މިއުޒިޝަންސް ޔޫނިއަން އޮފް މޯލްޑިވްސް (އެމް.ޔޫ.އެމް) ގެ ލީގަލް ޕާރޓްނަރ، އެސް&އޭ ލޯޔާރޒް އާ ގުޅިގެން ފަންނުވެރިންނަށް ޚާއްސަކޮށްގެން ވޯކްޝޮޕްތަކެއް ބާއްވަން ނިންމައިފިއެވެ.
އެމް.ޔޫ.އެމް އިން ބުނީ މި ޖުލައި މަހުގެ 20 ވަަނަ ދުވަހު މި ވޯކްޝޮޕްތައް ފަށަން ރާވާފައިވަނީ "އާރޓިސްޓްސް އެންގޭޖްމަންޓް އެގްރީމެންޓް" ލޯންޗްކުރުމުގެ ހަފްލާއަކާ އެކުގައި ކަމަށެެވެ.
މި އެގްރިމެންޓަކީ އެމް.ޔޫ.އެމް. އާއި އެސް&އޭ ލޯޔާރޒް ގުޅިގެން، ފަންނުވެރިންގެ ޚިދުމަތްތައް ހޯދަން ބޭނުންވާ ފަރާތްތަކާ އެކީ ވެވޭ އެއްބަސްވުންތައް ހަރުދަނާކުރުމުގެ ގޮތުން އެކުލަވާލާފައިވާ އެގްރިމެންޓެކެވެ.
އެމް.ޔޫ.އެމްގެ ވެބްސައިޓު (www.musiciansunion.mv)މެދުވެރިކޮށް ރެޖިސްޓަރ ވުމަށްފަހު، ވޯކްޝޮޕްގައި ބައިވެރިވުމުގެ ފުރުސަތު އާންމުންނަށް ވެސް ހުޅުވާލާފައިވާއިރު، މި ވޯކްޝޮޕް ސީރީޒްގައި ވަޒީފާއާބެހޭ ގާނޫނާއި ޓެކްސޭޝަނާއި ފިކުރީ މުދަލުގެ ހައްގުތަކާއި ޖިންސީ ފުރައްސާރަ އާ ގުޅޭގޮތުން މައުލޫމާތު ދިނުމަށް ވަނީ ނިންމާފައެވެ.
މި ވޯކްޝޮޕް އޮންނާނީ މ. ކިނާރާ ހައުސް، 9ވަނަ ފަންގިފިލާ ގައި ކަމަށް ވެސް އެމް.ޔޫ.އެމް އިން ބުނެއެވެ.
މި އަހަރުގެ ކުރީކޮޅު، އެމް.ޔޫ.އެމް އާއި އެސް&އޭ ލޯޔާރޒް ގުޅިގެން މަސައްކަތްކުރުމަށް ވަނީ ޓާރމްސް އޮފް އެންގޭޖްމަންޓް (ޓީ.އޯ.އީ) އެއްބަސްވުމެއްގައި ސޮއެކޮށްފައެވެ.
މި އެއްބަސްވުމުގެ ދަށުން ޔޫނިއަންއަށް ޕްރޯ ބޯނޯ ގާނޫނީ ޚިދުމަތް ފޯރުކޮށްދިނުމާއި ގާނޫނީ ލަފަޔާއި އިރުޝާދު ދިނުން ހިމެނެއެވެ.
1994 ވަނަ އަހަރު އުފެދުނު އެސް&އޭ ލޯޔާރޒް އަކީ ދިވެހިރާއްޖޭގައި ނަން މަޝްހޫރު، އަދި ގާނޫނީ ދާއިރާއިން އެންމެ ކުރިއަރާފައިވާ ވަކީލުން ހިމެނޭ ފުލް-ސަރވިސް ލޯ ފާރމެކެވެ.
