ސުނާމީ ކާރިސާއާ ގުޅިގެން ޙައްލުކުރަންޖެހިފައިވާ އެތައް ކަމެއް އަދިވެސް އެބަހުރި ކަމަށް ރައީސުލްޖުމްހޫރިއްޔާ އިބްރާހީމް މުޙައްމަދު ޞާލިޙު މިއަދު ވިދާޅުވެއްޖެއެވެ.
ވިލުފުށީގައި މިއަދު ބޭއްވެވި އެއްބައިވަންތަ ކަމުގެ ދުވާހުގެ ރަސްމީ ޖަލްސާގައި ވާހަކަފުޅު ދައްކަވަމުން ރައީސް ވިދާޅުވީ ސުނާމީ ކާރިސާގައި އެކިވަރުގެ ގެއްލުން ލިބުނު 190 ރަށުގެ ރައްޔިތުން، ދިރިއުޅުމުގެ ޢާންމު ޙާލަތަށް އިޢާދަކުރުމަށްޓަކައި، މިދިޔަ 15 އަހަރުގެ ތެރޭގައި ވަރަށް ގިނަ މަސައްކަތްތަކެއް އެކި ސަރުކާރުތަކުން ވަނީ ކުރައްވާފައި ކަމަށެވެ. "އޭގެތެރެއިންވެސް އެންމެ ބޮޑު ގޮންޖެހުމަކަށްވީ، ދިރިނޫޅެވޭވަރަށް ބޮޑެތި ގެއްލުންތަކެއް ލިބުނު ފަސް ރަށެއްގެ މީހުން، އެހެން ރަށްރަށުގައި ވަޒަންވެރިކޮށް އާބާދުކުރުވުން. އަދި އަޅުގަނޑުމެން ވެރިކަމާ ހަވާލުވިއިރުވެސް މިފަދަ ރަށްރަށުގެ ޝަކުވާތަކާއި އަދި ޙައްލުކުރަން ޖެހިފައި ހުރި ވަރަށްގިނަ ކަންތައްތައް އެބަހުރި،" ރައީސް ވިދާޅުވިއެވެ.
ރައީސް ވިދާޅުވީ ރައްޔިތުންގެ ފަރާތުން ލިބުނު ޝަކުވަތަކުގެ ތެރޭގައި ބައެއް މީހުން ނަގާފައިހުރި ލޯނުތައް ނުދެއްކި ދަރަނިވެރިވަމުން ދިޔަ މައްސަލަ ހިމެނޭ ކަމަށެވެ. އެކަމަށް ޙައްލެއް ހޯދައިދިނުމުގެ ގޮތުން އޭރު ނަގާފައިވާ 592 ލޯނު މިހާރު ވަނީ މާފުކޮށްދެއްވައިފައި ކަމަށް ރައީސް ވިދާޅުވިއެވެ. އޭގެތެރޭގައި، ކޮޅުފުށީގެ ގެތައް މަރާމާތުކުރުމަށް ދޫކުރި ލޯނުތައްވެސް ހިމެނޭ ކަމަށް ރައީސް ވިދާޅުވިއެވެ.
"އޭގެއިތުރުން، ރ. އަތޮޅު ދުވާފަރާއި، މި ރަށުގެ މީހުންގެ ގެތަކުގެ ރަޖިސްޓްރީގެ މައްސަލަ ވަނީ ޙައްލުނުކުރެވި. އިރާދަކުރެއްވިއްޔާ، މިހާރު ރ. އަތޮޅު ދުވާފަރުގެ ގޭގޭގެ ރަޖިސްޓްރީ، އެ ގޭގޭގެ ވެރިންނަށް ރަޖިސްޓްރީ ކުރުމުގެ މަސައްކަތް ކުރިއަށް އެބަދޭ. އަދި މި ރަށުގެ (ވިލުފުށި) ރައްޔިތުންގެ ރަޖިސްޓްރީ ހެދުމުގެ މަސައްކަތްވެސް މިހާރު ވަނީ ނިންމުމަށްޓަކައި ކައުންސިލާ އެކީގައި މަޝްވަރާ ކުރެވިފައި،" ރައީސް ވިދާޅުވިއެވެ.
