ގަތަރުގައި މިހާރު ކުރިއަށް ދާ ފީފާ ވޯލްޑް ކަޕް 2022 ގެ ގްރޫޕް ޑީ ގައި މިރޭ ޑެންމާކާއި ދެކޮޅަށް ކުޅުނު މެޗު ކާމިޔާބު ކޮށް އެންމެ ފަހުގެ ވޯލްޑް ޗެމްޕިއަން ފްރާންސް މުބާރާތުގެ ދެވަނަ ބުރަށް ދަތުރު ކޮށްފިއެވެ.
ސްޓޭޑިއަމް 974 ގައި ޑެންމާކާއި ދެކޮޅަށް ކުޅުނު ގުރޫޕް ސްޓޭޖުގެ ދެވަނަ މެޗު ފްރާންސް އިން ކާމިޔާބު ކުރީ 1-2 އިންނެވެ.
ގުރޫޕް ސްޓޭޖުގައި ކުޅުނު ދެމެޗުން ވެސް މޮޅުވެ ދެވަނަ ބުރުން ޖާގަ ހޯދި ފުރަތަމަ ޓީމަކަށް ފްރާންސް ވިއިރު، އެ ޓީމުން ދެވަނަ ބުރު ކަށަވަރު ކުރީ ގުރުޕް ސްޓޭޖުގައި އަދި ނުކުޅެ ބާކީ އެއް މެޗު އޮށްވައެވެ. ފްރާންސް އަތުން ބަލިވި ޑެންމާކަށް ދެ މެޗުން ލިބިފައިވަނީ އެންމެ ޕޮއިންޓެވެ. އެހެންކަމުން ގްރޫޕް ސްޓޭޖްގައި އެ ޓީމު ކުޅޭ އެންމެ ފަހު މެޗުގައި އޮސްޓްރޭލިއާ އަތުން މޮޅެއް ހޯދުމަކީ ޑެންމާކަށް މަޖުބޫރު ކަމެކެވެ.
މިރޭގެ މެޗުގައި ރަނގަޅަށް ކުޅެ ގިނަ ހަމަލާތަކެއް އުފެއްދީ ފްރާންސުންނެވެ. އެގޮތުން ޑެމްބެލޭ އަދި ގްރީޒްމަން ތަނަވަސް ކޮށްދެމުން ދިޔަ ފުރުސަތުތަކުން އެމްބާޕޭ އާއި އޮލިވާ ޖިރޫޑް ފޮނުވަމުން ގެންދިޔަ ހަމަލާތައް ޑެންމާކުގެ ގޯލާއި އަމާޒުވި ނަމަވެސް ގޯލް ކީޕަރު ޕީޓާ ސްމައިކަލް ވަނީ މި ހަމަލާތައް ނާކާމިޔާބު ކޮށްލާފައެވެ.
ފްރާންސުން މެޗުގެ ލީޑު ނެގީ 61 ވަނަ މިނިޓުގައި ކީލިއަން އެމްބާޕޭ ކާމިޔާބު ކޮށްދިން ލަނޑުންނެވެ. މި ލަނޑު އެމްބާޕޭ ކާމިޔާބު ކޮށްދިނީ ތިއޯ ހެނާންޑޭޒްގެ އެހީތެރިކަމާއި އެކުގައެވެ. އޭގެ ހަމިނެޓު ފަހުން ޑެންމާކުން ނަތީޖާ އެއްވަރު ކުރިއިރު، މި ލަނޑު ޑެންމާކަށް ޖަހައިދިނީ އެންޑާސަން ނަގައިދިން ކޯނަރަކުން ޑިފެންޑަރު ކްރިސްޓެންސަންއެވެ.
އޭގެ ފަހުން ފްރާންސް މޮޅުވި ލަނޑު މެޗުގެ 86 ވަނަ މިނިޓުގައި ޖަހައިދިނީ އެމްބާޕޭ އެވެ. މިއީ މި މުބާރާތުގައި އޭނާ ޖެހި 3 ވަނަ ލަނޑެވެ. އަދި ފްރާންސް ޓީމަށް ކުޅުނު 12 މެޗުގައި ޖަހައިދިން 14 ވަނަ ލަނޑެވެ.
