އިރުއަރާ އޮއްސެއެވެ. ހަނދުއަރާ އޮއްސެއެވެ. އެކަމުގެ އިޙްސާސެއް ނުވިޔަސް ދުނިޔެ އެބަ ބުރުޖަހައެވެ. އެއީ ދުނިޔެ ހިނގުމުގައި އޮތް ޤުދުރަތީ ނިޒާމެވެ. ﷲ ގެ ޤުދުރަތްތެރިކަމެވެ. ކޮންމެ އިންސާނަކަށްވެސް ދިރި ދުނިޔޭގައި އުޅުމުގެ ޙައްޤު އެބައޮތެވެ. ނޭނގިގެން އުޅެން މިޖެހެނީ ދުނިޔޭގައި އުޅެންވީ ގޮތެވެ. ދުނިޔޭގައި އުޅެންވީގޮތަކީ ކޮބައި ހެއްޔެވެ ؟ އެމީހަކު ހިތަށް އެރިގޮތަކަށް ހެއްޔެވެ ؟ މީހުން ބުނާ ގޮތްގޮތަށް ހެއްޔެވެ؟ ނޫނެކެވެ.
ދުނިޔޭގައި އުޅެންވީގޮތް ﷲ ސުބްޙާނަހޫ ވަތަޢާލާވަނީ އަންގަވާފައެވެ. އެކަލާނގެ ކަލާމްފުޅު ، ކީރިތި ޤުރުއާނުގެ މޫރިތި އާޔަތްތަކުންނެވެ. ކީރިތި ޤުރުއާން ބާވައިލެއްވުނީ ، ނަބީކަމާއި ރަސޫލުކަން ޚަތިމުކުރެއްވި މިއުއްމަތުގެ މާތް ނަބިއްޔާ މުޙައްމަދު ޞައްލަﷲ ޢަލައިހި ވަސައްލަމަގެ މައްޗަށެވެ. އެކަލޭގެފާނުވަނީ ، ކީރިތި ޤުރުއާނުގެ ޙުކުމްތައް ، މީސްތަކުންނަށް ތަފްޞީލުކޮށްދެއްވާފައެވެ. އިންސާނާ ދިރިއުޅެންވީގޮތް ، އެކަލޭގެފާނުގެ ސީރަތުން ، ދިރިއުޅުއްވި ގޮތްކޮޅުން ، ނަމޫނާ ދައްކަވައި މީސްތަކުންނަށް އަންގަވައި ދެއްވާފައި ވެއެވެ. އެހެންކަމުން ، އިންސާނާ ދިރިއުޅެންވީގޮތް ނޭނގިގެން އުޅޭކަށް ނުޖެހެއެވެ.
އިންސީންނާއި ޖިންނީން ހެއްދެވީ ﷲ ސުބްޙާނަހޫ ވަތަޢާލާއެވެ. އިންސީންވެސް އަދި ޖިންނީންވެސް ހެއްދެވީ ، އެކަލާނގެޔަށް އަޅުކަން ކުރުމަށެވެ. ކޮންމެ ހެޔޮ ޢަމަލަކީ އަޅުކަމެކެވެ. ކޮންމެ ނުބައި ޢަމަލަކީ ފާފައެކެވެ.
ދިވެހިންނަކީ އިސްލާމްދީނަށް ބޯލަނބައި އެދީނަށް ތަބާވެގެން ދިރިއުޅޭ ބަޔެކެވެ. މީގެ އަށްސަތޭކަ އަހަރުކުރިން ދީނެއްގެ ގޮތުގައި އިސްލާމްދީން އިޚްތިޔާރުކޮށް ، ސުންނަތް ޖަމާޢަތުގެ މުސްލިމުންގެ ގޮތުގައި ދިވެހިން ތަބާވަމުން އައީ ޝާފިޢީ މަޛުހަބަށެވެ. އިސްލާމްދީނުގެ ހަތަރު މަޛުހަބުގެ ގޮތުގައި ބެލެވެމުންދަނީ ، ޝާފިޢީ މަޛުހަބާއި ، ޙަމްބަލީ މަޛުހަބާ އަދި މާލިކީ މަޛުހަބާއި ޙަނަފީ މަޛުހަބެވެ. މި ހަތަރު މަޛުހަބު ނިސްބަތްވެގެންވަނީ ހަތަރު އިމާމުންނަށެވެ. މި ހަތަރު މަޛުހަބަކީވެސް އިސްލާމީ އުޞޫލުތަކުގެ މައްޗަށް ބިނާވެގެންވާ ހަތަރު މަޛުހަބެކެވެ. ތަފާތުވެގެންވަނީ ވަރަށް ކުދިކުދި ކަންތައްތަކެކެވެ.
