މިއަހަރުގެ މިހާތަނަށް އިނގިރޭސި ވިލާތުން 69 ހާހަށްވުރެ ގިނަ ފަތުރުވެރިން ރާއްޖެއަށް އައިސްފައިވާ ކަމަށް ތަފާސް ހިސާބުތަކުން ދައްކައިފިއެވެ.
މިއީ ކޮވިޑުގެ ކުރިން 2019 ވަނަ އަހަރުގެ މި މުއްދަތުގައި އެޤައުމުން ރާއްޖެއަށް އައި ފަތުރުވެރިންގެ ޢަދަދާ އަޅާ ބަލާއިރު 42.4 އިންސައްތަ އިތުރު އަދަދެކެވެ.
ރާއްޖެއަށް މިހާރު އެންމެ ގިނައިން ފަތުރުވެރިން އަންނަނީ ވެސް އިނގިރޭސި ވިލާތުން ކަމަށްވާއިރު، މިއަހަރުގެ މިހައިތަނަށް އެގައުމުން 69808 ފަތުރުވެރިން ރާއްޖެއަށް އައިސްފައިވާ ކަމަށް ތަފާސް ހިސާބުން ދައްކައެވެ. މި ޢަދަދު 2019 ގެ އޭޕްރީލްމަހުގެ ނިޔަލަށް ހުރީ 48992 ގައެވެ.
މި އަހަރުގެ މިހާތަނަށް ރާއްޖެއަށް 531019 ފަތުރުވެރިން އައިސްފައިވާއިރު މީގެތެރެއިން %13.1 ހިއްސާކުރަނީ އިނގިރޭސިވިލާތުގެ ފަތުރުވެރިންނެވެ. ދެވަނައަށް އެންމެ ގިނައިން ފަތުރުވެރިން އަންނަނީ އިންޑިއާ އިން ނެވެ.
ތަފާސްހިސާބުތައް ދައްކާގޮތުން މިދިޔަ އަހަރުގެތެރޭ އިނގިރޭސިވިލާތުން ރާއްޖެއަށް އައިސްފައިވަނީ 62777 ފަތުރުވެރިންނެވެ. އެހެންކަމުން އަހަރުގެ މިހާތަނަށް އެޤައުމުން ރާއްޖެއަށް އައިސްފައިވާ ފަތުރުވެރިންގެ ޢަދަދު މިވަނީ މިިދިޔަ އަހަރުއައި ޖުމްލަ ޢަދަދު ހުރަސްކޮށްފައެވެ.
ރާއްޖޭގެ ފަތުރުވެރިކަން އިޝްތިހާރު ކުރުމަށް ސަރުކާރާއި އަމިއްލަ ކުންފުނިތަކުންދަނީ ގިނަ މަސައްކަތްކެއް ކުރަމުންނެވެ. އެގޮތުން ދުނިޔޭގެ އެކި ހިސާބުތަކުގައި ބާއްވާ ފެއަރތަކާއި ރޯޑު ޝޯވތަކުގައި ބައިވެރިވެ ރާއްޖޭގެ ފަތުރުވެރިކަމާއި ގުޅޭ މައުލޫމާތުތައް ދަނީ ހިއްސާކުރަމުންނެވެ.
