( 11 އޯގަސްޓް 2024 ގައި ޝާއިޢުކުރި ބަޔާގުޅޭ )
( ސިފައިންނާއެކީ ، ދިލްނަޝީނާއި އައްވަލަށް ދާންޖެހުނީ އެހެންވެގެންނެވެ. އަނީސާގެ ދޮގަށް ، އެގެޔަށް އެއައި އަންހެނާ ޝައްކުކުރިނަމަވެސް ، އިތުރު އެއްޗެކޭ ބުނެއެވެ. ޢާފިޔާއަށް ގޮވައިގެން ގެނެސް ، ސައިދީފައި އެއަންހެންމީހާ ފޮނުވައިލަން އަނީސާ މަސައްކަތް ކުރިއެވެ. )
ދިލްނަޝީންގެ ޚަބަރެއް ނުވެގެން ، ޙަމްޒާހުރީ ދެކޮޅަށްދެކޮޅަށް ހިނގަހިނގައެވެ. ފޯނުކޮށްކޮށް ، ދިލްނަޝީން ފޯނެއް ނުނަގައެވެ. ރިދާލައްވާވެސް ، އެތައްފަހަރަކު ގުޅައިފިއެވެ. އެންމެފަހުން ، ދިލްނަޝީންމެންގެ ގެޔަށް ދިއުމަށް ޙަމްޒާ ނިންމިއެވެ. ދިލްނަޝީން އުޅެނީ ކޮންޙާލެއްގައިތޯ ނުބަލައި ، ޙަމްޒާއަކަށް ކެތެއް ނުވިއެވެ. އެހެންނަމަވެސް ، އެކަން ރިދާ މަނާކުރިއެވެ. އެރޭގެ އެހާ ލަސްގަޑިއެއްގައި މީސްމީހުންގެ ގެޔަށް ދިއުންއެއީ ، ޙާލަތުގެ ގޮތުންވެސް ކުރަން އެންމެ ރަނގަޅުކަމެއްނޫންކަން ، ރިދާ އޭނާގެ ބޭބެއަށް ވިސްނައިދެމުން ގެންދިޔައެވެ. އެހާ ދެރަގޮތަކަށް އެކަން އެދިޔައީ ޙަމްޒާއާ ހުރެއެވެ. ޙަމްޒާގެ ޢަމަލުތައް ހުރިގޮތުންނެވެ. މަންމައާއި ބައްޕަޔަށް ، އެމީހުންގެ ރިޕޯޓް ކޮށް ، ސިފައިންގެޔަށް ފޮނުވައި ، އެހާ ނިކަމެތި ގޮތަކަށް ދިލްނަޝީންމެންގެ ޢާއިލާގެ އަބުރު ކަތިލެވިގެން އެދިޔައީ ، ޙަމްޒާއާ ހުރެއެވެ.
ޙަމްޒާއަށް ވިސްނައިދީގެން ، އެރޭ ގެއިން ނުކުމެގެން ނުދާނެގޮތެއް ހޯދޭތޯ ، ރިދާ މަސައްކަތް ކުރަމުން ގެންދިޔައެވެ. ހެނދުނުވަންދެން އިންތިޒާރު ކުރުމަށް އެދުނެވެ. މަންމައާއި ބައްޕައާ ވާހަކަ ދައްކައިގެން ، އެމީހުން ރުއްސޭތޯ ރިދާ މަސައްކަތް ކުރާނެއެވެ. އެކަމަކު ، މުއްސަނދިކަމާއި ބޮޑާކަމުން ކިބުރުވެރިވެފައިތިބި ، އޭނާގެ މަންމައާއި ބައްޕަޔަށް ، ނިކަމެތިންގެ ހިތުގެ ވޭން އިޙްސާސްވާނީ ކިހާވަރަކަށްކަމެއް ރިދާއަކަށް ނޭނގެއެވެ. އޭނާއަށްވެސް ކުރެވޭނީ މަސައްކަތެވެ. ޙަމްޒާ ފޭހުނު އިލޮށިގަނޑު ، ޙަމްޒާގެ ލޮލަށް ހެރުމަކީ އޭނާ ކުރާނެކަމެއްނޫނެވެ. ރިދާ އާދޭސްކޮށްފައި ދެއްކި ވާހަކަތަކުގެ އަޑުއަހައި ، ހެނދުނުވީމަ ، ރިދާ ކޮލެޖަށްގޮސް ދިލްނަޝީނާ ދިމާކުރުމަށްފަހު ، ޚަބަރެއްކުރާނެކަމަށް ވަޢުދުވުމުން ، ޙަމްޒާ މައިތިރި ވިއެވެ.