ތަފާތު މަޛުހަބުތަކަކަށް ނިސްބަތްވާ އާބާދީއެއް އެއްތަނެއްގައި ދިރިއުޅޭއިރު ، އަޅުކަމުގެ ކުދިކުދި ތަފާތާއި ، ދީނީ ވިސްނުމުގެ ކުދި ތަފާތު ހުންނާނެއެވެ. އެތަފާތު ތަކަކީ ، އިސްލާމްދީނުން ބޭރުވާ ތަފާތުތަކެއްނޫނެވެ. ދީނަކީ އެއްދީނެކެވެ. ތަފާތުވަނީ ދީނަށް އުޅޭ ގޮތާއި ވިސްނުމެވެ. މިތަފާތުތައް ދިވެހިރާއްޖޭގެ މާޙައުލުން ފެންނަންފެށީ 1980 ގެ އަހަރުތަކުގެ ކުރީކޮޅުގައެވެ.
ޝާފިޢީ މަޛުހަބަށް ތަބާވާ ބަޔަކަށް ، އެހެން މަޛުހަބަކަށް ތަބާވާ ބަޔެއްގެ ދީނީ ޢަމަލުތައް ތަފާތު ވެދާނެއެވެ. އެއީ މައްސަލައެއް ނޫނެވެ. މިސާލަކަށް އަޅުކަންކުރުމުގައި ، ދިވެހިން ކުރިން ކުރަމުން އައިގޮތަށް ، މިހާރުދެވޭ ދީނީ ފަތުވާގެ ދަށުން ، ޝާފިޢީ މަޛުހަބުގެ މީހުންނަށް ތަފާތުތަކެއް ފެނިދާނެއެވެ. އެއީ އާކަންތައްތަކެއްކަމަށް ފެނިދާނެއެވެ. ޝާފިޢީ މަޛުހަބަށް ތަބާވާމީހުންނަށް ، އެހެން މަޛުހަބަކަށް ތަބާވާ ބަޔަކު އަޅުކަންކުރާއިރު އާކަންތައްތަކެއް ފެނިދާނެއެވެ. އެކަމަކު ، އޭގެ މާނަޔަކީ ، ޝާފިޢީ މަޛުހަބުގައި އަޅުކަންކުރަން އާކަންތައްތަކެއް ތަޢާރުފް ވުމެއްނޫނެވެ. ޝާފިޢީ މަޛުހަބަށް ތަބާވާ ބަޔަކު ، އަޅުކަން ކުރުމުގައި އަދި ދީނީ އެހެންކަންކަން ކުރުމުގައިވެސް ، އެހެން މަޛުހަބުތަކަށް ތަބާވާމީހުންކުރާ ހުރިހާކަމެއް ، އެމީހުން އެކުރާ ގޮތަކަށް ކުރުން ލާޒިމެއްނޫނެވެ.
މިސާލަކަށް ، ނަމާދުގައި އާ ކަންތައްތަކެއް ނެތްކަން ބަޔާންކުރައްވައި ، މިނިސްޓްރީ އޮފް އިސްލާމިކް އެފެއާޒުން ފޮތެއް ނެރުއްވާފައި ވެއެވެ. އިސްލާމީ ފަތުވާދޭ އެންމެ މަތީ މަޖިލީހުންވަނީ ، ދީނީ ޚިޔާލު ތަފާތުވާ އއަދި ފެންނަމުންދާ ކަންކަމުގެ މައްޗަށް ، އެ މަޖިލީހުންވަނީ ތަފާތު ފަތުވާ ނެރުއްވާފައެވެ.
