މިޔަންމާގައި ވެރިކަންކުރާ އަސްކަރީ ސަރުކާރުގެ ސިފައިން އެގައުމުގެ އަވަށަކަށް ދިން ވައިގެ ހަމަލާތަކެއްގައި ސަތޭކައެއްހާ މީހުން މަރުވެއްޖެއެވެ. މަރުވި މީހުންގެ ތެރޭގައި ގިނަ އަދަދެއްގެ ކުޑަކުދިންވެސް ހިމެނެއެވެ. އެއީ ނެށުއްގައި ބައިވެރިވަމުން ދިޔަ ކިޔަވާކުދިންތަކެކެވެ.
މިޔަންމާގެ އަސްކަރިއްޔާއިން ފަހުން އެއްބަސްވެފައިވާ ގޮތުގައި އިއްޔެ (އަންގާރަ ދުވަހު) ހެނުދުނުގެ ވަގުތެއްގައި ހަމަލާދީފައި ވަނީ މެދުތެރޭ ސަގައިންގް ސަރަހައްދުގެ ކަންބަލޫ އަވަށުގައި ސަރުކާރާ ދެކޮޅު މީހުން އިންތިޒާމުކުރި ހަފްލާއެއް ކުރިއަށް ދިޔަ ހޯލަކަށެވެ.
މިހަމަލާއާ ގުޅިގެން ބައިނަލްއަގުވާމީ ފަރާތްތަކުން ދަނީ އެކަން ކުށްވެރިކުރަމުންނެވެ.
ސެކްރެޓަރީ ޖެނެރަލް "މިޔަންމާގެ އަސްކަރިއްޔާއިން މިއަދު ދިން ހަމަލާ ވަރަށް ބޮޑަށް ކުށްވެރިކުރައްވާ." އެކުވެރި ދައުލަތްތަކުގެ ޖަމްއިއްޔާ (އދ.) ގެ ސެކްރެޓަރީ ޖެނެރަލް އެންޓޯނިޔޯ ގުޓަރޭޝްގެ ތަރުޖަމާނު ސްޓެފޭބް ޑުޖާރިކް ނެރުއްވި ބަޔާނެއްގައި ބުނެފައި ވެއެވެ.
އދ. ގެ ކޮމިޝަނާ ފޯ ހިއުމަން ރައިޓްސް ވިދާޅުވި ގޮތުގައި ގިނަ އަދަދެއްގެ ކިޔަވާކުދިންތަކެއް ހަރަކާތްތެރިވަމުން ދިޔަ ހަފްލާއަކަށް ހަމަލީ ގިނަ ބަޔަކު މަރާލުމަކީ ބިރުވެރި އަމަލެކެވެ. އަދި އެކަން ކުރި ބަޔަކު އިންސާފުގެ ކުރިމައްޗަށް ގެންނަން ޖެހެއެވެ.
2021 ވަނަ ގެނައި އިންގިލާބެއްގައި މިޔަންމާގެ އަސްކަރިއްޔާއިން ވެރިކަމަށް އަތްގަދަކުރި ފަހުން، އެވެރިކާ ދެކޮޅަށް މަސައްކަތްކުރާ ފަރާތްތައް އިތުރުވަމުންދާތީ، އެފަދަ ފަރާތްތައް ބަލިކޮށްލުމަށް ވައިގެ ހަމަލާދިނުމަކީ މިޔަންމާގެ ސިފައިން ކުރަމުން އަންނަ ކަމެކެވެ. ފާއިތުވި ދެ އަހަރު ދުވަހުގެ ތެރޭގައި ދިން މިފަދަ ހަމަލާތަކުގައި 3 ހާހަށްވުރެ ގިނަ މީހުން މަރުވެފައިވާ ކަމަށް އަންދާޒާ ކުރެވެއެވެ.
އިއްޔެ ހަމަލާދިން މަންޒަރު ދުށް މީހަކު ބޭރުގެ ނިއުސް އެޖެންސީއަކަށް ކިޔައިދިން ގޮތުގައި ހެނދު 8 ޖަހިއިރު ކުރިއަށް ދިޔަ އެއްވުން އޮތް ހޯލަށް ހަމަލާދިން އަސްކަރީ މަތިންދާބޯޓު ވަނީ ސީދާ އެތަނުގެ މައްޗަށް ބޮމެއް ވައްޓާލާފައެވެ. އޭރު އެ ހޯލުގައި ކުރިއަށް ދިޔައީ އިދިކޮޅު ހަރަކާތުގެ އޮފީހެއް އެ އަވަށުގައި ހުޅުވުމުގެ ރަސްމިއްޔާތެވެ.
އޭނާ އިތުރަށް ކިޔައިދިން ގޮތުގައި ބޮމުގެ ހަމަލާގެ ބައިގަޑިއެއްހާ އިރު ފަހުން އައި ހެލިކޮޕްޓަރަކުން ވަނީ އެތަނަށް ބަޑިވެސް ޖަހާފައެވެ.
މަންޒަރު ދުށް ބައެއް މީހުން ސިފަކުރި ގޮތުގައި އެތަނުން ފެންނަނީ ބިރުވެރި މަންޒަރެކެވެ. ހަމަލާގެ ޝިކާރައަކަށް ވީ މީހުންގެ ހަށިތައް ކުދިކުދިވެ ބުރައިގެން ގޮސްފައިވާ މަންޒަރެވެ.
