަކު އެ ކުއްޖާ ދުރަށް ހިނގައިގެންފިއެވެ. މިހާރު ހުރީ އެ ކުއްޖާ އިންތަނުން ދުވާ މީރުވަސް އެކަންޏެވެ.
ރޭލުގައި އާއްމުކޮށް ވާފަދައިން އަރާ މީހުންނާއި ފައިބާ މީހުން ދޮރުމަތީގައި ތޮއް ޖެހިއްޖެއެވެ. ކޮންމެވެސް ފިރިހެންކު މާފަށް އެދުނު އަޑު އިވުނެވެ. ދެން އިވުނީ ވަރަށް ބާރަށް ދޮރު ލެއްޕުނު އަޑެވެ. އަނެއްކާވެސް އަހަރެންގެ ދުނިޔޭގެ ދޮރު ލެއްޕުނީއެވެ. އަހަރެން ގޮނޑީގައި އިށީނދެއްޖައީމެވެ. ރޭލުގެ ގާޑު ކަށިގަނޑު ފުމެލުމާއެކު ރޭލު ދުއްވައިލައިފިއެވެ. އަނެއްކާވެސް އެހެން ދަތުރުވެރިއަކާ އެކު ހަމަ އެ ކުޅިވަރު ކުޅޭން ފުރުސަތު ލިބުނީއެވެ.
ރޭލުގެ ދުވެލި ބާރުވެއްޖެއެވެ. ފުރޮޅު އޭގެ [ލަވަ]އާއިގެން ކުރިއަށް ދަނީއެވެ. އަހަރެން އަތްކާއްތައިލައިގެން ކުޑަދޮރު ހޯދައިފީމެވެ. އަދި ބޭރަށް މޫނު އަނބުރައިލައިފީމެވެ. ދުވާލެކޭ، ރޭގަނޑެކޭ އަހްނަނަކަށް އެއްވެސް ތަފާތެއް ނެތެވެ.
ކުޑަދޮރުގެ ބޭރުގައި ލައްކަ ކަންތައް އެބަ ހިނގައެވެ. އެ ކަންތައްތައް ފާހަގަކޮށްގަންނާން މަސައްކަތް ކުރުމަކީ ވަރަށް ފައްކާ ކުޅިވަރަކަށް ވާނެއެވެ.
އަހަރެން އިން ވަތްގަނޑަށް މި ފަހަރު އެރީ ފިރިހެނެކެވެ.
އޭނާ ބުނެލިއެވެ. [ދެންމެ އެ ފޭބި އަންހެންކުއްޖާހައި އަހަރެން ރީތި ނޫންވީމާ ވަރަށް ދެރަވެއްޖެ ދޯ؟]
[އެއީ ވަރަށް ޝައުގުވެރި ކުއްޖެއް.] އަހަރެން ބުނެލީމެވެ. [އެ ކުއްޖާގެ ބޮލުގެ އިސްތަށިގަނޑު ވަރަށް ކުރުތަ؟ ވަރަށް ދިގުތަ؟]
[އަހަރެން ހަނދާނެއް ނެތް.] އޭނާ ބުންޏެވެ. [އަހަންނަށް ފާހަގަ ކުރެވުނީ އެ ކުއްޖާގެ ލޯ. އިސްތަށިގަނޑެއް ނޫން. ކިތަންމެ ރީތި ލޮލަކަށް ވިޔަސް އެ ކުއްޖާއަކަށް އޭގެ ބޭނުމެއް ނެތް. އެއީ ލޯ އަނދިރި ކުއްޖެއް. ކަލެއަށް އެކަން ފާހަގަ ކުރެވުނުތަ؟]
(ނިމުނީ)