ކުލްސޫމް ހުރީ ، ދިލްނަޝީނަށް ދޭން ތައްޔާރުކުރަން އޯޑަރުކުރި ގަހަނާގެ ޚަބަރެއްނުވެގެން ކަންބޮޑުވެފައެވެ. އެމީހުން ފޯނެއްވެސް ނުނަގައެވެ. އެއީ އެރޭގެ ލަސްގަޑިއެއްކަމަށާއި ފިހާރަ މިހާރު ހުންނާނީ ބަންދުކޮށްފައިކަން ، ޙައިދަރު ، އޭނާގެ މަންމަޔަށް ހަނދާން ކޮށްދިނެވެ. ކުލްސޫމް ފޯނުކުރަނީ ، ފިހާރަޔަކަށްނޫނެވެ. އެތާގެ ވެރިމީހާގެ މޮބައިލް ފޯނަށެވެ. ހެނދުނުވަންދެން އިންތިޒާރު ކުރުމަށް ޙައިދަރު ، އޭނާގެ މަންމަގެ ކިބައިން އެދުނެވެ. އެހެނަސް ، ކައިވެންޏާގުޅޭ އެއްވެސްކަމެއް ފަސްމިނިޓަށްވެސް ލަސްކުރާކަށް ކުލްސޫމް ބޭނުމެއް ނުވެއެވެ. ގަހަނާގެ ކަންތައް ވަކިގޮތަކަށް ނުނިމެނިސް ، އަދި އެމީހާއާ ފޯނުން ވާހަކަ ނުދެއްކެނިސް ، ކުލްސޫމަކަށް އެރެޔަކު ނުނިދޭނެއެވެ. ކުލްސޫމް ބޭނުންވަނީ ، އެންމެ ފަހުގެ ޑިޒައިނަށް ، އަގުބޮޑުކޮށް ތަނޑުތަކާއި އަނގޮޓި ތައްޔާރު ކުރުމަށެވެ. ދެގުނަޔަށް ފައިސާ ދައްކައިގެން ކަމަށްވިޔަސް ، އެދުވަހުން އެދުވަހަށް އެކަން ނިންމަން ކުލްސޫމް ބޭނުންވެއެވެ. އެހެންނޫނީ ، އޭނާގެ ޅީދަރިފުޅަށް ދޭނެ ރަނގަޅު ހަދިޔާއެއް އޭނާއަކަށް ނުލިބޭނެއެވެ. އަތުގައިހުރި ރަނުގެ ގަހަނާތައް ޚާއްޞަކުރަން ބޭނުންވަނީ ، ކައިވެނިވާ ރެޔަށެވެ.
ޙައިދަރަށް އޭނާގެ މަންމަ އުޅޭގޮތް ފެނިފައި ، އެއުޅެނީ ކުޑަކުއްޖަކު ، ފުރަތަމަ ދުވަހު ، ސްކޫލަށްގޮސް އުޅޭނެގޮތަކަމަށް ބުނެ މަންމަޔަށް މަލާމާތް ކޮށްލިއެވެ. ރީތި ފަންސޫރަޔާއި ފޮތާ ފެނުނީމަ ، އެކުދިން އުފަލުން ނަށާނެއެވެ. އެއީ ، ކުލްސޫމަށް މައްސަލައެއްނޫނެވެ. އޭނާއަށް ލިބިފައިވާ އުފާވެރިކަމަކީވެސް ، ހަމަ އެކަހަލަ ކަމެކެވެ. އެފަދަ އުފާވެރިކަމެއް ކުލްސޫމްގެ ހިތަށް އެލިބުނީ އެތައް ޒަމާނެއްކޮށްފައެވެ. މަންމަ ގޮތްދޫނުކޮށްގެން ، ޙައިދަރުވެސް އެމީހުންނާ ގުޅަން މަސައްކަތް ކުރިއެވެ.
