ގޯއްޗާއި ފްލެޓް ލިބޭ މީހުންގެ ލިސްޓު މިއަދު އިއުލާން ކުރަން ނިންމައިފިއެވެ.
ރައީސުލްޖުމްހޫރިއްޔާގެ އޮފީހުން ވިދާޅުވީ މިކަމާއިގުޅޭގޮތުން ބާއްވާ ޚާއްސަ ނޫސްވެރިންގެ ބައްދަލުވުން މިއަދު ހަވީރު 4 ޖަހާއިރު ރައީސުލްޖުމްހޫރިއްޔާގެ އޮފީހުގައި އޮންނާނެ ކަމަށެވެ.
މިނޫސްވެރިންގެ ބައްދަލުވުމުގައި މިނިސްޓަރ އޮފް ނޭޝަނަލް ޕްލޭނިންގ، ހައުސިންގ އެންޑް އިންފްރާސްޓަކްޗަރއާއި ގެދޮރުވެރިންގެ ކޮމިޓީގެ މެމްބަރު ބައިވެރިވެވަޑައިގަންނަވާނެކަމަށް ރައީސް އޮފީހުން ވިދާޅުވެއެވެ.
މި މަޝްރޫއަކީ މާލެ ސަރަޙަށްދަށް ކުރިމަތިވެފައިވާ ބޯހިޔާވަހިކަމުގެ މައްސަލައަށް ޙައްލެއް ގެނައުމަށް ސަރުކާރުން ކުރިއަށްގެންދަވ މަޝްރޫއެކެވެ. އަދި މާލޭގެ ރަށްވެހިންނަށް ގޯއްޗާއި ފްލެޓު ދެއްވުމަކީ ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު ރިޔާސީ ވަޢުދުފުޅެކެވެ.
މިގޮތުން މާލެ ސަރަހައްދުން މާލޭގެ ރައްޔިތުންނަށް 5000 ގޯތި ދެއްވުމަށް ނިންމަވާ އެކަން ރައީސް ސާލިހު ވަނީ އިޢުލާންކުރައްވާފައެވެ.
މީގެ އިތުރުން 4000 ފްލެޓު ތަރައްޤީކުރުމަށް ނިންމަވާ، މީގެތެރެއިން 3000 ގޯއްޗާއި 4000 ފްލެޓަށް ކުރިމަތިލުމަށް ސަރުކާރުން އިއުލާން ކުރެއްވީ މިދިޔަ އަހަރުގެ ޖޫން މަހު އެވެ.
މި މަޝްރޫޢަށް ކުރިމަތިލުމަށް ހުޅުވާލި ފުރުސަތު މިދިޔަ އަހަރުގެ ސެޕްޓެމްބަރު މަހުގެ ތެރޭގައި މުއްދަތު ހަމަވެފައިވާއިރު، ގޯއްޗަށް އެދި 15000 އަށްވުރެ ގިނަ މީހުން ވަނީ ކުރިމަތިލާފައެވެ. އަދި ފްލެޓަށް އެދި 20000 އަށްވުރެ ގިނަ މީހުން ވަނީ ކުރިމަތިލާފައެވެ.
މިމަޝްރޫޢުގެ ދަށުން ގޯތި ދޫކުރުމަށް ހަމަޖެހިފައިވަނީ ހުޅުމާލެއާއި، ގުޅޭފަޅުންނެވެ. މިގޮތުން ހުޅުމާލެއިން 1000 ގޯތި އަދި ގުޅީފަޅުން 2000 ގޯތި ދޫކުރުމަށްވަނީ ނިންމަވާފައެވެ. މީގެއިތުރުން މިމަޝްރޫޢުގެ ދަށުން ތަރައްޤީކުރުމަށް ހަމަޖެހިފައިވާ 4000 ފްލެޓު ހުޅުމާލޭ ދެވަނަ ފިޔަވަހީގައި އިންޑިއާގެ 2 ކުންފުންޏަކާއި ޙަވާލުކޮށްގެން އަންނަނީ ތަރައްޤީކުރަމުންނެވެ.
