ރާއްޖޭގައި ފާހިޝް އަމަލުތައް ގިނަވަމުން އަންނައިރު، ސަރުކާރު އޮތީ ކުޅިބަލަން ކަމަށް ބުނެ ކުރީގެ ހޯމް މިނިސްޓަރ އުމަރު ނަސީރު، ސަރުކާރަށް ވަރަށްބޮޑަށް ފާޑު ކިޔުއްވައިފިއެވެ.
އުމަރު ނަސީރު ވިދާޅުވީ ލިވާތު ކުރުމަކީ ބޮޑުކަމެއް ނޫން ކަމަށް ދައްކާ، ރާއްޖޭގައި އެއްޖިއްސުން ގުޅުން ހިންގުން ފެތުރުމަށް ދަނީ މަސައްކަތްތަކެއް ކުރަމުން ކަމަށެވެ.
އެގޮތުން މި މަސައްކަތުގައި ރާއްޖޭގައި އޮފީސް ގާއިމް ކޮށްގެން ތިބެ މަސައްކަތް ކުރާ ބައިނަލްއަގްވާމީ ޖަމާއަތްތަކާއި ރާއްޖެ ބައިވެރިވެފައިވާ ބައިނަލްއަގްވާމީ ޖަމާއަތްތައް ވެސް ހިމެނޭ ކަމަށް އޭނާ ވިދާޅުވިއެވެ.
ކޮންމެ ގައުމެއްގައި ވެސް އެ ގައުމަކުން ގަބޫލުކުރާ ދީނީ އަދި އަޚްލާގީ މިންގަޑުތަކެއް ހުންނާނެކަން ފާހަގަކުރައްވާ އުމަރު ނަސީރު ވިދާޅުވީ އެ މިންގަޑުތައް ދިފާއުކޮށް، އެ މިންގަޑުތައް ދެމެހެއްޓުމަކީ އެ ގައުމަކުން ކުރަން ޖެހޭނެ ކަމެއް ކަމަށެވެ.
މީގެ އިތުރުން އުމަރު ވިދާޅުވީ ރާއްޖޭގައި ގާއިމްކޮށްފައި ހުންނަ އޮފީހަކުން ނުވަތަ އެ އޮފީހުގައި ހުންނަ ފަރާތަކުން މިފަދަ ކަމަކަށް ހިތްވަރު ދީފިނަމަ އެ އޮފީހެއް ބަންދުކޮށް އެ މީހަކު ފޮނުވާލަންވާނެ ކަމަށެވެ.
އެހެންނަމަވެސް އުމަރު އެ ތުހުމަތު ކުރައްވަނީ ކޮން ޖަމާއަތަކަށް ކަމެއް ހާމައެއް ނުކުރައްވައެވެ.