ދެލޯބޮޑުކޮށްގެން ، ނިދީގެ ކަންފުޅެއްވެސް ނެތި ، އެނދުމައްޗަށް ވެއްޓިފައި ދިލްނަޝީން އޮތެވެ. އޭނާގެ ލޮލުގެ ކުރިމަތީ ، އެއްމަންޒަރަކަށްފަހު އަނެއް މަންޒަރެއް ނިއުޅެމުން ފެންނަމުން އެދަނީ ، މިދެދުވަހަކު އެގޭތެރޭގައި ހިނގައިދިޔަ ކަންކަމުގެ ބިރުވެރި މަންޒަރުތަކެވެ. ހިތާމަވެރި އިޙްސާސްތަކެވެ. ދިލްނަޝީންގެ ހިތައް އެންމެބޮށަށް ތަދުވީ ، އޭނާގެ ބޭބެ ، އޭނާ އެގެއިން ނެރެލަން ދަމާކޫއްތާފައި ދޮރާދިމާލަށް ގެންދިޔަ މަންޒަރުންނެވެ. އޭނާ ވިހަން މަންމަ އުފުއްލި ވޭނަށްވުރެ ބޮޑު ވޭނެއް ، ބޮޑުވެ ތަސައްރުފް ފުދުނުފަހުން އެމަންމަޔަށް އުފުއްލަން ޖެއްސިގެންނެވެ.
ހެނދުނު އެތައް އިރެއްވީއިރުވެސް ، ނުތެދުވެ އެނދުމަތީ ދިލްނަޝީން އޮތެވެ. ޢާފިޔާ ، ސައިހިފައިގެން އައިސް ، އެތައް މަސައްކަތެއް ކޮށްގެންވެސް ، ސައިބޯކަށް އޭނާ ބޭނުމެއްނުވިއެވެ. އަރުތެރެޔަށް ފެންފޮދެއްލާހާ ހިތްވަރެއްވެސް އޭނާގެ ހަށިގަނޑަކު ނެތެވެ. އެއްވެސް މީހަކާ ވާހަކަދައްކާކަށް ދިލްނަޝީން ބޭނުމެއް ނޫނެވެ. ފަހަރިވެސް އެތަނުން ދިއުމަށް ދިލްނަޝީން އެދުނެވެ. ޢާފިޔާ ބަލަނީ ދިލްނަޝީނަކީ ، އޭނާގެ އެއްބަނޑު އެއްބަފާ ކޮއްކޮއެއްގެ ގޮތުގައެވެ. އެދެމީހުންވެސް އެކަކު އަނެކަކުދެކެ އެހާ ލޯބިވެއެވެ. އެހާ ގާތްއިރުވެސް ، ޙަމްޒާއާބެހޭ އެއްވެސް ވާހަކައެއް ، ޢާފިޔާގާތުވެސް ކުޑަކޮށްވެސް ، ދިލްނަޝީން ދައްކައިލާފައެއް ނެތެވެ. އެކަމުގައި ޢާފިޔާ ކުށްވެރިކުރީ ދިލްނަޝީނެވެ. އެހާމައްޗަށް އެކަން ނުދަނިސް ، މަންމައާ އެވާހަކަ ނުދައްކާނެންޏާ އޭނާގާތު އެވާހަކަ ބުނެލިނަމަވެސް ، އެހިސާބަކަށް އެކަމެއް ނުދިޔައީހެވެ. ދައްތައެއްގެ ޙައިޞިއްޔަތުން ، ޢާފިޔާ އޭނާއަށް ވިސްނައިދޭނެއެވެ.
