އީރާނުގެ ރިވޮލިއުޝަނަރީ ގާޑްސް ކޯޕްސް (އައިއާރްޖީސީ) ގެ ލަޝްކަރެއް ކަމަށްވާ ޤުދްސު ފޮސްގެ ކަޮމާންޑަރު ޖެނެރަލް ޤާސިމް ސުލައިމާނީ އަވަހާރަކޮށްލާފައި އެމެރިކާއާއި އިސްރާއީލަށް ހަމަޖެހިލައިގެން ނުތިބެވޭނެކަމުގެ އިންޒާރު އައިއާރްޖީސީގެ ސަރަަަހައްދީ ކޮމާންޑަރަކު ދެއްވައިފިއެވެ.
ރިވޮލިއުޝަނަރީ ގާާޑްސްގެ ކިރްމާން ޕްރޮވިންސުގެ ކޮމާންޑަރު ޖެނެރަލް ޣުލާމްޢަލީ އަބޫޙަމްޒާ ވިދާޅުވީ އެމެރިކާގެ މުހިއްމު 35 އަމާޒެއްގެ އިތުރަށް އިސްރާއީލުގެ ޓެލްއަވީވް ވަނީ އީރާނުގެ ހަތިޔާރު ފޯރާ ހިސާބުގައި ކަމަށެވެ. ޖެނެރަލް ސުލައިމާނީ އަކީ ކިރްމާން ޕްރޮވިންސްގެ ވެރިރަށް ކިރްމާނަށް އުފަން ބޭފުޅެކެވެ.
"ކޮންމެ ތާކު ތިއްބަސް އަރުމެން އެމެރިކާ މީހުންނަށް އަދަބުދޭނަން." ޖެނެރަލް އަބޫޙަމްޒާ ވިދާޅުވިއެވެ.
ހުކުރު ދުވަހުގެރޭ އޮތް ހަފްލާއެއްގައި ވާހަަކަފުޅުދައްކަވަމުން ޖެނެރަލް އަބޫޙަމްޒާ ވިދާޅުވި ގޮތުގައި ބަދަލު ހިފުމުގެ ހައްގު އީރާނަށް ލިބިގެން ވެއެވެ.
އީރާނުގެ މެހެރް ނިއުސް އެޖެންސީއަށް ދެއްވި ބަސްދީގަތުމެއްގައި އައިއާރްޖީސީގެ ތަރުޖަމާނު ބްރިގޭޑިޔާ ޖެނެރަލް އަބުލްފަަޒްލް ޝެކަރްޗީ ވިދާޅުވި ގޮތުގައި އީރާނުން އަވަސް އަރައިގެން އެއްވެސް ފިޔަވަޅެެއް ނާޅާނެއެވެ. އެހެންނަަމަވެސް، އެހެންނަމަވެސް، އެމެރިކާގެ ކިބައިން ގަދަފަދަ ބަދަލެއް ހިފާނެ ކަމީ ޔަގީން ކަމެކެވެ.
"ހަނގުރާމައެއް ފެށިއްޖެ ހާލަތެއްގައި ނުވަތަ ކުރިމަތިލުމަކަށް ދާން ޖެހިއްޖެ ހާލަތެއްގައި، އެމެރިކާ މީހުން މޮޔަކަން އިސްކޮށްފިނަަމަ، އެ މީހުންނަށް ނުހަނު ބޮޑަށް ގެއްލުންވާނެ. އީރާނުގެ ރައްދު މާ ވަރުގަދަ ވާނެ." ޖެނެރަލް ޝެކަރްޗީ އިންޒާރުދެއްވިއެވެ.
އަނެއްކޮޅުން ތެހެރާން ޔުނިވާސިޓީެ ދަރިވަރުންނާ މުޚާޠަބުކުރައްވަމުން ރިވޮލިއުޝަނަރީ ގާޑްސްގެ ކޮމާންޑަރުގެ ނާއިބު ބްރިގޭޑިޔާ ޖެނެރަލް ޢަލީ ފަދްވީ ވިދާޅުވީ ރިވޮލިއުޝަނަރީ ގާޑްސް އޮތީ އިސްލާމީ އިންގިލާބުގެ ލީޑަރުގެ އަމުރުފުޅެއްގެ އިންތިޒާރުގައެވެ.
"އަމުރުފުޅު ލިބުމާއެކު، މާތް ﷲގެ އިރާދަފުޅާއެކު، އިސްލާމީ އިންގިލާބުގެ ލީޑަރުގެ ވައުދުުފު، ރިވޮލިއުޝަނަރީ ގާޑްސްއިން ގާބިލުކަމާއެކު ފުރިހަމަކޮށްދޭނެ." ޖެނެރަލް ފަދްވީ ވިދާޅުވިއެވެ.
އީރާނުގެ އަސްކަރީ ކޮމާންޑަރުން ބަދަލު ހިއްޕަވާނެ ކަމުގެ އިންޒާރުދެއްވަމުން ގެންދަވާއިރު، ސަރަހައްދުގެ ގައުމުތަކުން ތިބީ ދެން ކަންވާނެ ގޮތަކާ މެދު ނޭވާ ހިފަހައްޓާލައިގެންނެވެ. އެންމެންނަށް ވެސް ޔަގީންވާ ކަމަކީ އިރާނުން ބަދަލުހިފާނެ ކަމެވެ. ނޭނގެނީ ބަދަލުހިފާނެ ވަގުތަކާއި ހިފާނެ ގޮތެކެވެ.
