ނޭޕާލުގެ ތަޖުރިބާކާރު ސިޔާސީ ލީޑަރު ޝޭރް ބަހާދުން ޑެއުބާ 5 ވަނަ ފަހަރަށް އެ ގައުމުގެ ބޮޑުވަޒީރުކަމާ ހަވާލުވެވަޑައިގެންފިއެވެ. އޭނާ ބޮޑުވަޒީރުކަމާ ހަވާލުވެވަޑައިގަތީ މިހާރު ވަގުތީގޮތުން ސަރުކާރު ހިންގެވުމާ ހަވާލުވެވަޑައިގެން ހުންނެވި ކުރީގެ ބޮޑުވަޒީރު ކަޑްގާ ޕްރަސާދް އޮލީ ގާނޫނުހަދާ މަޖިލިސް އުވާލެއްވި އުވާލުއްވުން ބާޠިލުކަަމަށް އެ ގައުމުގެ ސުޕްރީމް ކޯޓުން ނިންމުމާ ގުޅިގެންނެވެ.
ޑެއުބާ ބޮޑުވަޒީރުކަމާ ހަވާލުވެ މިވަޑައިިގަންނަަަވަނީ ނޭޕާލުގައި ސިޔާސީ ހަލަބޮލިކަން އިތުރުވުމުގެ އިތުރަށް އެގަމުގައި ކޮވިޑް-19 ގެ ހާލަތުވެސް ގޯސްވެފައިވާ ދަނޑިވަޅެއްގައެވެ.
ސުޕްރީމް ކޯޓުން އިއްޔެ ވަނީ، ގާނޫނުހަދާ މަޖިލިސް އުވާލީއްސުރެ ވަގުތީގޮތުން ސަރުކާރު ހިންގަވަމުން ވަޑައިގެންނެވި އޮލީ ބޮޑުވަޒީރުކަމުން ވަކިކޮށް ޑެއުބާއާ ހަވާލުކުރުމަށް ހުކުމްކޮށްފައެވެ. އަދި ގާނޫނުހަދާ މަޖިލީހުގެ ޖަލްސާއެއް ހަތް ދުވަހުގެ ތެރޭގައި ބޭއްވުމަށްވެސް ވަނީ އަމުރުކޮށްފައެވެ. ބޮޑުވަޒީރުކަމުގައި ހުންނެވުމަށް ޑެއުބާއަށް މަޖިލީހުގެ އަޣުލަބިއްޔަތުގެ ރުހުން ހޯއްދަވަން ޖެހިވަޑައިގަންނަވާނެއެވެ.
ޑެއުބާ ވާނީ މީގެ ކުރިން 1995، 2001، 2004 އަދި 2007 ވަނަ އަހަރު ބޮޑުވަޒީރުކަމާ ހަަވާލުވެވަޑައިގަންނަވާފައެވެ. އެހެންނަމަވެސް، އެއްފަހަރުވެސް ދައުރު ފުރިހަމަކުރައްވާފައި ނުވެއެވެ. މިފަހަރުވެސް އޭނާ ބޮޑުވަޒީރުކަމުގައި ހުންނަވާނީ 2022 ވަނަ އަހަރު އާއްމު އިންތިޚާބު ބާއްވަންދެނެެވެ.
ޑެއުބާއަކީ އިންޑިޔާއާ ގާތް ބޭފުޅަކަށް ވާތީ އޭނާގެ ވެރިކަމުގައި ނޭޕާލު އިންޑިޔާއާ އަނެއްކާވެސް ގާތަަށް ޖެހޭނެކަމަށް ބެލެވެއެވެ. އޮލީ ވަނީ އޭނާގެ ބޮޑުވަޒީރުކަމުގައި އަވަށްޓެރި ޗައިނާއާއި ގާތް ގުޅުމެއް ގެންގުޅުއްވާފައެވެ.
ޑެއުބާ ސިޔާސީ މައިދާނަށް ނުކުމެވަޑައިގަތީ ކޮލެޖުގައި ކިޔަވައިވިދާޅުވަމުންނެވެ. ކުރިން ނޭޕާލުގައި އޮތް ރަސްކަމަކީ ޚުދުމުޚުތާރު ރަސްކަމެއް ކަަމަށް ވިދާޅުވެ ފާޑުވިދާޅުވުމުގެ ސަބަބުން އޭނާއަށް 9 އަހަރު ޖަލުގައި ހޭދަކުރައްވަން ޖެހިވަޑައިގަތެވެ. އޭނާ ވަނީ ނޭޕާލުގެ އެންމެ ދުވަސްވިީ ސިޔާސީ ޕާޓީ، ނޭޕާލީ ކޮންގްރެސްގެ ލީޑަރުކަންވެސް އެތައް އަހަރަކަށް ކުރައްވާފައެވެ.
ޓީވީ މެދުވެރިކުރައްވައި ދެއްވި ޚިޠާބެއްގައި ވަގުތީ ބޮޑުވަޒީރު ވަނީ ސުޕްރީމް ކޯޓުގެ ނިންމުމަށް ފާޑުވިދާޅުވެފައެވެ. އެެހެންނަމަވެސް، އޭނާ ވިދާޅުވީ އޭނާ މަގާމުން ވަކިވެވަަޑައިގަންނަވާނެ ކަމުގައެެވެ.