ރިދާއާއި ދިލްނަޝީންގެ ގުޅުމަކީ ، އެހުރިހާކަމެއްގެ އެއްސަބަބެވެ. އެމީހުންނާ އެއްފެންވަރެއްގެ ޢާއިލާއެއްގެ ކުއްޖަކާއެކުގައި ނޫނީ ، އެހާގާތް ރަޙުމަތްތެރިކަމެއް އުފައްދާކަށް ނުވާނެއެވެ. ލަނޑަޔާ ވާނީ ލަނޑަޔާއެވެ. މުއްސަނދިންގެ ދަރިން އެހެން މީހުންނަށްދޭނީ ، އެކުދިން ނުލާން ބަހައްޓަފައި ހުންނަ ހެދުމެވެ. ނާރަން ބަހައްޓާފައި ހުންނަ ފައިވާނެވެ. ޅީދަރިއެއްގެ ފުރިހަމަ ޙައްޤާއި އިޙްތިރާމް ، އެމީހުންގެ ފަރާތުން ، ދިލްނަޝީނަކަށް ނުދޭނެއެވެ.
މުއްސަނދިންގެ ފިރިހެންދަރިންނަކަށް ، ފަޤީރު ޢާއިލާތަކުގެ އަންހެންކުދިންދެކެ ، ލޯތްބެއް ނުވެވޭނެއެވެ. އެހެނަސް ، އެކުދިންގެ ބޭނުން ނަހަމަގޮތުގައި ހިފައިފާނެއެވެ. އެފަދަ ޒުވާނުންގެ ހިތުގައި އުފެދޭނެ އިޙްސާސަކީ ވަގުތީ އެއްޗެކެވެ. އެއީ ، ދިލްނަޝީން ޕާޓީއަކަށް ދާންބޭނުންވީމާ ، ރިދާގެ ހެދުން ދިލްނަޝީނަށް ދޭފަދަ ކަމެކެވެ. ދިލްނަޝީނަށް އެލިބެނީ ، ރިދާ ބޭނުންނެތިގެން އެއްލައިލަން ބޭނުންވެފައި ހުންނަ ތަކެއްޗެވެ. ރިދާ ދައްކަމުންދިޔަ ވާހަކަތައް އަޑުއަހަން ، ދިލްނަޝީން މަޑުމަޑުން އޮތެވެ. އޭނާ ޢާފިޔާގާތު ބުނީ އެންމެ ވާހަކައެކެވެ. އެއީ ، ޙަމްޒާ އޭނާދެކެ ލޯބިވާ ވާހަކައެވެ. އެއީ ، ލޯބިނޫންކަން ދިލްނަޝީނަށް ވިސްނައިދެވޭތޯ ، ޢާފިޔާ މަސައްކަތް ކުރަމުން ގެންދިޔައެވެ.
އެއީ ވަގުތީ އުފަލަކަށް ޙަމްޒާކުރިކަމެއްކަމަށް ވަންޏާ ، އޭނާގެ ކައިވެނީގެ ވާހަކަ ، ޙަމްޒާގެ މައިންބަފައިންގާތު ބުނާނެތޯ ދިލްނަޝީން ސުއާލުކުރިއެވެ. ކައިވެނީގެ ވާހަކަ ، ޙަމްޒާ އޭނާގެ މައިންބަފައިންގާތު ބުނީމަ އެވީ ކިހިނެއް ހެއްޔެވެ ؟ މުޅި ގެ އެއޮތީ އެކަމުގެ ނުތަނަވަސްކަމުގައި ބިރުވެރި ކިއްލާއަކަށް ވެފައެވެ. ގޭތެރޭގައި ، އައްވަލާއި މަންމަ އެތިބީ ހަދާނެގޮތް ބޮޑުވެ ، ރޯލަރޯލައެވެ. ޙަމްޒާމެންގެ ގޭގައި އޭނާގެ މައިންބަފައިން އެތިބީ ، ރުޅިގަދަވެފައެވެ. ކޮންމެ ޙާލެއްގައިވެސް ، ދިލްނަޝީނާއި ޙަމްޒާ ގުޅޭކަށް އެމީހުން އެއްބަހެއް ނުވާނެއެވެ. އެއީ މުއްސަނދި ބަޔެކެވެ. ދިލްނަޝީންމެންނަކީ ، ފަޤީރު އަދި ނިކަމެތި ބަޔެކެވެ. ތެލާއި ފެނަކީ ، ދުވަހަކުވެސް އެކުވާނެ އެއްޗެއް ނޫނެވެ.
