ކ. ގުރައިދޫ ބައި-އިލެކްޝަން ކާމިޔާބު ކުރެއްވި ޝާޒު މެމްބަރުކަމުގެ ހުވާ ކުރައްވައިފިއެވެ.
އޭނާ ހުވާ ކުރެއްވީ މިއަދު ހެނދުނު 10:00 ގައި ރައްޔިތުންގެ މަޖިލީހުގައި ބޭއްވި ރަސްމިއްޔާތެއްގައެވެ.
އޭނާއަށް މެމްބަރު ކަމުގެ ހުވާލައި ދެއްވީ ސުޕްރީމް ކޯޓުގެ ފަނޑިޔާރު އާއިޝާ ޝުޖޫން މުހައްމަދު އެވެ.
ހުވާ ކުރެއްވުމަށްފަހު، މިއަދުގެ ޖަލްސާގައި ޝާޒް ބައިވެރިވެ ވަޑައިގެންފައިވާތީ މަޖިލިހުގެ ރައީސް، މުހައްމަދު ނަޝީދު ވަނީ މެމްބަރަށް މަރުހަބާ ވިދާޅުވެފައެވެ.
ޝާޒްގެ ގޮނޑިއާއެކު މަޖިލީހުގައި ތިބި އެމްޑީޕީގެ މެމަބަރުންގެ އަދަދު ވަނީ 68 އަށް ބަދަލުވެފައެވެ.
މަޖިލިހުގައި ދެން ތިއްބެވީ ޕީޕީއެމްގެ 5 މެންބަރުންނާއި ޖޭޕީގެ 2 މެންބަރުންނާއި ޕީއެންސީގެ 3 މެންބަރުންނާއި އެމްއެންޕީގެ 3 މެންބަރުންނާއި އެމްޑީއޭގެ 2 މެންބަރުންނާއި ވަކިޕާޓީއަކަށް ނިސްބަތްނުވާ 4 މެންބަރުންނެވެ.
ގުރައިދޫ ދައިރާގެ ބައި އިލެކްޝަން ސަރުކާރުގެ މައިޕާޓީ އެމްޑީޕީ އަދި ރައީސް ސޯލިހުގެ ފަޅީގައި ހުންނެވި މެންބަރު ޝާޒް ކާމިޔާބު ކުރެއްވީ އެދާއިރާ ފާއިތުވި 3 ދައުރުގައިވެސް ތަމްސީލުކުރަމުން އައި ޕީޕީއެމް ބަލިކޮށްގެންނެވެ.
ޝާޒް ގޮނޑި ހޯއްދެވީ ޕީޕީއެމްގެ ކެންޑިޑޭޓް ހުސެއިން ރިޒާ އާއި އެމްއެންޕީގެ ކެންޑިޑޭޓް އަލީ އާރިފް އާއި ވާދަކުރައްވައިގެންނެވެ.
މި ދާއިރާގެ ބައި އިލެކްޝަން ބާއްވަން ޖެހުނީ ކުރިން އެދާއިރާ ތަމްސީލުކުރެއްވި މެންބަރު އިބްރާހިމް ރިޒާ 23 ފެބުރުއަރީ 2023 ގައި އަވަހާރަވުމާއި ގުޅިގެންނެވެ.