ވިލުފުށްޓަކީވެސް ސުނާމީގައި މީހުން ދިރިނޫޅެވޭ ވަރަށް ހަލާކުވި ރަށެކެވެ. ސުނާމީގައި ލިބުނު ގެއްލުންތަކުގެ ސަބަބުން، އެރަށުގެމީހުން އެއްކޮށް އެހެން ރަށްރަށަށް ބަދަލުކުއިކަން ރައީސް ފާހަގަ ކުރެއްވިއެވެ. އަދި ވިލުފުށީ ރައްޔިތުން ފަސް އަހަރު ފަހުން ރަށަށް އެނބުރި އައިއިރު ރަށްވަނީ "ސޭފް އައިލެންޑް ކޮންސެޕްޓް"ގެ ދަށުން ބިން ހިއްކައިގެން ރަށުގެ ފަސްގަނޑު އުސްކޮށް، ވަށައިގެން ރިވެޓްމަންޓް ޖަހައި، އެންމެ މިޒަމާނުގެ ވަސީލަތްތަކާއެކު، މުޅިން އެހެން ރަށެއްގެ ގޮތުގައި ތަރައްގީ ކުރެވިފައި ކަމަށްވެސް ރައީސް ވިދާޅުވިއެވެ.
"އެހެން ނަމަވެސް، އަދިވެސް މި ރަށުގެ ޙިމާޔަތަށް ކުރަންޖެހޭ ބައެއް ކަންތައްތައް އެބަހުރި. މި ރަށުގެ ގޮނޑުދޮށް ޙިމާޔަތް ކުރުމަށްޓަކައި ކުރިއަށް އޮތް އަހަރުގެ ބަޖެޓުގައި 4.4 މިލިއަން ރުފިޔާގެ މަޝްރޫޢެއް ވަނީ ކަނޑައެޅިފައި. އަދި މި ރަށުގައި ފަށާފައިވާ 56 ހައުސިންގ ޔުނިޓްގެ މަސައްކަތް ނިންމުމަށްވެސް، އަންނަ އަހަރުގެ ބަޖެޓްގައި ވަނީ ހިމެނިފައި،" ރައީސް ވިދާޅުވިއެވެ.
އޭގެ އިތުރަށް ވެސް އެރަށުގައި ތަރައްގޫގެ އިތުރު މަޝްރޫއުތައް ކުރިއަށް ދާނެ ކަމަށް އެމަނިކުފާނު ވދާޅުވިއެވެ. އޭގެތެރޭގައި އިޖުތިމާޢީ މަރުކަޒު ތަރައްޤީ ކުރުމާއި، އައު ހޮސްޕިޓަލް ޢިމާރާތް ކުރުމާއި، ފުޓްބޯޅަ ދަނޑާއި، ސްކޫލްގެ ދެ ބުރި ޢިމާރާތުގެ ނުނިމި ހުރި މަސައްކަތްތައް ނިންމުމުގެ މަސައްކަތް އަންނަ އަހަރު ކުރުމަށް ބޭނުންވާ ފައިސާ ވާނީ ބަޖެޓުގައި ހިމަނާފައި ކަމަށް ރައީސް ވިދާޅުވިއެވެ.
ސުނާމީގައި ގެދޮރު ހަލާކުވުމުގެ ސަބަބުން، ފަނަރަ ހާހަށްވުރެ ގިނަ މީހުން، ވަގުތީ ހިޔާތަކުގައި، އެތައް އަހަރެއް ވަންދެން އުޅެންޖެހުނު ކަމަށާއި، އެއާ ވިދިގެން ދިމާވި ގޮންޖެހުންތަކުން އަރައިގަތުމަށް ރަޙްމަތްތެރި ޤައުމުތަކާއި، ބޭރުގެ އެހީދޭ ޖަމާޢަތްތަކާއި، ރާއްޖޭގެ ބައެއް ވިޔަފާރިވެރިންނާއި، އަމިއްލަ ޖަމާޢަތްތަކުން އެހީދެއްވި ކަމަށާއި އެފަރާތްތަކަށް ޝުކުރު އަދާ ކުރައްވާ ކަމަށް ރައީސް ވިދާޅުވިއެވެ.