އެގެޔަށް ފުލުހުން އެއައީ ކީއްވެތޯ ، އަވަށްޓެރިން ސުއާލު ކުރަނީއެވެ. އައްވަލާއި ދިލްނަޝީނާ ދެބެއިން ، ސިފައިންގެޔަށް ގެންގޮސް ނަފުސާނީގޮތުން އަނިޔާ ދީފިއެވެ. ދުވަހަކުވެސް ކުރިމަތިލާން ނުޖެހޭފަދަ ، ލަދުވެތިކަމަކާ ކުރިމަތިލާން އެމީހުންނަށް މަޖްބޫރު ކޮށްފިއެވެ. ދިލްނަޝީނާއި އައްވަލާ ދެމެދު އޮތް ، ލޯތްބަށް ހުރަސް އެޅިއްޖެއެވެ. އެހާބޮޑު އުއްމީދެއްގައި ކިޔަވަން ކޮލެޖަށް ގޮސްގޮސް ހުއްޓައި ، އެންމެފަހު ސެމެސްޓަރ އާ ހިސާބަށް ދިޔަތަނާ ، ދިލްނަޝީންގެ ކިޔެވުމަށް ބުރޫ އަރައިފިއެވެ. އެ ހުންނަނީ ކުދިކުދި ކަންކަން ނޫންކަމުގައި ، ޢާފިޔާ ބުނެދެމުން ގެންދިޔައެވެ. އެ ހުރިހާކަމަކީވެސް ދެޢާއިލާގެ ފެންވަރުގެ ތަފާތުން އުފަންވި ކަންކަމެވެ. ދިލްނަޝީނަކީ ، މުއްސަނދި ޢާއިލާއެއްގެ އަންހެންކުއްޖެއްނަމަ ، އެއިން އެއްވެސްކަމެއް ކުރިމައްޗެއް ނުވާނެއެވެ. ދިލްނަޝީނަށް ވިސްނައިދެވޭތޯ ، ޢާފިޔާ މަސައްކަތްކުރަމުން އެގެންދަނީ ، އެ ޙަޤީޤަތްތަކެވެ.
އެހުރިހާ ޙަޤީޤަތްތަކެއް ޤަބޫލުކޮށް ، ޙައިދަރުގެ ކައިވެންޏަށް ރުހިގެން އެގެޔަށް ދިއުމަށް ، ދިލްނަޝީނަށް ޢާފިޔާ ނަސޭޙަތްތެރި ވިއެވެ. އެހިސާބުން ، ދިލްނަޝީން ކުއްލިޔަކަށް ފުންމައިގެން ތެދުވިއެވެ. އަދި ، އެކައިވެނި ހުއްޓުވައިދިނުމަށް ޢާފިޔާގެ ކިބައިން އެދުނެވެ. ކައިވެންޏެއްކުރާކަށް ދިލްނަޝީން ބޭނުމެއް ނޫނެވެ. އެހުރިހާ ތަކުލީފެއް އެކުރިމަތިވީ ، އޭނާގެ ކައިވެނީގެ ކަންތައް އައިސްލައިގަނެގެންނެވެ. ޙައިދަރުގެ ކައިވެނީގެ ހުށަހެޅުން އެގެޔަށް ނައިނަމަ ، އެއިން އެއްވެސް ކަމަކާ ކުރިމަތިލާކަށް ، އެމީހުންނަކަށް ނުޖެހުނީހެވެ.