އެހެންކަމުން އުޅެންވީގޮތް ވަރަށް ސާފެވެ. ޢިލްމުވެރިންނަކީ ވަރަށް މާތް ބަޔެކެވެ. ނަމަވެސް ، މީސްތަކުން އުޅެންވީގޮތް ، ދީނީ ޢިލްމުގެ ޒަރީޢާއިން ދަސްކޮށްދެއްވާ ބޭފުޅުން ، ވިސްނައިވަޑައިގަންނަވަންޖެހޭ ކަންތައްތަކެއް އެބަހުށްޓެވެ. އެންމެ މުހިންމު ކަމަކީ ހަތަރު މަޛުހަބު އޮތްކަން ހިތްޕުޅުގައި ބޭއްވެވުމެވެ. އެހެން މަޛުހަބުތަކުގެ އަހުލުވެރިންނަށް އެމަޛުހަބުތަކަށް ތަބާވުމުގެ ޙައްޤު އޮންނަންޖެހޭކަން ޤަބޫލުކުރެއްވުމެވެ. ވަކި މަޛުހަބެއްގައި އޮންނަގޮތެއް އެއީ ، ދީނާ ޚިލާފު ގޮތްތަކެއްކަން ކަނޑަނޭޅުއްވުމެވެ. ދީނީ ޢިލްމުވެރިންގެ މައްޗަށް މީސްތަކުންކުރާ އިތުބާރު އިތުރުވެ ، އަގު ހިފެހެއްޓި ، ޢިލްމުވެރިންނަށް އިޙްތިރާމް ލިބުމަށްޓަކައި ، ޢަމަލުކުރަންޖެހޭ ކަންތައްތަކެއް ހުންނާނެކަން ޤަބޫލުކުރެއްވުމެވެ. ދުލާއި ޤަލަމާ އަދި ޢަމަލުން ، ޢިލްމުވެރިންގެ އަގާއި ޤަދަރު ހިފެހެއްޓެވުމެވެ. ދީނީ އެއްބައެއް ވަންތަކަން ދެމެހެއްޓެވުމެވެ. ދީނީ ކަންކަމުގައި ހައްދު ފަހަނަޅައި ވަޑައިނުގަތުމެވެ. އެހެނީ އިސްލާމްދީނަކީ ލުއި ފަސޭހަ ދީނެކެވެ. މަޖުބޫރުކުރެވިގެން ، ހިތަށް އުނދަގޫކޮށްގެން އުޅެން އޮތްދީނެއްނޫނެވެ.
ދާދި މިދާކަށްދުވަހު ، މީސްމީޑިއާއިން ފެނުނު ޚަބަރެކެވެ. ރައީސުލްޖުމްހޫރިއްޔާ މަޤާމުން ދުރުކުރަން ދީނީ ޖަމާޢަތަކުން ގޮވައިލި ގޮވައިލުމެކެވެ. ސަރުކާރުގެ އިސްވެރިން ޣަޒަލުކުރަން ޝެއިޚަކު ގޮވައިލައިފާ ގޮވައިލުމެކެވެ. ރައީސުލްޖުމްހޫރިއްޔާއަކީ ، އިންތިޚާބަކުން ރައްޔިތުންގެ އަޣުލަބިއްޔަތުން އެ މަޤާމަށް ހޮވިވަޑައިގެން ހުންނެވި ބޭފުޅެކެވެ. އެންމެ މީހަކު ނުކުމެ އެހެން ގޮވައިލައިގެން އަދި ، އެކަމެއް ނުވާނެއެވެ. އެކަންކުރާ މީހަކަށް މީހުންގެ މަލާމާތް ރައްދުވާނެއެވެ. އަދި ނަފުރަތުކުރާ ބަޔަކުވެސް ތިބެދާނެއެވެ. ދީނީ ޢިލްމުވެރިންނަކީ ހައްދު ފަހަނަޅައިދާ ބައެއްނޫނެވެ. ހަރުކަށި ފިކުރުގެ ބައެއްނޫނެވެ. މާތްވެގެންވާ އިސްލާމްދީނުގެ ފިކުރަކީ ހަރުކަށި ފިކުރެއްނޫނެވެ. އެއީ އޯގާތެރިކަމާއި ރަޙުމުގެ ދީނެކެވެ.
ފަހުޒަމާނަކީ ދީނާޚިލާފު އެތައް ކަންތައްތަކެއް އުފެދި މީސްތަކުން މަގުފުރެދިގެންދާނެ ޒަމާނެއްކަން އެންމެ ބޮޑަށް އެނގިވަޑައިގަންނަވާނީ ދީނީ ޢިލްމުވެރިންނަށެވެ. އުޅެންވީ ގޮތެއް ނޫޅެންވީގޮތެއް ނޭނގޭ ހިސާބަށް ދިޔައިމަ ، މީސްތަކުންނަށް މަގުދެއްކޭއިރު ، ހަރުކަށި ، މުރަނަކަމަކުން އެމީހުންގެ ވިސްނުމާ ކުޅެވުމަކީ ، އުސޫލާ ޚިލާފްކަމެއްކަމަށް ދެކޭބަޔަކުވެސް ތިބެދާނެއެވެ. ދުނިޔެ ހިނގާގޮތް ދަސްކޮށްގެންނޫނީ ، ހަމަޖެހިލައިގެން ދުނިޔެއަކު ނޫޅެވޭނެއެވެ.
