އާރްޓީއެލް ލޯންޗު ފެރީގެ ޚިދުމަތް އިތުރު އަތޮޅެއްގައި ފަށައިފި

ރާއްޖެ ޓްރާންސްޕޯޓް ލިންކް (އާރުޓީއެލް) އިން އާރްޓީއެލް ލޯންޗު ފެރީގެ ޚިދުމަތް އިތުރު އަތޮޅެއްގައި ފަށައިފި އެވެ.

އެ ޚިދުމަތް ފަށާފައިވަނީ ފާދިއްޕޮޅުގަ އެވެ.

ތިން ރޫޓަކުން ދަތުރުތައް ދަނީ ބާއްވާއިރު، ފުރަތަމަ ރޫޓުގައި ވަނީ ހިންނަވަރު، ނައިފަރު އަދި ފެލިވަރެވެ. ދެވަނަ ރޫޓުގައި ނައިފަރު އަދި މަޑިވަރު އަދި ތިންވަނަ ރޫޓުގައި ވަނީ އޮޅުވެލިފުށި، ކުރެންދޫ އަދި ނައިފަރެވެ. މި ދަތުރުތައް ހަފުތާގެ ހުރިހާ ދުވަސްތަކެއް ގައި ވެސް އޮންނާނެ ކަމަށް އެމްޓީސީސީ އިން ބުނެ އެވެ.

މުޅި ރާއްޖެ ދަތުރުފަތުރުން ގުޅާލުމަށް ސަރުކާރުން ހިންގާ މި މަޝްރޫޢުގެ ދަށުން  އާރުޓީއެލް ގެ ޚިދުމަތް ފުރަތަމަ ފެށީ ޒޯން 1 ގެ ހދ. އަތޮޅުގަ އެވެ. އެ އަތޮޅުގައި ޚިދުމަތް ރަސްމީކޮށް ފެށީ މިއަހަރުގެ ޖޫން މަހުގެ 11 އެވެ.

އެއަށްފަހު ހއ. އަތޮޅުގައި ޖުލައި 3 ވަނަ ދުވަހު ރަސްމީކޮށް ފެށިއިރު، ށ. އަތޮޅުގައި މި ޚިދުމަތް ފެށީ މި ހިނގާ ސެޕްޓެމްބަރުމަހުގެ 6 ވަނަ ދުވަހު އެވެ.

ރާއްޖެ 6 ޒޯނަކަށް ބަހާލައިގެން، ރާއްޖެ ޓްރާންސްޕޯޓް ލިންކް (އާރް.ޓީ.އެލް) ސްޕީޑް ފެރީގެ ޚިދުމަތް މުޅިރާއްޖޭގައި ފެށިގެންދާއިރު، ރާއްޖޭގެ 188 ރަށުގައި ފެރީ ޓަރމިނަލްތައް ޤާއިމްކޮށް، މުޅި ރާއްޖޭގައި ޚިދުމަތް ދިނުމަށް 82 ހައި-ސްޕީޑް ފެރީ އުޅަނދެއް ދަތުރުތަކުގައި ބޭނުންކުރާނެ އެވެ.