ދިލްނަޝީންގެ އަތް ޢާފިޔާ ފޮޅުވައިލިއެވެ. ދިލްނަޝީން ހުވާކޮށްގެން އެހުރީ ، އެޢާއިލާގެ އަބުރާއި ޢިއްޒަތް ނީލަންކިޔައި ، ވެއްޔާ މޮޑެލަންތޯ ، ޢާފިޔާ ސުއާލުކުރިއެވެ. އެހެންނޫނަސް ، ސާރާމެދުވެރިކޮށް ، އެކައިވެންޏަށް އެޢާއިލާއިން ރުހޭކަން ޙައިދަރުގެ މަންމަޔަށް މިހާރު އެއޮތީ އަންގާފައެވެ. އެކަން ދެނެއް ބަދަލެއް ނުކުރެވޭނެއެވެ.
އޭނާގެ ކައިވެނި ހުއްޓުވައިދިނުން އެދި ، ޢާފިޔާއަށް ކުރަމުންގެންދިޔަ އާދޭސް ، ދިލްނަޝީން ހުއްޓައެއް ނުލިއެވެ. އެއްވެސް ވަރަކަށް އޭނާ ނުދަންނަ އޭނާއަށްވުރެ ޢުމުރުން ދޮށީ ފިރިހެނަކާ އިންނާނީ ކިހިނެއް ހެއްޔެވެ ؟ އެއީ ކޮންކަހަލަ މީހެއްކަމެއްވެސް ދިލްނަޝީނަކަށް ނޭނގެއެވެ. ދިލްނަޝީނަށް ، އެމީހަކާ ވާހަކަ ދައްކައިލެވިފައެއްވެސް ނެތެވެ. އޭނާގެ ހިތުގައި އެއްވެސް މިންވަރެއްގެ ޖަޒުބާތެއްވެސް ، އެފިރިހެނާގެ މައްޗަށް އުފެދިފައެއް ނެތެވެ. އެއީ ޒަމާނާވެސް ގުޅޭކަމެއްނޫނެވެ. ދިލްނަޝީންގެ ހިތް އެކަމަކަށް އެއްބަހެއް ނުވާނެއެވެ.
ދިލްނަޝީންގެ ހިތުގައި ޖަޒުބާތު އުފެދިފައި އޮތް ފިރިހެންކުއްޖާ ، ދިލްނަޝީންގެ ޢާއިލާގެ އަބުރާއި ޢިއްޒަތަށް އަރައިގެންފިއެވެ. އެދެބެއިން ، ސިފައިންގެޔަށް ގެންގޮސް އަނިޔާ ދީފިއެވެ. އަވައްޓެރިންގެ ކުރިމަތީ ލަދުގަންނުވައިލައިފިއެވެ. ދިލްނަޝީނާއި މަންމަޔާ އަދި ބޭބެއާ ދެމެދު އޮތް ލޯބި ނައްތައިލައިފިއެވެ. ދިލްނަޝީންގެ ކިޔެވުމުގެ ޙަޔާތް ، ބަރުބާދުކޮށްލައިފިއެވެ. އެއިން އެއްވެސްކަމެއް ، މިވަގުތަކު ދިލްނަޝީނަކަށް ނުވިސްނޭނެއެވެ. އެކުރިމަތިވި ކަންކަމުން ، ދިލްނަޝީންގެ ފިކުރުވަނީ ބޮޑުވެފައެވެ. ހިތް ، އެންމެ ފުރިހަމަގޮތުގައި މަސައްކަތެއް ނުކުރާނެއެވެ. ސިކުނޑި އޮންނާނީ ސުމަކަށް ގޮއްސައެވެ. ނިންމޭ ނިންމުންތަކުގެ ރަނގަޅާއި ނުބައި ވަކިކުރާކަށް ، ދިލްނަޝީނަކަށް މިހާރަކު ނޭނގޭނެއެވެ. މީހަކު ބުނާ އެއްވެސް