ރާއްޖޭގެ ފުރަތަމަ އޯރަލް އެންޑު މެކްސިލޯ ފޭޝަލް ސާޖަން ޑރ. ފަތުހުﷲ ސައީދު މިއަދުން ފެށިގެން އައިޖީއެމްއެޗުގައި ބައްލަވާނެ ކަމަށް އެ ހޮސްޕިޓަލުން ވިދާޅުވެއްޖެއެވެ.
އޯރަލް އެންޑު މެކްސިލޯ ފޭޝަލް ސާޖަރީއަކީ އަނގައާއި، މޫނާއި ކަނދުރާ ގެ ސާޖަރީތަކަށް ޚާއްސަ ފަރުވާދޭ ސްޕެޝަލިޓީއެއް ކަމަށް އައިޖީއެމްއެޗުން ވިދާޅުވެފައިވެއެވެ.
އުފެދުމުގައާއި އިންޖަރީ ވެގެން މޫނުމަތީގައިވާ އައިބުތައް (ކްލެފްޓް ޕެލެޓް) ފަދަ ޓްރޯމާ ފަރުވާ ދިނުމާއި، އަނގައިގެ ކެންސަރު ދެނެގަތުމާއި، ސާޖަރީ ކުރުން ވެސް މި ސްޕެޝަލިޓީގައި ހިމެނެވެ. އޭގެ އިތުރުން ފޭޝަލް ކޮސްމެޓިކް ސާޖަރީއާއި، ކޮލާއި، ހަށިގަނޑުގެ ބައިތަކާއި މޫނުމަތީގެ އެކިއެކި ތަދުތަކަށް ފަރުވާ ދިނުމާއި، އިމްޕްލާންޓް ސާޖަރީ ކުރުމާއި، އެފަދަ އިތުރު ކަންކަމަށް ފަރުވާ ކުރުން ވެސް މި ސްޕެޝަލިޓީގައި ހިމެނޭ ކަމަސް އެ ހޮސްޕިޓަލުން ވަނީ ވިދާޅުވެފައެވެ.
ކުރިއަށް އޮތްތަނުގައި، ޑރ. ފަތުހުﷲ ސައީދު އައިޖީއެމްއެޗުގެ އޯޕިޑީގައި ބަލިމީހުން ބެއްލެވުމާއި މި ސްޕެޝަލިޓީއާ ގުޅުންހުރި ޚިދުމަތްތައް ދެއްވަމުން ގެންދަވާނެއެވެ. "އާންމުކޮށް ޑޮކްޓަރަށް ދައްކަވަން އެޕޮއިންޓްމެންޓް ހަދައްވާ އުސޫލުން ޑރ. ފަތުހުﷲ ސައީދަށް ދެއްކެވުމަށް އެޕޮއިންމެންޓް ހެއްދެވޭނެއެވެ." އައިޖީއެމްއެޗުގެ ނޫސްބަޔާނެއްގައި ވިދާޅުވެފައިވެއެވެ.
