ޖުމްލަ 28 ބައިވެރިންނާއެކު މަސްވެރިކަމާބެހޭ ތަމްރީން ޕްރޮގްރާމް ރ. ހުޅުދުއްފާރުގައި ފަށައިފިއެވެ. މިއީ މީގެ ފުރަތަމަ ޕްރޮގްރާމް ކަމަށް ފިޝަރީޒް މިނިސްޓްރީން ވިދާޅުވިއެވެ.
މި ޕްރޮގްރާމުގައި ބައިވެރިވެފައިވަނީ 17 އަންހެނުންނާއި 11 ފިރިހެނުންނެވެ. ތަމްރީން ޕްރޮގްރާމު ކުރިއަށް ގެންދާނީ ޖެނުއަރީ 20 އިން ފެބުރުއަރީ 3 އަށް ކަމަށް ފިޝަރީޒް މިނިސްޓްރީން ވިދާޅުވިއެވެ. މިޕްރޮގްރާމްގައި ތިޔަރީ ބައިތަކާއި، ޢަމަލީ ބައިވެސް ކުރިއަށް ގެންދާނެއެވެ.
އަގުއެއްކުރި ތަފާތު ބާވަތްތައް ތައްޔާރުކުރުމަށް މި ޕްރޮގްރާމުގައި ދަސްކޮށްދެވޭނެއެވެ. އަދި މަސްވެރިކަމުގެ މިފަދަ ކުޑަ ވިޔަފާރިއެއް ހިންގާނެގޮތާއި، ހިންގުމުގައި ދިމާވެދާނެ ގޮންޖެހުންތަކާއި، އެވިޔަފާރީގެ ލިޔެކިޔުމާއި ހިސާބު ބެލެހެއްޓުން ފަދަ މުހިންމު މަޢުލޫމާތު ބައިވެރިންނަށް ދަސްކޮށްދެއްވާނެއެވެ. އޭގެ އިތުރުން، ވިޔަފާރީގެ އުސޫލުން ޖަމާޢަތެއްގެ ގޮތުގައި މިފަދަ ވިޔަފާރިއެއް ހިންގާނެގޮތާއި ކުރިމަތިވެދާނެ ގޮންޖެހުންތަކާއި ބެހޭގޮތުން މިޕްރޮގްރާމްގެ ބައިވެރިންނަށް މަޢުލޫމާތު ދެވޭނެއެވެ. މިޕްރޮގްރާމް ހިނގަމުންދަނީ ރ.ހުޅުދުއްފާރުގެ އިޖްތިމާޢީ މަރުކަޒުގެ ހޯލުގައެވެ. މިޕްރޮގްރާމްގައި ތަމްރީނުދެއްވާނީ، މިނިސްޓްރީގެ ކަމާގުޅޭ ދާއިރާގެ ފަންނީ 2 އިންސްޓްރަކްޓަރުންނެވެ.
މިއީ މިނިސްޓްރީ އޮފް ފިޝަރީޒް މެރިން ރިސޯސަސް އެންޑް އެގްރިކަލްޗަރއިން މިއަހަރު އަތޮޅުތެރެއަށް އަމާޒުކޮށްގެން ހިންގުމަށް ރޭވިފައިވާ މަސްވެރިކަމާގުޅޭ ތަމްރީނު ޕްރޮގްރާމުގެ ފެށުމެވެ.
މި ތަމްރީނު ޕްރޮގްރާމް އިފްތިތާހު ކޮށްދެއްވީ ހުޅުދުއްފާރު ކައުންސިލްގެ ރައީސް މުޙައްމަދު އިބްރާހިމެވެ. ކައުންސިލްގެ ރައީސްގެ ވާހަކަފުޅުގައި، މިލިބުނު އަގުހުރި ފުރުޞަތުގެ ބޭނުންކޮށް، މިޕްރޮގްރާމްގައި ދެވޭ މަޢުލޫމާތުތަކުގެ ބޭނުން ރަނގަޅު ގޮތުގައި ހިފައި އަމަލީ މަސައްކަތުގައި ފުރިހަމަޔަށް ބައިވެރިވެ މިޕްރޮގްރާމް ފުރިހަމަކުރުމަށް ނަސޭހަތްތެރިވިއެވެ. އަދި މިޕްރޮގްރާމްގެ ސަބަބުން ރަށުގައި ތިބެގެން އާމްދަނީ ހޯދޭނެ މަގު ތަނަވަސްވާނޭކަމަށް އުންމީދު ކުރާކަމުގައި ވިދާޅުވިއެވެ. ކައުންސިލްގެ ރައީސްގެ އިތުރުން، މިޖަލްސާގައި މިޕްރޮގްރާމާއި ގުޅޭގޮތުން މިޕްރޮގްރާމްގެ އިންސްޓްރަކްޓަރ އާދަމް މަނިކެވާހަކަފުޅު ދެއްކެވިއެވެ.