ވާހަކައެއް ޤަބޫލެއް ނުކުރެވޭނެއެވެ. ދޭ ނަޞޭޙަތެއް ބަލައެއް ނުގަނެވޭނެއެވެ. ޢާފިޔާ ކިތަންމެ ވާހަކައެއް ދެއްކިޔަސް ، އެއީ ދިލްނަޝީންގެ ހިތަށް އަސަރެއްކުރާނެ ވާހަކަތަކެއްނޫނެވެ. ޙައިދަރާ ކައިވެނިކޮށްގެން އެގެޔަށް ދިއުންނޫން އެހެންގޮތެއް ، ދިލްނަޝީނަށް ނެތްކަމުގައި ޢާފިޔާ ބުންޏެވެ. އުފާވެރި ، މުއްސަނދި ދިރިއުޅުމެއް ، އޭރަށް ދިލްނަޝީނަށް ލިބިގެންދާނެއެވެ. ދިލްނަޝީނަށް ދެރަގޮތެއްވާކަށް އެގޭގެ އެކަކުވެސް ނޭދޭނެއެވެ.
" އަދި އެއްވާހަކައެއް ބުނަން ހެއްޔެވެ ؟ އަހަރެމެންގެ ޢާއިލާގެ ހުރިހާ އަންހެންކުދިންވެސް ، ޙައިދަރާ އިންނަން ބޭނުންވިއެވެ. އެކަމަކު ، ޙައިދަރު ، އެއްވެސް އަންހެންކުއްޖަކާ ޤަބޫލެއް ނުވެއެވެ. އަންހެންކުއްޖަކާ ދިމާލަށް ބަލައިވެސް ނުލައެވެ. ޙައިދަރަށް ކަމުދިޔައީ ދިލްނަޝީނެވެ. އެއީ ސަބަބުތަކެއް އޮވެގެންކަމުގައި ޤަބޫލުކުރާށެވެ ! ފިރިހެނަކު ، އަންހެނަކު ދެކެ ލޯބިވުމުގެ މާނަ އެނގޭ ހެއްޔެވެ ؟ އެފަދަ ޙާލަތެއްގައި ، އަނބިމީހާއަށް ދޭންޖެހޭ ފުރިހަމަ އިޙްތިރާމްދީގެން ، އެފިރިހެނަކު އޭނާގެ އަނބިމީހާ ޢިއްޒަތުގައި ބަލަހައްޓާނެއެވެ. އެއްވެސް ދެބަސްވުމަކަށް އަދި ހިތްހަމަ ނުޖެހުމަކަށް ފުރުސަތެއް ނުދޭނެއެވެ. " ޢާފިޔާ ބުންޏެވެ.
އެހެނަސް ، ދިލްނަޝީނަކަށް ޙަމްޒާ ފިޔަވައި ، އެހެން އެއްވެސް ފިރިހެނަކާ ދޭތެރޭ ވިސްނާކަށް ނޭނގޭނެއެވެ. އޭނާ ދަންނަ ހަމައެކަނި ފިރިހެނަކީ ޙަމްޒާއެވެ. ޙަމްޒާނޫން އެހެން އެއްވެސް ފިރިހެންކުއްޖަކާ ދޭތެރޭ ، ދިލްނަޝީން ވިސްނާފައެއް ނެތެވެ. އެހެން އެއްވެސް ފިރިހެން ކުއްޖަކާމެދު ، އޭނާގެ ހިތުގައި އެއްވެސް ކަހަލަ ޖަޒުބާތެއް އުފެދިފައެއް ނުވެއެވެ. ފިރިހެން ކުއްޖަކު ، އެކަހަލަ ވާހަކައެއް ދައްކައިލިޔަސް ، ދިލްނަޝީން ގާތަށް އަންނަނީ ރުޅިއެވެ. ޙަމްޒާނޫން އެހެން މީހެއްގެ ތަޞައްވުރެއް އޭނާގެ ހިތަކަށް ނުވެއްދޭނެއެވެ.
