ސިޔާސީ އިޖްތިމާއީ އަދި އިޤްތިޞާދީ ކުރިއެރުމުގެ ލަގަން އޮތީ އިސްލާމްދީނުގައި ހިފެހެއްޓި މިންވަރެއްގެ މަތީގައިކަމަށް މިއަދުގެ ހުކުރު ޚުޠުބާގައި ވިދާޅުވެއްޖެއެވެ.
އިސްލާމްދީނަކީ އިންސާނާގެ މުޅި ޙަޔާތްކަމަށް ޚުޠުބާގައި ވިދާޅުވިއެވެ. މީސްތަކުން އިސްލާމްދީނާ ދުރުހެލިވަމުން ދިޔަވަރަކަށް އެމީހުންގެ ސުލޫކާއި އުޅުންތައް ނުބައިވެ، އެބަޔަކު ހަލާކުވެގެންދާނެކަމަށްވެސް ޚުޠުބާގައި ވިދާޅުވިއެވެ.
"މިހެންވެ ޔަޤީންކަމާއެކު ޤަބޫލުކުރަންވީ އަހަރެމެންގެ، ސިޔާސީ، އިޖްތިމާއީ އަދި އިޤްތިޞާދީ ކުރިއެރުމުގެ ލަގަން އޮތީ ﷲ ރުހިވޮޑިގެންވާ، އިސްލާމްދީނުގައި ހިފެހެއްޓި މިންވަރެއްގެ މަތީގައި ކަމެވެ. އެހެންކަމުން މިކަމަށްޓަކައި ގަދައަޅައި މަސައްކަތް ކުރާ ބަޔަކު ކަމުގައި މުސްލިމުން ވާންޖެހެއެވެ" ޚުޠުބާގައި ވިދާޅުވިއެވެ.
އަޅުގަނޑުމެންގެ ތެރެއިން ކޮންމެ މީހަކުވެސް މަސައްކަތްކުރަންވީ އެމީހެއްގެ ނަފްސާއި، އާޢިލާގެ މީހުންގެ ހިތްތަކުގައި އީމާންކަމުގެ އަސާސްތައް ވަރުގަދަކޮށް ހަރުދަނާކުރުމަށްކަމަށް ޚުތުބާގައި ވިދާޅުވިއެވެ. އަދި ތިމާގެ އެހެނިހެން އަޚުންނާއި، އުޚުތުންނަށް މި އަސާސްތައް އުގަންނައިދީ، ރަނގަޅުގޮތް ދަސްކޮށް ދިނުމަށް ކަމަށް ވިދާޅުވިއެވެ. އިސްލާމްދީނުގެ ޢަދާވާތްތެރިން އަބަދުވެސް މަސައްކަތްކުރަމުން ދަނީ ފިކުރީ ގޮތުން މުސްލިމުންގެ އަޤީދާއާ ގުޅެ މުސްލިމުން އިސްލާމްދީނާ ދުރުކުރުމަށް ކަމަށް ޚުތުބާގައި ފާހަގަކުރެއްވިއެވެ. އެއިރުން މުސްލިމުން ނޭގުމެއްގެ ތެރޭގައި ﷲ ގެ މަތިން ހަނދުމަނެތި، އެކަލާނގެއަށް އަޅުކަންކުރުމާ ދުރުހެލިވެގެން ހިނގައިދާނެކަން ފާހަގަކުރެއްވި އެވެ. އޭނާގެ ވެރިރަސްކަލާނގެ އަކީ މާތްﷲ ކަމުގައި ބުނެ ހިތުން ޤަބޫލުކުރިނަމަވެސް އޭނާގެ ޢަމަލުތަކުން އެކަމެއް ނުފެންނާނެ ކަމަށް ވެސް ޚުޠުބާގައި ވިދާޅުވިއެވެ.
"މިއީ ނުރައްކާތެރިކަމެކެވެ. މިފަދަ އަނދަވަޅެއްގެ ތެރެއަށް މިލޮބުވެތި ވަޠަންގެ މުސްލިމުން ވެއްޓިގެން ނުވާނެއެވެ." ޚުޠުބާގައި ވިދާޅުވިއެވެ.
ޙުޠުބާގައި ވިދާޅުވީ ރާއްޖޭގައި އިސްލާމްދީން ދެމެހެއްޓުމަށް ވަރަށް ބޮޑަށް މަސައްކަތްކުރަންޖެހޭ ކަމަށެވެ. މިޤައުމަކީ ސައްތައިން ސައްތަ އިސްލާމީ ޤައުމަކަށްވާތީ، އެކަމާ ދެކޮޅު ހަދާ ބަޔަކު އެބަ އުޅޭކަމަށެވެ. އަދި ސައްތައިން ސައްތަ ސުންނީ ޤައުމަކަށް ވާތީ އެކަމާވެސް ޙަސަދަވެރިވާ ބަޔަކު އުޅޭކަން ޚުޠުބާގައި ފާހަގަކުރެއްވިއެވެ.
ރާއްޖެ އިސްލާމްވުމާއެކު ރާއްޖެ އިސްލާމްދީނުން ބޭރަށް ނެރެވޭތޯ އެކި ދުވަސްވަރު ތަފާތު އެތަކެއް މަސައްކަތްކޮށްފައިވާކަން ތާރީޚުން ހެކިދޭކަމަށް ފާހަގަކުރެއްވިއެވެ. އެންމެ ފާޅުކަންބޮޑު ގޮތެއްގައި މިކަން ކޮށްފައި ވަނީ ޕޯޗްގީޒުންގެ އިސްތިޢުމާރުގެ ޒަމާނުގައި ކަން ފާހަގަކުރެއްވިއެވެ. އެމީހުންގެ މަސައްކަތް ނާކާމިޔާބުވެ، ރާއްޖެ އިސްލާމްދީންމަތީގައި ދެމިއޮތީ ﷲ ސުބްޙާނަހޫ ވަތަޢާލާގެ ފަޟްލުވަންތަކަމަށްފަހު ބޮޑުތަކުރުފާނުގެ އަގުހުރި ޖިހާދާއި، މިންނެތް މަސައްކަތްޕުޅުންކަމަށްވެސް ޚުޠުބާގައި ފާހަގަކުރެއްވިއެވެ.
ދިވެހި މުސްލިމުން ދީނުން ބޭރުކުރުމަށް ތަފާތު ޤައުމަކުން އެއްބައިވެގެން ވެސް ވަނީ ގިނަގުނަ މަސައްކަތްތަކެއް ކޮށްފައިކަން ޚުތުބާގައި ފާހަގަކުރެއްވިއެވެ.
ދީނާ ޚިލާފު ފިކުރުތަކުގެ އަހުލުވެރިން މުސްލިމުންގެ ހިތްތަކަށް ވެރިވެގަތުމަށް ގިނަ ޢަދަދެއްގެ ފައިސާއާއި ސިޔާސީ ނުފޫޒާއި މިނިވަންކަމުގެ ސިޢާރުތައް ބޭނުންކޮށް އެމީހުންގެ ދީނަކީ ވަރަށް އޯގާތެރި ދީނެއްކަން މުސްލިމުންނަށް ދައްކާކަން ފާހަގަ ކުރެއްވިއެވެ. ނަމަވެސް ކަން އޮތީ އެހެން ނޫންކަން އެމީސާލުތައް ދައްކަވައި ޚުޠުބާގައި ވިދާޅުވިއެވެ.
