އައިމަން ލަތީފަށް މާލެ ސިޓީ ކައުންސިލްގެ މުވައްޒަފަކު ބިރުދައްކާ، އިންޒާރުދިން މައްސަލަ ފުރިހަމައަށް ތަހުގީގުކޮށްދިނުމަށް ޑިމޮކްރަސީ މޯލްޑިވްސް އިން ގޮވާލައިފިއެވެ.
އެ ޖަމިއްޔާއިން ނެރުނު ބަޔާނެއްގައި ބުނީ އެ ޖަމްއިއްޔާއާއި އެމެރިކާގެ ނޭޝަނަލް ދެމޮކްރެޓިކް އިންސްޓިޓިއުޓްއާ ގުޅިގެން ހިންގަމުންދާ 'އާރު.ޓީ.އައި 37' މަޝްރޫއުގައި މަސައްކަތްކުރާ އައިމަން ލަތީފްއަށް މާލެ ސިޓީ މައުންސިލްގެ ފޯނު ނަންބަރަކުން ފޯނުކޮށް، އެ ކައުންސިލުގެ މުވައްޒަފަކު ވަނީ 6 އޭޕްރީލް 2022 ވީ ބުދަ ދުވަހުގައި އިންޒާރުދީ، ބިރުދައްކާފައިވާ ކަމަށެވެ.
އެ ފޯނުކޯލަކީ މައުލޫމާތު ހޯދާ، ލިބިގަތުމުގެ ގާނޫނުގެ 37 ވަނަ މާއްދާގެ ދަށުން ދައުލަތުގެ އިދާރާތަކުން އަމިއްލަ އިސްނެގުމަށް އާއްމުކުރަންޖެހޭ މައުލޫމާތު ފުރިހަމައަށް އާއްމުކޮށްފައި ނުވާތީ އެ މައުލޫމާތު ހޯދުމަށް އެދި މާލެ ސިޓީ ކައުންސިލަށް ހުށައެޅުމުން ލިބުނު ކޯލެއް ކަމަށް ވެސް އެ ޖަމިއްޔާގެ ނޫސްބަޔާނުގައި ބުނެފައިވެއެވެ.
އިންޒާރާއި ބިރުދެއްކުމުގެ މައްސަލަ މޯލްޑިވްސް ޕޮލިސް ސަރވިސްއަށް ހުށައެޅުމުން އެމައްސަލައަކީ ފުލުހުންނަށް ތަހުގީގުކުރެވޭވަރަށް ހެކި ހުރި މައްސަލައެއް ނޫން ކަމަށް ޕޮލިސް ސަރވިސްއިން ބުނެފައިވާ ކަމަށާއި އެ މައްސަލަ ހުށައަޅަންވީ އިންފޮމޭޝަން ކޮމިޝަނަރުގެ އޮފީހަށް ކަމަށް ވެސް ބުނެފައިވާ ކަމަށް ވެސް އެ ޖަމިއްޔާގެ ނޫސް ބަޔާނުގައި ބުނެފައިވެއެވެ.
ޑިމޮކްރަސީ މޯލްޑިވްސް އިން ވަނީ މޯލްޑިވްސް ޕޮލިސް ސަރވިސްއަށް ހުށައަޅާފައިވާ މައްސަލަ ފުރިހަމައަށް ތަހުގީގުކޮށް، ގާނޫނުގައިވާ ގޮތުގެމަތިން ފިޔަވަޅު އެޅުމަށް ގޮވާލާ ކަމަށާއި ތަހުގީގު ނުކުރެވޭނެކަމަށް މައުލޫމާތު ދީފައިވާ ފުލުހުންގެ މައްސަލަ ނޭޝަނަލް އިންޓެގްރިޓީ ކޮމިޝަނަށް ހުށައެޅުމާއެކު ލަސްނުކޮށް ބެލުމަށް ވެސް ގޮވާލާފައެވެ.
މީގެ އިތުރުން ނަފުރަތުގެ ކުށާއި، މީހުންނަށް އިންޒާރު ދިނުމާއި ބިރުދެއްކުމަކީ ދިވެހިރާއްޖޭގައި ކަންބޮޑުވާންޖެހޭ މިންވަރަށް އޮތް މައްސަލައެއް ކަމަށާއި މި ބަޔާންކުރި އަމަލުތަކަކީ އެފަދަ ކުށްތަކަށް އަރައިގަތުމަށް މީހުންނަށް ލިބޭ ހިތްވަރެއް ކަމަށް ވެސް ބުނެފައިވެއެވެ.
ވީމާ މިކަމަށް ސަމާލުވެ، އެކަކު އަނެކަކަށް އިންޒާރުދީ، ބިރުދެއްކުމަކީ ދައުލަތުގެ އަދި އަމިއްލަ އެންމެހާ މުއައްސަސާތަކުން ވެސް އެއްގޮތަކަށް ވެސް ބަލައިނުގަންގާނެ އަމަލުތަކެއްކަން ދައްކައިދިނުމަށް އެ ޖަމްއިއްޔާއިން ގޮވާލާފައިވެއެވެ.
މީހުންނަށް އިންޒާރުދީ، ބިރުދެއްކުމަކީ ގާނޫނު ނަންބަރު 2010/17 (ބިރުދެއްކުމާއި، ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނު) ގެ 2 ވަނަ މާއްދާގައި ކަނޑައަޅާފައިވާ ޖިނާއީ ކުށެކެވެ. އަދި ފާއިތުވީ އަހަރުތަކުގައި މީހުންނަށް ބިރުދެއްކުމުގެ މައްސަލަތައް ނުބެލި ދިއުމަކީ ބިރުދެއްކުން އަމާޒުވެފައިވާ މީހުންގެ ފުރާނަ ގެއްލި، ބޮޑެތި އަނިޔާއާއި ޒަޚަމްތައް ލިބުމަށް މަގުފަހިކޮށްފައިވާ ކަމެކެވެ.
