އެސް.އެމް.އީ ޑިވެލޮޕްމަންޓް ފައިނޭންސް ކޯޕަރޭޝަން އުފައްދައި ކުދި އަދި މެދުފަންތީގެ ވިޔަފާރިތަކަށް މާލީ އެހީތެރިކަން ފޯރުކޮށްދޭން ފެށިފަހުން މިއަދާ ހަމައަށް 241 ފަރާތަކަށް 283 މިލިއަން ރުފިޔާ ދޫކޮށްފައިވާ ކަމަށް އެތަނުން ބުނެފިއެވެ.
މީގެ ތެރެއިން އެންމެގިނަ ލޯނު ދޫކުރެވިފައިވަނީ ފަތުރުވެރިކަމާ ގުޅުންހުރި ވިޔަފާރި ތަކަށާއި ކޮމާޝަލް ވިޔަފާރި ތަކަށް ކަމަށްވެސް އެތަނުން ބުނެފައިވެއެވެ. މިލޯނުތައް ދޫކޮށްފައިވަނީ ރާއްޖޭގެ ހުރިހާ އަތޮޅެއް ހިމެނޭ ގޮތަށް 83 ރަށެއްގައި ވިޔަފާރިތައް ހިންގުމަށެވެ. މީގެތެރެއިން 34 ޕަސެންޓް ލޯނަކީ އަންހެނުންނާއި ޒުވާނުންނަށް ދޫކޮށްފައިވާ ލޯނު ކަމަށް އެތަނުން ބުންޏެވެ.
މިއަހަރު ލޯނަށް އެދި ހުށަހެޅުމުގެ އެންމެ ފަހު ތާރީޚެއް ކަމަށް އެތަނުން ކަނޑައަޅާފައިވަނީ ޑިސެމްބަރު 19 އެވެ. އަންނަ އަހަރު ލޯނަށް އެދި ހުށަހެޅުމުގެ ފުރުސަތު ހުޅުވާލާނީ ޖެނުއަރީ 19 ގައި ކަމަށްވެސް އެތަނުން ވަނީ ބުނެފައެވެ.