ޢާފިޔާ އެބުނަނީ ، މީހެއްގެ ތަޞައްވުރު ، ދިލްނަޝީންގެ ހިތަށް ވައްދާވާހަކައެއް ނޫނެވެ. ދިލްނަޝީނަށް ވިސްނައިދެވޭތޯ ، ޢާފިޔާ މަސައްކަތް ކުރަމުން އެގެންދަނީ ވަގުތީ ޙައްލެއްނޫނެވެ. އެއީ އެކަމަށް އޮތް އެންމެ ފުރިހަމަ ދާއިމީ ޙައްލެވެ. ޢާފިޔާ ބުނަމުން އެގެންދަނީ ، ޙައިދަރާ ކައިވެނި ކޮށްގެން ދިލްނަޝީންވެސް ، ޒަވާޖީ ޙަޔާތެއްގެ ޢަމަލީ މަސައްކަތާ ކުރިމަތިލާން ޖެހިފައިވާ ވާހަކައެވެ. އެ ޙަޤީޤަތް ޤަބޫލުކޮށް ، އެކަމަށް ކުރިމަތިލާން ތައްޔާރުވާންޖެހޭ ވާހަކައެވެ. ޢާފިޔާގެ ހިތުގައިވެސް ހިތްހަމަނުޖެހުން އުފެދުނެވެ. އޭނާގެ އަޑުވެސް ބާރުވިއެވެ. ދައްތައެއްގެ ޙައިޞިއްޔަތުން އެހާ ގާތްކޮށް ، އަދި އެހާ ގިނައިރު ، އެހާލޯބިން ، އޭނާ ދެއްކި އެއްވެސް ވާހަކައެއް ، ދިލްނަޝީނަކަށް ޤަބޫލެއް ނުކުރެވުނެވެ. ނުވަތަ ، ދިލްނަޝީން އެއިނީ ، އެވާހަކަތައް ޤަބޫލުކުރެވޭފަދަ ޙާލަތެއްގައެއް ނޫނެވެ. ޢާފިޔާއަށް އެކުރެވުނީ ބޭކާރުކަމެއްކަމުގެ އިޙްސާސް ކުރެވުނެވެ. ދިލްނަޝީން ކިތަންމެ ކަންބޮޑުވެފައި ، ދެރަވެފައި އިނަސް ، އޭނާއަށް ކުރެވޭނެ އެއްވެސްކަމެއް ނެތެވެ. އިތުރަށް ދައްކާނެ މާގިނަވާހަކަތަކެއްވެސް ނެތެވެ.
ދިލްނަޝީނަށް ގެނައި ކާއެއްޗެތި ، އެނދުމަތީ ބަހައްޓާފައި ހުށްޓެވެ. ދިލްނަޝީން ކާން ބޭނުންވީމާ ކާށޭ ބުނެ ، ޢާފިޔާ އެކޮޓަރިން ނުކުމެގެން ދިޔައެވެ. ހެޔޮ ހިތަކައިގެން ، އެގޭތެރެއިން ، އޭނާއާ ވާހަކަދައްކައިލަނީ ހަމައެކަނި ފަހަރި ، ޢާފިޔާއެވެ. ބޭބެއާއި މަންމަ އެތިބެނީ އޭނާދެކެ ރުޅިއައިސް ރަތްވެފައެވެ. ދިލްނަޝީނަށް ހަދާނެގޮތް ބޮޑުވިއެވެ. އެއިންގޮތަށް ގަބުވެފައި އިނދެ ، އަނެއްކާވެސް އެނދުމައްޗަށް ވެއްޓިގަތެވެ. ( ނުނިމޭ )
ވަރަށްވެސް ރީތި ޝުކުރަން