ސައޫދީ އަރަބިއްޔާގެ ވަލީއަހުދު މުޙައްމަދު ބިން ސަލްމާންގެ 'ވިޝަން 2030' މަޝްރޫއުގެ ބައެއްގެ ގޮތުގައި މުޅިން އާ ގައުމީ އެއާލައިނެއް އުފައްދައި އެކަން އިއުލާންކޮށްފިއެވެ.
ގަލްފުގެ ގައުމުތަކަށް ނިސްބަތްވާ، ދުނިޔޭގެ އެންމެ ބޮޑެތި އެއާލައިންތައް ކަމުގައިވާ ޤަޠަރް އެއާވޭޒް، އެމިރޭޓްސް އަދި އިއްތިހާދް އެއާވޭޒްއާ ވާދަކުރާނެ ކަމަށް ބެލެވޭ މި އެއާލައިންގެ ނަމަކީ ރިޔާޟް އެއާ އެވެ. ސައޫދީ އަރަބިޔާގެ ސޮވެރިން ފަންޑު، ޕަބްލިކް އިންވެސްޓްމަންޓް ފަންޑު(ޕީއައިއެފް) އިން އުފައްދައި ހިންގާ މި އެއާލައިނުން ކުރިއަށް އޮތް 7 އަހަރު ތެރޭގައި ދުނިޔޭގެ އެކިކަންކޮޅުތަކުގެ 100 މަންޒިލަކަށް ދަތުރުކުރާނެއެވެ.
އާ އެއާލައިންގެ ޗެއާމަނަކީ ޕީއައިއެފްގެ ގަވަރުނަރު ޔާސިރު އައްރުމައްޔާންއެވެ. އަދި ސީއީއޯއަކަށް ހަމަޖައްސާފައި ވަނީ ޓޯނީ ޑަގްލަސްއެވެ. އޭނާ ކުރިން ހުންނެވީ އަބޫދާބީގެ ގައުމީ އެއާލައިން އިއްތިހާދް އެއާވޭޒްގެ ސީއީއޯއަކަށެވެ.
ސައުދީ އަރަބިއްޔާއަކީ ވައިގެތަދުރުފަތުގެ ހަބަކަށް ހެދުމުގެ އަމާޒާއެކު އުފެއްދި އާ އެއާލަނަކީ ޤަޠަރް އެއާވޭޒްއާއި، އެމިރޭޓްސްއާއި، އިއްތިހާދް އެއާވޭޒް ފަހަތަށް ޖައްސާލައި، ގަލްފުގެ އެންމެ އާމްދަނީ ބޮޑު އެއާލައިނަށް ވާނެކަމަށް ސައޫދީން އުއްމީދުކުރާ ރިޔާޟް އެއާ އިން އެގަމުގެ އިގުތިސާދަށް ތެލާ ގުޅުން ނެތް އާމްދަނީގެ ގޮތުގައި އަހަރަކު 20 ބިލިއަން ޑޮލަރު ވައްދާނެ ކަމަށް ބެލެވޭއިރު، އެ އެއާލައިނުން ސީދާ އަދި ނުސީދާ ގޮތުގައި 2 ލައްކަ މީހުންނަށް ވަޒީފާގެ ފުރުސަތު ލިބޭނެކަމަށް ބެލެވެއެވެ.
ފާއިތުވި ނޮވެންބަރު މަހު ސައޫދީ އަރަބިއްޔާއިން ވަނީ ވެރިރަށް ރިޔާޟުގައި ބައިނަލްއަގުވާމީ އާ އެއާޕޯޓެއް ހަދަން ނިންމާފައިވާކަން އިއުލާންކޮށްފައެވެ. 57 އަކަކިލޯމީޓަރުގެ ސަރަހައްދަކަށް ފެތުރިފައިވާ، އަހަރަކު 120 މިލިއަން ދަތުރުވެރިންނަށް ޚިދުމަތް ދެވޭ މި އެއާޕޯޓު ވެގެންދާނީ ރިޔާޟް އެއާގެ މައި މަރުކަޒަށެވެ.
އެމެރިކާގެ ބައެއް ނޫސްތަކުން ބުނެފައިވާ ގޮތުގައި އެމެރިކާގެ ބޮއިންގް ކުންފުންޏާއި، ޕީއައިއެފް ވަނީ އާ އެއާލައިނަށް މަތިންދާބޯޓު ގަތުމަށް 35 ބިލިއަން އެމެރިކާ ޑޮލަރުގެ އެއްބަސްވުމަކާ ދާދީ ގާތުގައެވެ. އާ އެއާލައިނަށް ގަންނާނީ ކޮން މަރުކާއެއްގެ މަތިންދާބޯޓުތަކެއްކަން ނޫސްތަކުން ހާމަކޮށްފައެއް ނުވެއެވެ.
ސައޫދީ އަރަބިއްޔާއިން ބުނެފަވާ ގޮތުގައި ރިޔާޟް އެއާ ގައުމީ އެއާލައިނެއްގެ ގޮތުގައި ދަތުރުކުރަން ފެށިއަސް މިހާރުގެ ގައުމީ އެއާ ލައިން ސައޫދީ އަރަބިއަން އެއާލައިންސް (ސައޫދިއްޔާ) ވެސް ގައުމީ އެއާލައިނެއްގެ ގޮތުގައި ކުރިއަށް ދާނެއެވެ. ސައޫދިއްޔާއިން 90 މަންޒިލަކަށް ދަތުރުކުރާއިރު، އެ އެއާލައިންގައި 150 މަތިންދާބޯޓު އޮވެއެވެ. އޭގެ ތެރޭގައި އެއާބަސް އޭ320، އޭ321، އޭ330، ބޮއިންގް 747، 777 އަދި 787 ޑްރީމްލައިނާ މަތިންދާބޯޓުތައް ހިމެނެއެވެ.
